Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 14

Jesus Ọtọn̄ọ Ndinyene Mme Mbet

Jesus Ọtọn̄ọ Ndinyene Mme Mbet

JOHN 1:29-51

  • MME AKPA MBET JESUS ẸTIENE ENYE

Ke Jesus ama okodu usen 40 ke wilderness, enye afiak ebịne John emi ekenịmde enye baptism mbemiso enye afiakde ọnyọn̄ Galilee. Nte Jesus asan̄ade ekpere, John osio ubọk anyan onyụn̄ ọdọhọ mbon emi ẹdude ye enye ete: “Sese, Eyenerọn̄ Abasi oro emende idiọkn̄kpọ ererimbot efep! Emi edi owo emi n̄ketịn̄de mban̄a nte, Owo emi etienede mi ke edem ebem mi iso, koro enye ama ododu mbemiso ami ndidu.” (John 1:29, 30) Okposụkedi emi John ọsọn̄ọde Jesus ke ọfiọn̄ ifan̄, enye ọfiọk ke Jesus ama ododu ke heaven.

Urua ifan̄ ko ke edem ke ini Jesus ekedide ebịne John ete enịm imọ baptism, etie nte John ikọdiọn̄ọke ke Jesus edi Messiah. John ke idemesie ọdọhọ ete: “Ami n̄kakam ndiọn̄ọke enye, edi ntak emi n̄kenịmde owo baptism ke mmọn̄ ekedi man ẹyarade enye ẹnọ Israel.”—John 1:31.

John etịn̄ ọnọ mbon emi ẹdude ye enye se iketịbede ke ini imọ ikenịmde enye baptism ete: “Mma n̄kụt spirit osụhọrede nte ibiom oto ke heaven edidoro enye. Ami n̄kakam ndiọn̄ọke enye, edi Enye emi ọkọdọn̄de mi ete nnịm owo baptism ke mmọn̄ ọkọdọhọ mi ete: ‘Owo ekededi eke afo edikụtde nte spirit osụhọrede edidoro enye, emi edi enye emi enịmde owo baptism ke edisana spirit.’ Ndien mma n̄kụt, nnyụn̄ ntie ntiense nte ke enye edi Eyen Abasi.”—John 1:32-34.

John odu ye mbet esie iba ke ini Jesus afiakde aka ebịne enye ke ndan̄nsiere. John ọdọhọ mmọ ete: “Sese, Eyenerọn̄ Abasi!” (John 1:36) Ke ini owo iba emi ẹdide mbet John Andinịm Owo Baptism ẹkopde ikọ emi, mmọ ẹdaha ẹtiene Jesus. Owo mmọ kiet ekere Andrew. Etie nte ọyọhọ owo iba ekewet mbụk emi, enye n̄ko ekere John. Etie nte John emi edi eyen Salome, eyeneka eka Jesus. Salome edi n̄wan Zebedee.

Ke ini Jesus ọwọn̄ọrede okụt nte Andrew ye John ẹtienede enye, enye obụp mmọ ete: “Nso ke mbufo ẹyom?”

Mmọ ẹbụp enye ẹte: “Rabbi . . . afo odụn̄ ke m̀mọ̀n̄?”

Jesus ọbọrọ mmọ: “Ẹdi, ndien mbufo ẹyekụt.”—John 1:37-39.

Edi n̄kpọ nte n̄kanika inan̄ uwemeyo, Andrew ye John ẹdu ye Jesus ofụri usen oro. Esịt enem Andrew etieti tutu enye oyom Simon eyeneka esie emi ẹsikotde n̄ko Peter onyụn̄ ọdọhọ enye ete: “Nnyịn imokụt Messiah.” (John 1:41) Andrew emen Peter okowụt Jesus. Okposụkedi emi John mîmaha nditịn̄ n̄kpọ mban̄a idemesie ke mbụk emi, etie nte enye n̄ko ama ekemen James eyeneka esie okowụt Jesus.

Ke ndan̄nsiere, Jesus okụt Philip emi otode Bethsaida. Bethsaida odu ekpere esụk Galilee, onyụn̄ edi obio mme Andrew ye Peter. Jesus ọdọhọ Philip ete: “Tiene mi.”—John 1:43.

Philip okụt Nathanael, emi ẹdiọn̄ọde n̄ko nte Bartholomew, onyụn̄ ọdọhọ enye ete: “Nnyịn imokụt enye emi Moses ye mme Prọfet ẹkewetde ẹban̄a ke Ibet, kpa Jesus, eyen Joseph, emi otode Nazareth.” Nathanael inịmke, ntre enye obụp Philip ete: “Nte eti n̄kpọ ndomokiet ekeme ndiwọrọ nto Nazareth?”

Philip ọdọhọ enye ete: “Di dise.” Jesus ada okụt Nathanael asan̄ade edi onyụn̄ ọdọhọ ete: “Sese, ata eyen Israel, emi abian̄a mîdụhe enye ke esịt.”

Nathanael obụp Jesus ete: “Asan̄a didie ọdiọn̄ọ mi?”

Jesus ọbọrọ enye ete: “Mbemiso Philip okokotde fi, ke adan̄aemi afo okodude ke idak eto fig, mma n̄kokụt fi.”

Idem akpa Nathanael, ndien enye ọdọhọ ete: “Rabbi, afo edi Eyen Abasi, afo edi Edidem Israel.”

Jesus obụp enye ete: “Nte afo emenịm ke akpanikọ koro n̄kọdọhọde fi ke mma n̄kụt fi ke idak eto fig? Afo oyokụt mme n̄kpọ emi ẹkponde ẹkan mmọ emi.” Jesus aka iso ọdọhọ enye ete: “Ke ata akpanikọ ke ndọhọ mbufo nte, Mbufo ẹyekụt nte ẹbererede heaven ye nte mme angel Abasi ẹdide ẹdọdọk ẹsosụhọde ẹdi ndinam n̄kpọ nnọ Eyen owo.”—John 1:45-51.

Esisịt ini ke oro ebede, Jesus ye mbufa mbet esie emi ẹkpọn̄ Itịghede Jordan oro ẹka Galilee.