Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 12

Jesus Ana Baptism

Jesus Ana Baptism

MATTHEW 3:13-17 MARK 1:9-11 LUKE 3:21, 22 JOHN 1:32-34

  • JESUS ANA BAPTISM ẸNYỤN̄ ẸYET ENYE ARAN

  • JEHOVAH ETỊN̄ KE JESUS EDI EYEN IMỌ

Ke John Andinịm Owo Baptism ama ọkọkwọrọ ikọ ke n̄kpọ nte ọfiọn̄ itiokiet, Jesus emi onyụn̄ edide n̄kpọ nte isua 30 idahaemi, aka ebịne enye ke Akpa Jordan. Ntak emi enye akade ebịne John? Enye ikaha ndise John nte owo okponyụn̄ akade ndise ufan esie. Inyụn̄ ikaha ndise nte John anamde utom esie eketre. Enye aka ndidọhọ John enịm imọ baptism.

John inyịmeke ndinịm enye baptism, edi ọdọhọ enye ete: “Ami n̄kam ndi owo emi afo ekpenịmde baptism, ndien afo ededi ebịne mi?” (Matthew 3:14) John ọfiọk ke Jesus edi ata Eyen Abasi. N̄kọ emeti nte John ọkọfrọde Elizabeth ke esịt idịbi ke ntak idatesịt ke ini Mary emi akasan̄ade ye idịbi Jesus, akakade ekese Elizabeth. Anaedi eka John ama etịn̄ n̄kpọ emi ọnọ eyen esie. Ekeme ndidi ẹma ẹtịn̄ ẹnọ enye nte angel Gabriel akanamde Mary ọdiọn̄ọ ke enye ediman Jesus ye nte mme angel ẹkekade ẹketịn̄ ikọ ye mme ekpemerọn̄ okoneyo emi Jesus akamanade.

John ọdiọn̄ọ ke imọ inịm mbon emi ẹkabarede esịt ẹkpọn̄ idiọkn̄kpọ mmọ baptism. Edi akanam Jesus inamke idiọkn̄kpọ. Okposụkedi emi John afan̄ade, Jesus ọdọhọ enye ete: “Yak edi ntre ke emi, koro ntem ke odot nnyịn ndinam kpukpru se inende.”—Matthew 3:15.

Ntak emi odotde ẹnịm Jesus baptism? Jesus inaha baptism ke ntak emi enye akabarede esịt ọkpọn̄ mme idiọkn̄kpọ esie. Baptism esie owụt ke enye ayak idemesie ọnọ Ete esie ndinam uduak esie. (Mme Hebrew 10:5-7) Jesus ekedi anamusọ eto, edi ini ekem emi enye oyomde nditọn̄ọ utom emi Ete esie okosiode enye ke heaven ọdọn̄ ete edinam mi ke isọn̄. Ndi John ama ekere ke n̄kpọ eyetịbe ke ini imọ inịmde Jesus baptism?

Nte ini akade, John ama etịn̄ ete: “Enye emi ọkọdọn̄de mi ete nnịm owo baptism ke mmọn̄ ọkọdọhọ mi ete: ‘Owo ekededi eke afo edikụtde nte spirit osụhọrede edidoro enye, emi edi enye emi enịmde owo baptism ke edisana spirit.’” (John 1:33) Ntre John ama ọfiọk ke spirit Abasi oyosụhọde edidoro kiet ke otu mbon emi imọ inịmde baptism. Ntem, ke ini Jesus ọwọrọde ke mmọn̄, idem ikpaha John ndikụt nte “spirit Abasi osụhọrede nte ibiom edidoro [Jesus] ke idem.”—Matthew 3:16.

Se ikam ikande emi etịbe ke ini Jesus anade baptism. “Enyọn̄ eberede” ọnọ enye. Nso ke emi ọwọrọ? Anaedi emi ọwọrọ ke ini baptism oro, ke Jesus ama afiak eketi nte uwem eketiede ke ini enye okodude ke heaven. Ntem, Jesus ama eti nte n̄kpọ eketiede ye imọ ke ini ikodude ke heaven ye mme n̄kpọ emi Abasi ekekpepde imọ mbemiso idide isọn̄.

N̄kpọ en̄wen edi nte ke ini Jesus anade baptism, uyo oto ke heaven ete: “Emi edi edima Eyen mi, emi ami nnyịmede.” (Matthew 3:17) Uyo anie ekedi oro? Ikemeke ndidi uyo Jesus sia enye do akada ye John. Uyo Abasi ke ekedi. Emi owụt ke Jesus edi Eyen Abasi. Enye idịghe Abasi.

Tịm fiọk ete ke Jesus edi Eyen Abasi kpa nte Adam, akpa owo emi Abasi okobotde, ekedide. Ke Luke ama eketịn̄ nte Jesus akanade baptism ama, enye ọdọhọ n̄ko ete: “Jesus ekedi n̄kpọ nte isua edịp ye duop ke ini enye ọtọn̄ọde utom esie, ẹkenyụn̄ ẹkere ke enye edi, eyen Joseph, eyen Heli, . . . eyen David, . . . eyen Abraham, . . . eyen Noah, . . . eyen Adam, eyen Abasi.”—Luke 3:23-38.

Jesus edi “eyen Abasi” kpa nte Adam ekedide. Ke ini Jesus akanade baptism, enye ama ọdiọn̄ọ ke imọ idi Eyen Abasi, ke iyonyụn̄ ifiak ikodu ke heaven. Abasi ama ada spirit esie eyet enye aran. Ntem, enye odot ndikpep mme owo akpanikọ nnyụn̄ n̄wụt mmọ usụn̄ uwem. Jesus ọtọn̄ọ ndinam n̄kpọ man enye ekpekeme ndiyak uwem esie nnọ man Abasi efen idiọkn̄kpọ ubonowo.