Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 29

Ndi Ọfọn Ndinam Eti N̄kpọ ke Sabbath?

Ndi Ọfọn Ndinam Eti N̄kpọ ke Sabbath?

JOHN 5:1-16

  • JESUS ỌKWỌRỌ IKỌ KE JUDEA

  • ỌKỌK OWO UDỌN̄Ọ KE MBEN N̄KPỌDIỌHỌ MMỌN̄

Akwa utom oro Jesus anamde ke Galilee enyene ufọn etieti. Edi idịghe Galilee kpọt ke Jesus ekenyene ke ekikere ke ini enye ọkọdọhọde ete: “Nnyene nditan̄a eti mbụk obio ubọn̄ Abasi nnọ mme obio en̄wen n̄ko.” Ntem, enye “asan̄a ọkwọrọ ikọ ke mme synagogue Judea.” (Luke 4:43, 44) Ata nnennen n̄kpọ ke enye anam emi, sia ndaeyo edi emi, ndien ibịghike ini usọrọ ke Jerusalem ọmọn̄ edikem.

Mme andiwet Gospel inen̄ekede itịn̄ n̄kpọ iban̄a nte utom Jesus eketiede ke Judea nte ẹtịn̄de ẹban̄a eke Galilee. Okposụkedi emi mme owo mîkamaha ndinen̄ede n̄kpan̄ utọn̄ nnọ Jesus ke Judea, oro ikpanke enye ndikwọrọ ikọ m̀mê ndinam nti n̄kpọ ke ebiet ekededi oro enye odude.

Ibịghike, Jesus ọmọn̄ ọdọk aka Jerusalem emi edide akpan obio ke Judea man okodụk Passover eke isua 31 eyo Christ. Akamba mmọn̄ kiet odu ke n̄kan̄ temple emi ekperede Inuaotop Erọn̄ emi ẹkotde Bethzatha. Mme owo ẹsiwak etieti ke mben mmọn̄ emi. Ediwak mbon udọn̄ọ, mme nnan, ye mbụn̄ọ ẹsidi ẹditie ke mben mmọn̄ emi n̄ko. Ntak emi mme owo ẹsiwakde ntem mi? Sia ediwak mbon udọn̄ọ ẹkere ke ẹkeme ndinam idem ọsọn̄ mmimọ edieke idụkde mmọn̄ emi ke ini ẹtịmerede enye.

Usen Sabbath edi emi, Jesus okụt ọbọn̄ kiet emi ọdọn̄ọde ke isua 38 ke mben mmọn̄ oro. Jesus obụp enye ete: “Ndi omoyom ndikop nsọn̄idem?” Enye ọbọrọ Jesus ete: “Ete, nnyeneke owo eke emende mi esịn ke n̄kpọdiọhọ mmọn̄ ke ini ẹtịmerede mmọn̄; edi ke ini ndide owo efen ebem mi iso osụhọde odụk.”—John 5:6, 7.

Jesus etịn̄ ikọ emi anade edi ama akpa ọbọn̄ oro idem ye owo en̄wen ekededi emi okopde ete: “Daha ke enyọn̄, men n̄kpọnna fo nyụn̄ san̄a.” (John 5:8) Ọbọn̄ mbon onyụn̄ anam ntre. Idem ọsọn̄ ọbọn̄ oro kpa idahaoro, enye emen n̄kpọnna esie asan̄a.

Utu ke ndinem esịt mban̄a utịben̄kpọ emi, mme Jew ẹtịn̄ n̄kpọ oro etiede nte ẹbiere ikpe ẹnọ enye ẹte: “Mfịn edi Sabbath, ibet inyụn̄ inyịmeke afo akama n̄kpọnna.” Edi ọbọn̄ oro ọbọrọ mmọ ete: “Owo emi akanamde mi n̄kop nsọn̄idem ọkọdọhọ mi ete, ‘Men n̄kpọnna fo nyụn̄ san̄a.’” (John 5:10, 11) Ndi ekpenịm ke mme Jew ẹkpekụt ndudue ẹnọ owo emi anamde idem ọsọn̄ owo ke usen Sabbath?

Mmọ ẹbụp ọbọn̄ oro ẹte: “Anie owo ọkọdọhọ fi ete, ‘Men enye nyụn̄ san̄a’?” Ntak emi mmọ ẹbụpde enye utọ mbụme oro? Koro “Jesus ama ọkpọn̄ do,” ọbọn̄ oro inyụn̄ idiọn̄ọke enyịn̄ esie. (John 5:12, 13) Edi ọbọn̄ oro ayafiak okụt Jesus. Nte ini akade, se iketịbede edi oro, enye edifiọk ke owo emi akanamde idem ọsọn̄ imọ ke n̄kpọdiọhọ mmọn̄ oro ekere Jesus.

Ọbọn̄ oro ẹkenamde idem ọsọn̄ edikụt mme Jew emi ẹkebụpde enye owo oro akanamde idem ọsọn̄ enye. Enye ọdọhọ mmọ ke edi Jesus. Ke ini mme Jew ẹkopde emi, mmọ ẹbịne Jesus. Ntak-a? Ndi mmọ ẹka man ẹkekop nte Jesus akasan̄ade enyene ukeme ndinam utọ utịben̄kpọ oro. Baba-o! Mmọ ẹka man ẹkekụt ndudue ẹnọ Jesus ke emi enye anamde eti n̄kpọ ke Sabbath. Ndien mmọ ẹtọn̄ọ ndikọbọ Jesus!