Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 18

Utom Jesus Aka Iso Okpon, Eke John Aka Iso Ekpri

Utom Jesus Aka Iso Okpon, Eke John Aka Iso Ekpri

MATTHEW 4:12 MARK 6:17-20 LUKE 3:19, 20 JOHN 3:22–4:3

  • MBET JESUS ẸNỊM MME OWO BAPTISM

  • ẸSỊN JOHN ANDINỊM OWO BAPTISM KE UFỌK-N̄KPỌKỌBI

Jesus ye mbet esie ẹkpọn̄ Jerusalem ke ẹma ẹkekụre usọrọ Passover ke ini ndaeyo eke isua 30 eyo Christ. Edi mmọ inyọn̄ke ufọk mmọ ke Galilee. Mmọ ẹka Judea, ndien do ke mmọ ẹnịm ediwak owo baptism. Ukem utom emi ke John Andinịm Owo Baptism anam ke n̄kpọ nte isua kiet idahaemi, ndusụk mbet esie ẹsụk ẹdodu ye enye ke itịghede emi ekperede Akpa Jordan.

Jesus ke idemesie inịmke owo ndomokiet baptism, edi enye eteme mme mbet esie nte ẹdinamde oro. Jesus ye John ke ẹkpep mme Jew oro ẹkabarede esịt n̄kpọ. Mme owo emi ẹkabade esịt ke idiọkn̄kpọ oro mmọ ẹnamde ke ntak emi mmọ mînịmke ibet Abasi.—Utom 19:4.

Edi mme mbet John ẹyat esịt ẹnyụn̄ ẹtịn̄ se Jesus anamde emi ẹnọ John. Mmọ ẹdọhọ ẹte: “[Jesus] emi okodude ye afo . . . ke enịm owo baptism ndien kpukpru owo ke ẹka ẹbịne enye.” (John 3:26) Edi John iyatke esịt. Enye akam enenem esịt nte mme owo ẹkade ẹbịne Jesus onyụn̄ oyom mme mbet esie ẹdara n̄ko. John ọdọhọ mmọ ete: “Mbufo ke idem mbufo ẹmedi ntiense mi nte ke mma ndọhọ nte, Ami ndịghe Christ, edi, ẹkesio mi ẹdọn̄ ndibem enye iso.” Enye ọnọ mmọ uwụtn̄kpọ oro edinamde ikọ esie an̄wan̄a mmọ ete: “Ebendọ edi andinyene n̄wanndọ. Edi, ke ini ufan ebendọ adade okop enye uyo, adara etieti ndikop uyo ebendọ. Ntre ẹmenam idatesịt mi emi ọyọhọ.”—John 3:28, 29.

John emi edide ufan ebendọ ama adat esịt etieti ke ini enye akanamde mme mbet esie ẹdiọn̄ọ Jesus ọfiọn̄ ifan̄ emi ẹkebede. Ndusụk mmọ ẹma ẹtiene Jesus, ndien nte ini akade, ẹyeda edisana spirit ẹyet mmọ aran. John oyom mme mbet oro ẹdude ye enye ẹtiene Jesus. Se idude edi ke John ọdiọn̄ usụn̄ ọnọ Christ. John ọdọhọ ete: “Enye ayaka iso okpon, edi ami nyaka iso n̄kpri.”—John 3:30.

Nte ini akade, John en̄wen emi ekesịnede ke otu akpa mbet Jesus ewet aban̄a ebiet emi Jesus okotode edi ye akpan utom emi Abasi ọnọde enye nte andinyan̄a ubonowo ete: “Enye emi otode ke enyọn̄ edi okpon akan kpukpru mmọ eken. . . . Ete amama Eyen onyụn̄ ayak kpukpru n̄kpọ esịn enye ke ubọk. Owo eke ọbuọtde idem ke Eyen enyene nsinsi uwem; owo eke ọsọn̄de ibuot ye Eyen idikwe uwem, edi iyatesịt Abasi odoro enye ke idem.” (John 3:31, 35, 36) Ata akpanikọ ke John etịn̄ emi!

Ibịghike ke John ama eketịn̄ ke utom imọ ayaka iso ekpri ke ini eke Jesus edikade iso okpon, Edidem Herod omụm enye. Herod ada Herodias, n̄wan Philip eyenete esie, ọdọ. Sia John etịn̄de ke eferife ke efịbe edi emi, ndien ke se enye anamde ọdiọk etieti, Herod ọnọ uyo ete ẹsịn enye ke ufọk-n̄kpọkọbi. Ke ini Jesus okopde ke ẹmụm John, enye ye mbet esie ‘ẹkpọn̄ Judea ẹka Galilee.’—Matthew 4:12; Mark 1:14.