Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 45

Jesus Okop Odudu Akan Ediwak Demon

Jesus Okop Odudu Akan Ediwak Demon

MATTHEW 8:28-34 MARK 5:1-20 LUKE 8:26-39

  • JESUS EBỊN MME DEMON ỌDỌN̄ KE IDEM EDI

Ke ini mbet Jesus ẹdide ẹdibehe ke esụk ke ẹma ẹkebọhọ ọkpọsọn̄ oyobio oro, se mmọ ẹkụtde akpa mmọ idem. Owo iba emi ẹnyenede demon ẹnyụn̄ ẹnamde n̄kpọ idat idat ẹwọn̄ọ ke itie udi oro ekperede ẹfehe ẹbịne Jesus! Mbụk emi aban̄a kiet ke otu mmọ sia etie nte enye adama idat akan, onyụn̄ etie nte mme demon ẹsịne enye ke idem ẹbịghi ẹkan owo enye eken.

Owo emi esisan̄a iferi onyụn̄ enyene mbọm tutu. Okoneyo ye uwemeyo enye ‘esifiori n̄kpo ke mme udi ye ke mme obot onyụn̄ ekpen̄e idem ke itiat.’ (Mark 5:5) Enye ọdiọk ibuot tutu ndịk edinanam mme owo ndisan̄a ke usụn̄ oro mbe. Ẹsidomo ndibọp enye edi enye esikịbi n̄kpọkọbi emi ẹdade ẹbọp enye onyụn̄ obụn̄ mme ebuka ke ukot esie efep. Owo ndomokiet ikemeke ndibọp enye nnịm.

Ete oro asan̄a edisịm Jesus onyụn̄ ọduọ enye ke ukot. Mme demon emi ẹdọn̄ọde enye ke idem ẹnam enye ofiori ete: “Nsan̄a nso ye afo, Jesus, Eyen Ata Edikon̄ Abasi? Mmọsọn̄ọ nda enyịn̄ Abasi n̄kpe fi ubọk nte okûtụhọde mi.” Jesus anam n̄kpọ ndiwụt ke imenyene odudu ikan mme demon. Enye aduat spirit oro ete: “Afo ndedehe spirit, wọrọ owo emi ke idem.”—Mark 5:7, 8.

Ediwak demon ẹdọn̄ọ ete emi ke idem. Ke ini Jesus obụpde enye ete, “Afo ekere didie?” enye ọbọrọ: “Ami n̄kere Udịm, koro nnyịn imawak.” (Mark 5:9) Ẹsibahade mbonekọn̄ Rome ẹdọn̄ ke udịm ke udịm, ndien ediwak tọsịn mbonekọn̄ ẹsidu ke udịm kiet. Emi ọwọrọ ke mme demon emi ẹdọn̄ọde ete emi ke idem ẹwak etieti, onyụn̄ enenem mmọ ndikụt nte enye ọbọde ufen. Mmọ ẹkpe Jesus ubọk “ẹte okûwụk mmimọ iwọn̄ọ ikodụk editụn̄ọ ukpe.” Mmọ ẹdiọn̄ọ se idiwọrọde mmimọ ye Satan eteufọk mmimọ ke ini iso.—Luke 8:31.

N̄kpọ nte edi 2,000 ke ẹda ke obot oro ẹdia n̄kpọ. Ibet Moses ọkọdọhọ ke edi edi ndedehe unam ndien ikpanaha eyen Jew ndomokiet enyene. Mme demon oro ẹdọhọ ẹte: “Sion̄o nnyịn dọn̄ ke mme edi, man ikodụk mmọ idem idọn̄ọ.” (Mark 5:12) Jesus ọdọhọ mmọ ẹka, ndien mmọ ẹka ẹkedụk idem edi oro ẹdọn̄ọ. Edi mmọ ẹdodụk, kpukpru edi 2,000 oro ẹfen̄e ẹkeduọn̄ọ ẹdọn̄ọ ke inyan̄ ẹkpan̄a.

Ke ini mme ekpeme edi oro ẹkụtde se itịbede, mmọ ẹfehe ẹketịn̄ ẹnọ mme owo ke nsio nsio obio ke edem oro. Mbon obio oro ẹwọn̄ọ ẹdi ndise se itịbede. Ke ini mmọ ẹdide ẹdisịm, mmọ ẹkụt ke ibuot ọfọn ete emi mme demon ẹkewọn̄ọde ke idem, ke enye inyụn̄ isịnke ntịme aba. Enye akam esịne ọfọn̄ onyụn̄ etie ke isọn̄ ekpere Jesus!

Ndịk anam mbon emi ẹkopde n̄kpọ emi ye mbon emi ẹdade enyịn mmọ ẹkụt ete oro, mmọ ẹnyụn̄ ẹkere m̀mê nso n̄kpọ en̄wen idinyụn̄ ifiak itịbe do. Ntre mmọ ẹkpe Jesus ubọk ete ọkpọn̄ edem mmimọ. Ke ini Jesus odụkde ubom oyom ndinyọn̄, ete emi enye okosion̄ode demon ke idem ekpe enye ubọk ete ayak imọ itiene enye. Edi Jesus ọdọhọ enye ete: “Nyọn̄ ufọk bịne mme iman fo, nyụn̄ tịn̄ nọ mmọ kpukpru n̄kpọ eke Jehovah anamde ọnọ fi ye nte enye akatuade fi mbọm.”—Mark 5:19.

Jesus esiwak ndidọhọ mbon emi enye ọkọkde udọn̄ọ ete ẹkûtịn̄ unọ owo sia enye iyomke mme owo ẹda mbụk emi mme owo ẹbụkde ẹdiọn̄ọ imọ. Edi eke ete emi idịghe ntre sia mbon emi ẹkụtde nte enye etiede idahaemi ẹdiọn̄ọ ke Jesus enyene odudu etieti, enye eyekeme n̄ko ndikwọrọ ikọ nnọ mbon emi Jesus mîdikemeke ndikwọrọ nnọ. Edieke owo mîtịn̄ke akpanikọ iban̄a se iketịbede inọ mme edi oro, ete emi eyetịn̄ se iketịbede. Ntre, ete emi ọnyọn̄ eketịn̄ se Jesus akanamde ọnọ imọ ke ofụri Decapolis.

Kpep N̄kpọ En̄wen

Ndi Mme Demon Ẹdu?

Mmanie ẹdi mme demon? Mmọ ẹto m̀mọ̀n̄?