Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 16

Ifịk Ufọk Abasi Adia Jesus Idem

Ifịk Ufọk Abasi Adia Jesus Idem

JOHN 2:12-22

  • JESUS ANAM TEMPLE ASANA

Ke ẹma ẹkesuana ndọ oro ke Cana, Jesus aka Capernaum. Enye asan̄a ye eka esie ye nditọeka esie, oro edi James, Joseph, Simon, ye Judas.

Edi ntak emi Jesus akade Capernaum? Obio emi okpon akan Nazareth ye Cana onyụn̄ odu ke ebiet oro ediwak owo ẹsibede. N̄kpọ en̄wen edi nte ke ediwak mbufa mbet Jesus ẹdụn̄ ke Capernaum mîdịghe ẹdu ẹkpere do. Ntre Jesus eyekpep mmọ n̄kpọ ke obio mmọ.

DKe ini Jesus odude ke Capernaum, enye anam ediwak utịben̄kpọ. Ntem, mbon oro ẹdude do, ye ke n̄kann̄kụk obio oro ẹkop ẹban̄a se enye anamde do. Edi sia Jesus ye mbet esie ẹnen̄erede ẹma Abasi, idibịghike mmọ ẹmọn̄ ẹdọk ẹka Jerusalem man ẹkedụk Passover eke isua 30 eyo Christ.

Mi ke temple Jerusalem ke mbet Jesus ẹkụt nte enye anamde n̄kpọ emi enen̄erede akpa owo idem, kpa n̄kpọ oro akanam mmọ mîkwe.

Ibet Abasi eteme nditọ Israel ete ẹsiwa uwa ke temple, ndien mmọ ẹsiwak ndiwa unam; mbon oro ẹtode-to ẹdi n̄ko ẹsidep unam do ẹnam udia mmọ ke ini oro mmọ ẹdude do. Ntre Ibet ama enyịme mbon oro ẹtode nsio nsio itie ẹdi Jerusalem ẹkama okụk man ẹkpedep “enan̄ ye erọn̄ ye ebot” ye n̄kpọ en̄wen ekededi oro mmọ ẹdiyomde ke adan̄aemi mmọ ẹdude do. (Deuteronomy 14:24-26) Mme owo ke Jerusalem ẹsinyam unam ye inuen ke akamba esịt okụre temple. Ndusụk mmọ ẹsitụk mme owo etieti.

N̄kpọ emi ayat Jesus esịt tutu enye an̄wan̄a okụk mme okpụhọ okụk ọduọn̄ọ, onụk okpokoro mmọ ọduọn̄ọ onyụn̄ ebịn mmọ osion̄o ke temple. Enye ọdọhọ mmọ ete: “Ẹtan̄ mme n̄kpọ emi ẹsion̄o mi! Ẹkûda ufọk Ete mi ẹnịm ufọk mbubịne!”—John 2:16.

Ke ini mbet esie ẹkụtde n̄kpọ emi, mmọ ẹti ke ẹma ẹwet ẹban̄a Eyen Abasi ẹte: “Ifịk ufọk fo ayadia mi idem.” Edi mme Jew ẹbụp enye ẹte: “Nso idiọn̄ọ ke afo enyene ndiwụt nnyịn, ke emi afo anamde mme n̄kpọ emi?” Jesus ọbọrọ mmọ ete: “Ẹwụri temple emi, ndien nyọbọp enye ke usen ita.”—John 2:17-19; Psalm 69:9.

Mmọ ẹkere ke Jesus etịn̄ aban̄a ata temple oro ke Jerusalem, ntre mmọ ẹfiak ẹbụp enye ẹte: “Ẹkeda isua aba ye itiokiet ẹbọp temple emi, ndien ndi afo edibọp enye ke usen ita?” (John 2:20) Edi Jesus eketịn̄ aban̄a idemesie, idịghe temple Jerusalem. Ke isua ita ama ekebe, mbet esie ẹti ikọ esie emi ke ini ẹnamde enye eset.

Kpep N̄kpọ En̄wen

Elijah Stood Up for Pure Worship

How can we imitate Elijah when dealing with those who disagree with what the Bible teaches?