Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 55

Ikọ Jesus Akpa Ediwak Owo Idem

Ikọ Jesus Akpa Ediwak Owo Idem

JOHN 6:48-71

  • NDITA OBỤKIDEM JESUS NNYỤN̄ N̄N̄WỌN̄ IYỊP ESIE

  • EDIWAK OWO ẸTRE NDIDI MBET ESIE

Jesus ekpep mme owo ke synagogue emi odude ke Capernaum ete ke imọ idi ata uyo emi otode heaven. Etie nte se enye etịn̄de emi onyụn̄ edi ukem ye se enye eketịn̄de ye mbon oro ẹketade uyo ye iyak emi enye ọkọnọde ke n̄kan̄ edem usiahautịn Inyan̄ Galilee.

Jesus aka iso ke nneme esie ete: “Mme ete ete mbufo ẹma ẹdia manna ke wilderness ẹnyụn̄ ẹkpan̄a.” Enye adian do ete: “Ami ndi odu-uwem uyo emi okotode heaven osụhọde edi; edieke owo ekededi atade uyo emi enye oyodu uwem ke nsinsi; ke akpanikọ, uyo eke ndinọde edi obụkidem mi man ererimbot odu uwem.”—John 6:48-51.

N̄kpọ nte isua iba ke edem, enye ama ọdọhọ Nicodemus ete ke Abasi ama ererimbot tutu enye ọnọ Eyen esie edinyan̄a mme owo. Idahaemi Jesus etịn̄ ntak emi anade ẹta ikpọkidem imọ, oro edi, ẹbuọt idem ke uwa emi imọ idiwade. Se anade owo anam man enye enyene nsinsi uwem edi emi.

Edi mme owo inyịmeke se Jesus etịn̄de emi. Mmọ ẹbụp ẹte: “Didie ke owo emi ekeme ndinọ nnyịn obụkidem esie ita?” (John 6:52) Jesus iyomke mmọ ẹkere ke imọ idọhọ ke ana mmọ ẹta ata obụkidem imọ, edi enye oyom mmọ ẹdiọn̄ọ se ikọ imọ ọwọrọde. Se enye afiakde etịn̄ adian do anam idiọn̄ọ emi.

Enye ọdọhọ ete: “Ibọhọke mbufo ẹta obụkidem Eyen owo ẹnyụn̄ ẹn̄wọn̄ iyịp esie, mbufo inyeneke uwem ke esịt mbufo. Owo eke atade obụkidem mi onyụn̄ ọn̄wọn̄de iyịp mi enyene nsinsi uwem, . . . koro obụkidem mi edi ata udia, iyịp mi onyụn̄ edi ata edin̄wọn̄ n̄kpọ. Owo eke atade obụkidem mi onyụn̄ ọn̄wọn̄de iyịp mi abuana n̄kpọ ye ami.”—John 6:53-56.

Kere nte utọ ikọ emi etekde mme Jew oro esịt. Ekeme ndidi mmọ ẹkere ke Jesus oyom mmọ ẹsita owo m̀mê ẹbiat ewụhọ emi Abasi okowụkde mmọ aban̄a iyịp. (Genesis 9:4; Leviticus 17:10, 11) Edi Jesus idọhọke ẹta ata obụkidem imọ m̀mê ẹn̄wọn̄ ata iyịp imọ. Ikọ esie ọwọrọ ke ana kpukpru mbon emi ẹyomde ndinyene nsinsi uwem ẹbuọt idem ke uwa emi enye oyomde ndida mfọnmma obụkidem esie n̄wa ye iyịp emi enye oyomde ndiduọk. Edi n̄kpọ emi isụk in̄wan̄ake ediwak mbet esie. Ndusụk mmọ ẹdọhọ ẹte: “Ikọ emi odoro owo ndidien; anie ekeme ndikpan̄ utọn̄?”—John 6:60.

Sia Jesus ọdiọn̄ọde ke ndusụk mbet imọ ke ẹkụni ẹban̄a n̄kpọ emi, enye obụp ete: “Nte emi anam mbufo ẹtuak ukot ẹduọn̄ọ? Nso, ndien, edieke mbufo ẹkpekụtde nte Eyen owo ọdọkde aka ebiet emi enye ekebemde iso odu? . . . Mme ikọ emi ntịn̄de nnọ mbufo ẹdi spirit ẹnyụn̄ ẹdi uwem. Edi odu ndusụk ke otu mbufo emi mînịmke ke akpanikọ.” Emi anam ediwak mbet esie ẹdaha ẹnyọn̄ọ, mmọ inyụn̄ itieneke enye aba.—John 6:61-64.

Ntem Jesus obụp apostle 12 oro ete: “Nte mbufo n̄ko ẹmeyom nditiene nnyọn̄?” Peter ọbọrọ enye ete: “Ọbọn̄, nnyịn idinyọn̄ ibịne anie? Afo enyene ikọ nsinsi uwem; ndien nnyịn imenịm ke akpanikọ, imonyụn̄ idi idifiọk ite ke afo edi Edisana Owo Abasi.” (John 6:67-69) Ikọ emi enen̄ede owụt nte mmọ ẹmade Jesus sia ke ini Peter etịn̄de ikọ emi, se Jesus etịn̄de ikenen̄ekede in̄wan̄a mmọ.

Se Peter etịn̄de enem Jesus, edi Jesus ọdọhọ mmọ ete: “Nte ami n̄kemekke mbufo owo duopeba? Edi owo kiet ke otu mbufo edi owo edidọk.” (John 6:70) Judas Iscariot ke Jesus etịn̄ aban̄a oro. Etie nte ini emi ke Jesus okụt ke Judas ọtọn̄ọ idiọk uwem.

Kpa ye oro, esịt osụk enenem Jesus ndikụt nte Peter ye mme mbet eken ẹkade iso ẹsan̄a ye enye ẹnyụn̄ ẹtienede enye ẹkwọrọ ikọ man ẹnyan̄a mbon en̄wen.