Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 21

Jesus Aka Synagogue ke Nazareth

Jesus Aka Synagogue ke Nazareth

LUKE 4:16-31

  • JESUS OKOT N̄WED ISAIAH

  • MBON NAZARETH ẸDOMO NDIWOT ENYE

Nazareth etie urua urua! Mme owo ẹkediọn̄ọ Jesus nte anamusọ eto mbemiso enye akakade ebịne John ete enịm imọ baptism ke n̄kpọ nte isua kiet emi ekebede. Edi idahaemi, ẹdiọn̄ọ enye nte anam utịben̄kpọ. Mbon edem mmọ ke ẹtie ẹbet ndikụt mme utịben̄kpọ esie.

Mmọ ẹnen̄ede ẹkere ke Jesus ọmọn̄ anam utịben̄kpọ ke ini enye akade synagogue nte ido esie esidide. Ke synagogue oro, ẹbọn̄ akam, ẹkot n̄wed Moses, nte ẹsinyụn̄ ẹnamde “ke mme synagogue ke kpukpru sabbath.” (Utom 15:21) Ẹkot mme n̄wed eken emi mme prọfet ẹkewetde n̄ko. Anaedi Jesus ọdiọn̄ọ ediwak owo ke synagogue oro ke ini enye adahade ada man okot n̄wed sia enye esidụk synagogue emi ke ediwak isua. Ẹnọ enye n̄wed prọfet Isaiah. Enye okụt ebiet emi etịn̄de n̄kpọ aban̄a Enye emi Jehovah eyetde aran ke spirit esie. Ke Bible nnyịn, itien̄wed oro odu ke Isaiah 61:1, 2.

Jesus okot aban̄a nte Enye emi ẹketịn̄de ẹban̄a mi ọkwọrọde ubọhọ-ufụn ọnọ mbuotekọn̄, ọkwọrọ edikụt usụn̄ ọnọ mme nnan, onyụn̄ ọkwọrọ isua mfọnido Jehovah. Jesus ayak n̄wed oro ọnọ asan̄autom onyụn̄ osụhọde etetie. Kpukpru owo ẹwụk enyịn ẹse enye. Enye ọtọn̄ọ nditịn̄ ediwak ikọ, ẹsịnede ọkpọikọ emi: “Mfịn emi itie N̄wed Abasi oro mbufo ẹsụk ẹkopde do omosu.”—Luke 4:21.

Idem akpa mmọ ndikop “ndinem ikọ eke ẹwọn̄ọde enye ke inua, ndien mmọ ẹdọhọ ẹte: ‘Nte emi idịghe eyen Joseph?’” Edi ke ini Jesus ọfiọkde ke mmọ ẹyom imọ inam mme utịben̄kpọ oro imọ ikanamde ke ebiet en̄wen, enye ọdọhọ mmọ ete: “Mmọfiọk ke mbufo ẹmọn̄ ẹtop n̄ke emi ẹban̄a mi, ‘Abiausọbọ, kọk idemfo,’ ẹnyụn̄ ẹdọhọ ẹte, mme n̄kpọ oro nnyịn ikokopde nte ẹtịbede ke Capernaum, nam mi n̄ko ke obio emana fo.” (Luke 4:22, 23) Mbon edem mme Jesus ẹkere ke enye akpakam ọtọn̄ọ ndinam mme utịben̄kpọ esie mi ke obio esie man mmọ ẹkpebọ ufọn. Ntem, ekeme ndidi mmọ ẹkere ke Jesus otụk mmimọ.

Jesus ọfiọk se mmọ ẹkerede, ntre enye etịn̄ aban̄a ndusụk n̄kpọ oro ẹketịbede ke Israel. Enye ọdọhọ mmọ ete ke ediwak ebeakpa ẹma ẹdu ke Israel ke eyo Elijah, edi ke owo ikọdọn̄ke Elijah aka ebịne owo mmọ ndomokiet. Utu ke oro, enye akaka ebịne ebeakpa emi mîkedịghe eyen Israel ke Zarephath, emi ekperede Sidon, ndien do ke enye akanam utịben̄kpọ. (1 Ndidem 17:8-16) N̄ko, ke mbon akpamfia ẹma ẹdu ke Israel ke eyo Elisha, edi ke Naaman owo Syria kpọt ke enye akanam asana.—2 Ndidem 5:1, 8-14.

Nso ke mbon obio mme Jesus ẹnam ke ini mmọ ẹkopde mbụk emi owụtde adan̄a nte mmọ ẹnanade mbuọtidem? Mbon emi ẹkedude ke synagogue ẹyat esịt etieti, ẹdaha ke enyọn̄ ẹbịn enye ẹsio ke obio, ẹnyụn̄ ẹda enye ẹka ibuot obot emi ẹbọpde obio mmọ ẹdori, man ẹsio enye ẹduọk ke isọn̄. Edi enye asan̄a ke ufọt mmọ ebe ọnyọn̄ esiemmọ. Ekem Jesus osụhọde aka Capernaum emi odude ekpere Inyan̄ Galilee.