Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 41

Jesus Ada Odudu ke M̀mọ̀n̄ Anam Utịben̄kpọ?

Jesus Ada Odudu ke M̀mọ̀n̄ Anam Utịben̄kpọ?

MATTHEW 12:22-32 MARK 3:19-30 LUKE 8:1-3

  • JESUS AFIAK ASAN̄A ỌKWỌRỌ IKỌ KE GALILEE

  • EBỊN MME DEMON OSION̄O MME OWO KE IDEM ONYỤN̄ ETỊN̄ UTỌ IDIỌKN̄KPỌ EMI ABASI MÎDIFENKE

Ke Jesus ama eketịn̄ aban̄a ndifen nnọ owo ke ufọk Simon emi ekedide Pharisee, enye afiak asan̄a ke Galilee ọkwọrọ ikọ. Ọyọhọ isua iba edi emi tọn̄ọ enye ọkọtọn̄ọ utom ukwọrọikọ. Enye isan̄ake ikpọn̄, edi asan̄a ye mme apostle esie 12 ye ndusụk iban emi enye ekebịnde ndiọi spirit osion̄o ke idem onyụn̄ anamde udọn̄ọ okụre mmọ. (Luke 8:2) Ndusụk iban emi ẹdi Mary Magdalene, Susanna, ye Joanna, emi ebe esie esisede aban̄a ufọk Edidem Herod Antipas.

Nte mme owo ẹkopde etop n̄kpọ emi Jesus anamde, ntre ke mmọ ẹtin̄ nsio nsio n̄kpọ ẹban̄a enye. Se iketịbede edi emi ke ini ẹkemende ete kiet emi demon afịnade, emi ekedide nnan ye imụm ẹsọk Jesus, ndien Jesus ọkọk enye. Demon ifịnake ete oro aba; enye ekeme nditịn̄ ikọ nnyụn̄ n̄kụt usụn̄. Idem akpa mme owo tutu mmọ ẹdọhọ ẹte: “Nte idịghe Eyen David edi emi?”—Matthew 12:23.

Mme owo ẹyọhọ ufọk emi Jesus ye mbet esie ẹdude tutu mmọ ikemeke ndidia ukpọk udia. Edi idịghe kpukpru owo emi ẹdude do ẹnịm ke Jesus edi “Eyen David” emi ẹken̄wọn̄ọde. Ndusụk mme scribe ye mme Pharisee n̄ko ẹto Jerusalem ẹdi. Mmọ idịghe ndikop ukwọrọikọ Jesus m̀mê ndinam mme owo ẹbuọt idem ye enye. Mmọ ẹdọhọ mme owo ẹte ke Jesus “enyene Beelzebub,” ntre ke enye ada odudu ‘andikara mme demon’ anam se enye anamde. (Mark 3:22) Ke ini nditọeka Jesus ẹkopde kpukpru editịm emi, mmọ ẹdi ndimụm enye. Ntak-a?

Se idude edi ke tutu emi nditọeka esie inịmke ke enye edi Eyen Abasi. (John 7:5) Jesus emi mme owo ẹkerede ke enye edi ntak ofụri editịm emi itiehe aba nte Jesus eyeneka mmọ emi mmọ ẹkesidụn̄de kiet ke Nazareth. Mmọ ẹkere ke Jesus enyene mfịna ke ibuot, ntre mmọ ẹdọhọ ẹte: “Ibuot ọbọhọ enye.”—Mark 3:21.

Edi ndi se ẹtịn̄de emi enen? Ndondo emi ke Jesus anam owo emi demon akafịnade okụt usụn̄ onyụn̄ etịn̄ ikọ. Ndien kpukpru owo ẹma ẹkụt utịben̄kpọ emi. Edi sia mme scribe ye mme Pharisee ẹyomde usụn̄ ndibiat Jesus enyịn̄, mmọ ẹsu nsu ẹdori enye. Mmọ ẹdọhọ ẹte: “Owo emi ibịnke mme demon ke mîtoho ke Beelzebub, kpa andikara mme demon.”—Matthew 12:24.

Jesus ọfiọk se mme scribe ye mme Pharisee ẹkerede, ntre enye ọdọhọ mmọ ete: “Kpukpru obio ubọn̄ eke abaharede ada an̄wana ye idemesie odụk ke nsobo, ndien kpukpru obio m̀mê ufọk eke abaharede ada an̄wana ye idemesie idisọn̄ọke ida. Kpasụk ntre, edieke Satan ebịnde Satan, enye amabahade ada an̄wana ye idemesie; didie, ndien, ke obio ubọn̄ esie edisọn̄ọ ada?”—Matthew 12:25, 26.

Se Jesus etịn̄de emi enen̄ede esịne ifiọk. Mme Pharisee ẹfiọk ke ndusụk mme Jew ẹsibịn demon ẹsio mme owo ke idem. (Utom 19:13) Ntem Jesus obụp mmọ ete: “Edieke ami ndade Beelzebub mbịn mme demon, nditọ mbufo ẹda anie ẹbịn mmọ?” Ikọ Jesus ọwọrọ ke nditọ mmọ n̄ko ẹsida odudu Beelzebub ẹbịn demon. Ndien Jesus ọdọhọ mmọ ete: “Edieke edide nda spirit Abasi mbịn mme demon, obio ubọn̄ Abasi esesịm mbufo.”—Matthew 12:27, 28.

Jesus ọnọ uwụtn̄kpọ man owụt ke imọ ndibịn demon nsio mme owo ke idem owụt ke imọ imenyene odudu ikan Satan. Enye ọdọhọ ete: “Didie ke owo ekededi ekeme ndidụk ufọk ọkpọsọn̄ owo mbụme inyene esie, ke mîbọhọke enye ebem iso ọbọp ọkpọsọn̄ owo emi? Adan̄aoro ke enye edibụme ufọk esie. Owo eke mîdaha ye ami an̄wan̄wana ye ami, ndien owo eke mîtieneke mi itan̄ ibok asasuan.” (Matthew 12:29, 30) Mme scribe ye mme Pharisee idaha ye Jesus, ọwọrọ mmọ ẹda ye Satan. Mmọ iyakke mme owo ẹtiene Eyen Abasi emi Abasi ọnọde odudu ada anam utom esie.

Jesus ọdọhọ nditọufọk Satan oro ete: “Ẹyefen nditọ owo kpukpru n̄kpọ, inamke n̄kpọ m̀mê nso idiọkn̄kpọ ke mmọ ẹnam, m̀mê nso ikọ isụn̄i ke mmọ ẹtịn̄. Nte ededi, owo ekededi eke etịn̄de ikọ isụn̄i adian edisana spirit inyeneke edifen tutu amama, edi enyene ubiomikpe nsinsi idiọkn̄kpọ.” (Mark 3:28, 29) Emi owụt se iditịbede inọ mbon emi ẹmende n̄kpọ emi Abasi anamde ẹdọhọ ke Satan akam anam!

Kpep N̄kpọ En̄wen

Christ Edi Odudu Abasi

Mme utịben̄kpọ Jesus ama ọfọn ye mme owo ke Israel, onyụn̄ owụt se enye edinamde inọ mme owo ke ini iso.