Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 54

Jesus Edi “Uyo Uwem”

Jesus Edi “Uyo Uwem”

JOHN 6:25-48

  • JESUS EDI “UYO EMI OTODE HEAVEN”

Jesus okodu ke n̄kan̄ edem usiahautịn Inyan̄ Galilee ke ini enye ọnọde ediwak owo udia ke utịbe utịbe usụn̄ onyụn̄ ọkpọn̄ do ke ini mmọ ẹyomde ndimek enye edidem. Okoneyo usen oro, enye ama asan̄a ke enyọn̄ mmọn̄ onyụn̄ anyan̄a Peter emi eketienede enye asan̄a, emi ọkọtọn̄ọde ndiden̄ ke ntak ndịk. Jesus ama onyụn̄ anam oyobio odobo, man ubom emi mbet esie ẹkewatde idisịp.

Idahaemi Jesus afiak edisịm Capernaum, ke n̄kan̄ edem usoputịn Inyan̄ Galilee. Mbon emi enye ọkọnọde udia ke ini enye akanamde utịben̄kpọ oro ẹdikụt enye ẹnyụn̄ ẹbụp enye ẹte: “Ini ewe ke afo ekedisịm mi?” Jesus asua ọnọ mmọ onyụn̄ ọdọhọ mmọ ete ke mmọ ẹkeyom imọ man ifiak inọ mmọ udia. Enye ọdọhọ mmọ ete: “Ẹkûnam utom ẹyom udia eke edibiarade, edi ẹnam ẹyom udia eke edikade iso odu onyụn̄ osụn̄ọ ke uwem nsinsi.” Mmọ ẹbụp enye ndien ẹte: “Nso ke nnyịn idinam man inam mme utom Abasi?”—John 6:25-28.

Ekeme ndidi mmọ ẹkekere ẹban̄a mme n̄kpọ emi Ibet Moses ọdọhọde ẹnam. Edi Jesus owụt mmọ n̄kpọ emi akande se ẹkewetde ke Ibet. Enye ọdọhọ ete: “Utom Abasi edi emi, ete mbufo ẹbuọt idem ke owo emi Enye okosiode ọdọn̄.” Mme owo emi isụk ibuọtke idem ye Jesus kpa ye ofụri utịben̄kpọ emi enye anamde. Mmọ ẹdọhọ enye owụt mmimọ idiọn̄ọ man mmimọ ida oro ibuọt idem ye enye. Mmọ ẹbụp enye ẹte: “Nso utom ke afo ananam? Mme ete ete nnyịn ẹkedia manna ke wilderness, kpa nte ẹwetde ẹte, ‘Enye ama ọnọ mmọ uyo eke otode heaven ete ẹta.’”—John 6:29-31; Psalm 78:24.

Ke ini Jesus ọbọrọde mmọ, enye anam mmọ ẹdiọn̄ọ Akakan Owo emi esinamde utịben̄kpọ. Enye ọdọhọ ete: “Ndọhọ mbufo nte, Moses ikọnọhọ mbufo uyo eke otode heaven, edi Ete mi ọnọ mbufo ata uyo emi otode heaven. Koro uyo emi Abasi ọnọde edi enye emi otode ke heaven osụhọde edi edinọ ererimbot uwem.” Sia ikọ esie mîsụk in̄wan̄ake mmọ, mmọ ẹdọhọ enye ẹte: “Ọbọn̄, nọ nnyịn uyo emi kpukpru ini.” (John 6:32-34) Edi nso utọ “uyo” ke Jesus etịn̄ aban̄a?

Enye ọdọhọ ete: “Ami ndi uyo uwem. Owo eke edide ebịne mi idikopke biọn̄ tutu amama, ndien owo eke ọbuọtde idem ye ami idikopke nsatitọn̄ tutu amama. Edi ndọhọ mbufo nte, mbufo ẹmekụt mi edi inịmke mi ke akpanikọ. . . . N̄koto heaven nsụhọde ndi, idịghe man ndinam uduak idemmi, edi man ndinam uduak enye emi ọkọdọn̄de mi. Emi edi uduak enye emi ọkọdọn̄de mi, ete n̄kûyak baba kiet ke otu kpukpru mmọ eke enye ọkọnọde mi ọbọhọ osop, edi nnam kpukpru mmọ ẹset ke akpatre usen. Koro uduak Ete mi edi emi, ete kpukpru owo eke ẹkụtde Eyen ẹnyụn̄ ẹbuọtde idem ye enye ẹnyene nsinsi uwem.”—John 6:35-40.

Ikọ emi ayat mme Jew etieti, mmọ ẹnyụn̄ ẹtọn̄ọ ndikụni. Mmọ ẹdọhọ m̀mê nso ikpanam enye ọdọhọ ke imọ idi “uyo emi okotode heaven osụhọde edi.” (John 6:41) Mmọ idaha enye ke n̄kpọ sia mmọ ẹdiọn̄ọ ke ete ye eka esie ẹto Nazareth emi odude ke Galilee. Mmọ ẹbụp ẹte: “Nte emi idịghe Jesus eyen Joseph, emi nnyịn idiọn̄ọde ete ye eka esie?”—John 6:42.

Jesus ọdọhọ mmọ ete: “Ẹtre ndikụni ke otu idem mbufo. Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi; ndien ami nyanam enye eset ke akpatre usen. Ẹwet ke uwetn̄kpọ mme Prọfet ẹte, ‘Jehovah oyonyụn̄ ọnọ kpukpru mmọ ukpep.’ Kpukpru owo eke ẹkopde uyo Ete ẹnyụn̄ ẹbọde ukpep ẹdi ẹtiene mi. Baba owo kiet ikwe Ete, ibọhọke enye emi otode Abasi; enye emi okụt Ete. Ke ata akpanikọ ke ndọhọ mbufo, owo eke enịmde ke akpanikọ enyene nsinsi uwem.”—John 6:43-47; Isaiah 54:13.

Ke ini Jesus ekenemede nneme ye Nicodemus, Jesus ama owụt ke owo emi oyomde ndinyene nsinsi uwem ana ọbuọt idem ye Eyen owo. Enye ọkọdọhọ ke ‘owo ekededi eke ọbuọtde idem ye ikpọn̄-ikpọn̄ edibon Eyen Abasi iditakke, edi eyenyene nsinsi uwem.’ (John 3:15, 16) Edi idahaemi enye etịn̄de ikọ mi ye ediwak owo, enye ọdọhọ mmọ ke imọ idinam mmọ ẹnyene nsinsi uwem, ke idịghe manna m̀mê uyo Galilee ẹdinam. Edi mmọ ẹdinam nso man ẹnyene nsinsi uwem emi? Jesus afiak ọdọhọ mmọ ete: “Ami ndi uyo uwem.”—John 6:48.

Nneme emi itreke mi, Jesus eneme enye ekesịm ini emi enye ekpepde mme owo n̄kpọ ke synagogue ke Capernaum.