Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 137

Ediwak Owo Ẹkụt Jesus Mbemiso Pentecost

Ediwak Owo Ẹkụt Jesus Mbemiso Pentecost

MATTHEW 28:16-20 LUKE 24:50-52 UTOM 1:1-12; 2:1-4

  • JESUS OWỤT EDIWAK OWO IDEM

  • ENYE ỌNYỌN̄ HEAVEN

  • JESUS ỌNỌ N̄KPỌ NTE MBET 120 EDISANA SPIRIT

Ke Jesus ama ekeset ke n̄kpa, enye anam apostle esie 11 ẹsobo ye enye ke obot kiet ke Galilee. Mme mbet en̄wen ẹtiene ẹdu do n̄ko, n̄kpọ nte mbet 500 ẹdu. Ndusụk ke otu mmọ ẹma ẹyịk m̀mê Jesus eset ke akpanikọ. (Matthew 28:17; 1 Corinth 15:6) Edi se Jesus etịn̄de idahaemi anam mmọ ẹnịm ke akpanikọ ke imọ imeset.

Jesus ọdọhọ mmọ ke Abasi ọnọ imọ kpukpru odudu ke heaven ye ke isọn̄. Enye onyụn̄ ọdọhọ mmọ ete: “Mmọdo ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:18-20) Ke akpanikọ Jesus eset, enye n̄ko oyom ndikụt nte ke ẹkwọrọ eti mbụk.

Kpukpru mbet Jesus ẹnyene ndinam utom emi, edide mmọ ẹdi irenowo, iban, m̀mê nditọwọn̄. Mme andibiọn̄ọ ẹkeme ndiyom nditre utom emi, edi Jesus ọdọhọ nnyịn ete: “Ẹnọ mi ofụri odudu ke heaven ye ke isọn̄.” Nso ke enye edida odudu emi inam inọ mme mbet? Enye ọdọhọ mmọ ete: “Sese! Ami ndodu ye mbufo kpukpru usen tutu esịm akpatre ini editịm n̄kpọ emi.” Ikọ Jesus iwọrọke ke ẹyenọ kpukpru mbon oro ẹditienede ikwọrọ eti mbụk odudu ndinam mme utịben̄kpọ. Edi edisana spirit oyodu ye kpukpru mmọ.

Jesus owụt mme mbet idem “ke ofụri usen aba” ke enye ama ekeset ke n̄kpa. Enye emen idem owo esịne ediwak ini onyụn̄ “ada ediwak in̄wan̄-in̄wan̄ uyarade owụt mmọ emi n̄ko idem ete ke imodu uwem” onyụn̄ ekpep mmọ “mme n̄kpọ aban̄a obio ubọn̄ Abasi.”—Utom 1:3; 1 Corinth 15:7.

Etie nte edi ke ini mme apostle ẹsụk ẹdude ke Galilee ke enye ọdọhọ mmọ ẹfiak ẹnyọn̄ Jerusalem. Ke ini enye osobode ye mmọ ke Jerusalem, enye ọdọhọ mmọ ete: “Ẹkûkpọn̄ Jerusalem, edi ẹka iso ẹtie ẹbet se Ete ọkọn̄wọn̄ọde, emi mbufo ẹkekopde ẹto mi; koro John ekenịm owo baptism ke mmọn̄, edi ẹdinịm mbufo baptism ke edisana spirit ke usen ifan̄ ẹbede.”—Utom 1:4, 5.

Nte ini akade, Jesus afiak osobo ye mme apostle esie. Enye “ada mmọ ọwọrọ tutu esịm Bethany,” emi odude ke n̄kan̄ edem usiahautịn Obot Olive. (Luke 24:50) Kpa ye kpukpru n̄kpọ oro enye eketịn̄de ọnọ mmọ aban̄a imọ ndinyọn̄ heaven, mmọ ẹsụk ẹkere ke Obio Ubọn̄ esie editọn̄ọ ndikara isọn̄ ke ebe oro.—Luke 22:16, 18, 30; John 14:2, 3.

Mme apostle ẹbụp Jesus ẹte: “Ọbọn̄, nte afo ọmọn̄ ọtọn̄ọ ntak ayak obio ubọn̄ ọnọ Israel ke emi?” N̄kukụre se enye ọbọrọde mmọ edi: “Inaha inọ mbufo ndifiọk mme ini m̀mê mme eyo emi Ete enịmde ke idak odudu esiemmọ.” Ekem enye afiak etịn̄ utom emi mmọ ẹnyenede ndinam ete: “Mbufo ẹyebọ odudu ke ini edisana spirit edide edidoro mbufo ke idem, ndien mbufo ẹyetie ntiense ẹban̄a mi ke Jerusalem ye ke ofụri Judea ye Samaria tutu esịm ata utịt ikpehe isọn̄.”—Utom 1:6-8.

Mme apostle ẹdu ke Obot Olive ye Jesus ke ini enye ọtọn̄ọde ndidọk enyọn̄. Ke mîbịghike, ntọn̄enyọn̄ iyakke mmọ ẹkụt enye aba. Ke Jesus ama ekeset, enye ama emen idem owo esịne. Edi idahaemi enye afiak akabade spirit ọnyọn̄ heaven. (1 Corinth 15:44, 50; 1 Peter 3:18) Nte mme anam-akpanikọ apostle ẹsụk ẹdade ẹse ẹnyọn̄, “owo iba emi ẹsịnede mfia ọfọn̄” ẹda ẹkpere mmọ. Owo iba emi ẹdi mme angel emi ẹmende idem owo ẹsịne, mmọ ẹbụp mme apostle oro ẹte: “Mbon Galilee, ntak emi mbufo ẹdade ẹse ikpaenyọn̄? Jesus emi ẹkemende ẹkpọn̄ mbufo ẹdụk ikpaenyọn̄ eyedi kpa ke ukem usụn̄ emi mbufo ẹkụtde nte enye odụkde ikpaenyọn̄.”—Utom 1:10, 11.

Owo ikofrike obukpon̄ inọ ofụri ekondo ke ini Jesus okoyomde ndinyọn̄ heaven, mme mbet esie oro ẹkenamde akpanikọ kpọt ẹkekụt ini enye adahade. Enye edifiak idi “kpa ke ukem usụn̄ emi,” idịghe ofụri ekondo ẹdidiọn̄ọ ke enye ọtọn̄ọ ndikara ke Obio Ubọn̄ ke heaven.

Mme apostle ẹfiak ẹnyọn̄ Jerusalem. Mmọ ẹsop idem ọtọkiet ye mme mbet eken ke mme usen oro ẹtienede. “Mary eka Jesus ye nditọeka esie iren” ẹtiene ẹsop idem do n̄ko. (Utom 1:14) Mmọ ẹkọbọ ke akam. N̄kpọ kiet emi ẹbọn̄de akam ẹban̄a edi mbet emi ẹdimekde ẹte ada itie Judas Iscariot man mme apostle ẹsụk ẹdi 12. (Matthew 19:28) Mmọ ẹyom mbet emi okodude okụt se Jesus akanamde onyụn̄ okụt ini emi enye esetde ke n̄kpa. Ntre mmọ ẹsịn afia man ẹdiọn̄ọ owo emi ẹkpemekde. Akpatre ini emi Bible etịn̄de nte ẹdade afia ẹdiọn̄ọ uduak Abasi edi emi. (Psalm 109:8; Mme N̄ke 16:33) Ẹmek Matthias. Etie nte enye ekedi kiet ke otu mbet 70 oro Jesus okosiode ọdọn̄ ẹkekwọrọ ikọ, ndien “ẹbat enye ẹdian ye mme apostle duopekiet.”—Utom 1:26.

Usen duop ke Jesus ama ọkọdọk heaven, mme Jew ẹnịm Usọrọ Pentecost eke isua 33. N̄kpọ nte mbet Jesus 120 ẹsop idem ke ubet enyọn̄ kiet ke Jerusalem. Ini kiet, uyom emi etiede nte uyom ata ọkpọsọn̄ ofụm ọyọhọ ufọk oro. Mmọ ẹkụt mme edeme eke ẹbietde edemeikan̄ nte ẹdemede ẹdoro mmọ owo kiet kiet ke ibuot. Kpukpru mbet oro ẹtọn̄ọ ndisem nsio nsio usem. Edisana spirit oro Jesus ọkọn̄wọn̄ọde ke ẹnọ mme mbet esie emi!—John 14:26.