Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 20

Udiana Utịben̄kpọ ke Cana

Udiana Utịben̄kpọ ke Cana

MARK 1:14, 15 LUKE 4:14, 15 JOHN 4:43-54

  • JESUS ỌKWỌRỌ KE ‘OBIO UBỌN̄ ABASI KE ASAN̄A EKPERE’

  • ADA KE CANA ANAM IDEM ỌSỌN̄ OWO KE CAPERNAUM

Ke Jesus ama okodu ke Samaria usen iba, enye ọnyọn̄ obio mmọ. Enye ọkwọrọ ikọ ke ediwak ọfiọn̄ ke Judea, edi enye ikaha Galilee ndiduọk odudu, edi aka nditọn̄ọ ata akamba utom ke ebiet emi enye okokponde. Enye ọfiọk ke mbon edem mmimọ ididaha imọ ke n̄kpọ. N̄kọ enye akakam ọdọhọ ke “prọfet inyeneke ukpono ke obio emana esie.” (John 4:44) Utu ke mbet esie ndidu ye enye, mmọ ẹfiak ẹnyọn̄ ẹbịne mbonufọk mmọ man ẹkenam utom oro mmọ ẹkesinamde.

Nso etop ke Jesus ọtọn̄ọ ndikwọrọ? Enye ọdọhọ mmọ ete: “Obio ubọn̄ Abasi . . . asan̄a ekpere. Mbufo ẹkabade esịt ẹnyụn̄ ẹbuọt idem ke eti mbụk.” (Mark 1:15) Ndi mme owo ẹkpan̄ utọn̄ ẹnọ enye? Edi akpanikọ ke ediwak mbon Galilee ẹkpan̄ utọn̄ ẹnọ enye ẹnyụn̄ ẹkpono enye. Idịghe se enye ọkwọrọde emi kpọt anam mmọ ẹnam n̄kpọ ntem, mmọ ẹkpono enye koro ndusụk mmọ ẹma ẹkụt ikpọ utịben̄kpọ emi enye akanamde ke Jerusalem ke ini Passover ke ọfiọn̄ ifan̄ emi ẹkebede.—John 2:23.

M̀mọ̀n̄ ke Galilee ke Jesus ọtọn̄ọ utom esie? Etie nte edi ke Cana ke ebiet emi enye akanamde mmọn̄ akabade wine ke itie usọrọ ndọ. Ke adan̄aemi Jesus odude ke Cana isan̄ emi, enye okop ke enyene ekpri eyen emi ọdọn̄ọde ekpere n̄kpa. Enye edi eyen asan̄autom Edidem Herod Antipas. Edidem Herod emi edisịbe John Andinịm Owo Baptism itọn̄ nte ini akade. Asan̄autom emi okop ke Jesus oto Judea edi Cana. Ntre, enye oto ufọk esie ke Capernaum ediyom Jesus ke Cana. Asan̄autom emi etiede mfụhọ mfụhọ mi ekpe Jesus ubọk ete: “Ọbọn̄, sụhọde di mbemiso ekpri eyen mi akpade.”—John 4:49.

Jesus etịn̄ ikọ emi akpade ete eyen oro idem ete: “Nyọn̄ okwommọ; eyen fo odu uwem.” (John 4:50) Asan̄autom Herod emi enịm se Jesus etịn̄de, onyụn̄ ọwọn̄ọde iso ọnyọn̄ ufọk esie. Ke adan̄aemi enye mîsịmke ufọk kan̄a, ifịn esie ẹfehe ẹdi nditịn̄ se itịbede nnọ enye. Mmọ ẹtịn̄ ẹnọ enye ke idem ọsọn̄ eyen esie! Enye obụp mmọ ini emi idem ọkọsọn̄de eyen imọ man ọdiọn̄ọ m̀mê emi eketịbe ke ini oro Jesus ekenemede nneme ye imọ.

Mmọ ẹdọhọ enye ẹte: “N̄kpọn̄ ke ọyọhọ hour itiaba ke ufiopidem oro ọkọkpọn̄ enye.”—John 4:52.

Asan̄autom oro eti ke ini oro ke Jesus ọkọdọhọ imọ ete: “Eyen fo odu uwem.” Ke oro ebede, asan̄autom emi ekedide imọ owo, ye ofụri ufọk esie ye ifịn esie ẹkabade mbet Christ.

Utịben̄kpọ iba ke Jesus anam emi ke Cana; akpa, enye ama anam mmọn̄ akabade wine, ndien idahaemi, enye odu ke ebiet oro oyomde usụn̄ ke n̄kpọ nte itiat 16 anam idem ọsọn̄ ekpri eyen. Idịghe n̄kukụre utịben̄kpọ emi Jesus anamde edi emi. Edi utịben̄kpọ enye emi owụt ke Jesus afiak edi Galilee nte ata prọfet Abasi. Edi ndi ‘mbon obio emana esie ẹyekpono enye nte prọfet’?

Iyọfiọk emi ke ini inemede se itịbede ke ini Jesus esịmde Nazareth. Nso iditịbe inọ enye do?