Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 31

Mbet Jesus Ẹkịbi Wheat ke Sabbath

Mbet Jesus Ẹkịbi Wheat ke Sabbath

MATTHEW 12:1-8 MARK 2:23-28 LUKE 6:1-5

  • MBET JESUS ẸKỊBI WHEAT KE SABBATH

  • JESUS EDI “ỌBỌN̄ SABBATH”

Jesus ye mbet esie ẹdọk enyọn̄-enyọn̄ ẹka Galilee. Ini ndaeyo edi emi, wheat osion̄o idem. Biọn̄ ọdọn̄ mbet Jesus, mmọ ẹkịbi wheat ẹta. Edi usen Sabbath, mme Pharisee ẹkụt se mbet ẹnamde oro.

N̄kọ emeti ke ndondo emi ke mme Jew ke Jerusalem ẹyom ndiwot Jesus ke ntak emi mmọ ẹdọhọde ke enye abiat ibet Sabbath. Idahaemi mme Pharisee ẹtọn̄ọ mfịna ke ntak emi mbet Jesus ẹkịbide wheat ẹta. Mmọ ẹdọhọ Jesus ẹte: “Sese! Mme mbet fo ke ẹnam se ibet mînyịmeke ẹnam ke sabbath.”—Matthew 12:2.

Mme Pharisee emi ẹdọhọ ke owo ndikịbi wheat mfiak ke ubọk etie nte owo ndikpen̄e wheat nnyụn̄ nsak. (Exodus 34:21) Se mme Pharisee ẹkotde utom ke usen Sabbath anam Sabbath edikakak mme owo, edi akana Sabbath esidi usen inemesịt, usen emi ẹdade ẹtuak ibuot ẹnọ Abasi. Jesus ọnọ mmọ mme uwụtn̄kpọ emi owụtde ke idịghe nte Jehovah Abasi ọkọdọhọde ẹnịm Sabbath edi oro.

Uwụtn̄kpọ kiet emi Jesus ọnọde mmọ aban̄a David ye mmọ emi ẹkedude ye enye. Ke ini biọn̄ ọkọdọn̄de David ye mbon oro ẹkedude ye enye, mmọ ẹma ẹwaha ufọk Abasi ẹbọ uyo iso Abasi ẹta. Ẹkenọ mmọ uyo emi ẹkemende ẹfep ke iso Jehovah ẹnịm obufa uyo. Mme oku kpọt ke ẹkesinyịme ẹta uyo oro ẹkemende do ẹfep. Edi ke ini David ye mmọ emi ẹdude ye enye ẹketade uyo oro ke ntak ọbiọn̄, owo ikowotke mmọ.—Leviticus 24:5-9; 1 Samuel 21:1-6.

Jesus ọnọ mmọ ọyọhọ uwụtn̄kpọ iba ete: “Nte mbufo ikotke ke Ibet ite ke usen sabbath mme  oku emi ẹdude ke temple ẹsida sabbath nte se mîdịghe edisana ndien inyeneke ndudue?” Ikọ esie ọwọrọ ke mme oku ẹsiwot unam ẹnam uwa ẹnyụn̄ ẹnam mme utom en̄wen ke temple ke usen Sabbath. Jesus ọdọhọ mmọ ete: “Edi ndọhọ mbufo nte ke owo emi okponde akan temple odu mi.”—Matthew 12:5, 6; Numbers 28:9.

Jesus asiak itie N̄wed Abasi en̄wen man ikọ esie an̄wan̄a mmọ, ete: “Edieke edide mbufo ẹma ẹfiọk se emi ọwọrọde, ‘Nyom mbọm, idịghe uwa,’ mbufo ikpobiomke mmọ eke mîduehe. . . . Eyen owo edi Ọbọn̄ sabbath.” Jesus etịn̄ aban̄a emem emem ukara esie emi edidide ke tọsịn isua.—Matthew 12:7, 8; Hosea 6:6.

Satan esịn mme owo ke ata idiọk ufụn ke ediwak isua idahaemi, ekọn̄ ye afai ọyọyọhọ kpukpru ebiet. Ukara Christ, oro edi, akwa Sabbath iditiehe ntem. Iyenyene ediwak isua ndida nduọk odudu nte ekemde nnyịn ke idem!