Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 22

Mbet Inan̄ Ẹdidi Mme Ọkọ Owo

Mbet Inan̄ Ẹdidi Mme Ọkọ Owo

MATTHEW 4:13-22 MARK 1:16-20 LUKE 5:1-11

  • JESUS OKOT MME MBET ORO ẸDISAN̄ADE YE ENYE KPUKPRU INI

  • MME ỌKỌIYAK ẸKABADE MME ỌKỌ OWO

Ke mbon Nazareth ẹma ẹkedomo ndiwot Jesus edi mîkemeke, enye ọkpọn̄ do aka Capernaum emi ekperede Inyan̄ Galilee, emi ẹdiọn̄ọde n̄ko nte “n̄kpọdiọhọ mmọn̄ Gennesaret.” (Luke 5:1) Emi osu prọfesi oro ẹkewetde ke n̄wed Isaiah nte ke mbon Galilee emi ẹdụn̄ọde ke usụn̄ inyan̄ ẹyekụt akwa un̄wana.—Isaiah 9:1, 2.

Mi ke Galilee Jesus aka iso ndikwọrọ ete ke “obio ubọn̄ heaven ke asan̄a ekpere.” (Matthew 4:17) Jesus okụt owo inan̄ emi ẹdide mbet esie. Mmọ ẹma ẹsasan̄a ye enye, edi ke ini mmọ ẹtode Judea ẹnyọn̄ ẹdi, mmọ ẹfiak ẹtọn̄ọ utom ukọiyak emi mmọ ẹkesinamde. (John 1:35-42) Edi idahaemi ana mmọ ẹsan̄a ye Jesus kpukpru ini man enye ekpep mmọ nte ẹdinamde utom ukwọrọikọ ke Jesus ama akpa.

Nte Jesus asan̄ade ke mbeninyan̄ oro, enye okụt Simon Peter, ye Andrew eyeneka esie, ye mme ufan mmọ nte ẹsụk ẹyetde iyịre mmọ. Jesus odụk ubom Peter onyụn̄ ọdọhọ enye awat ọkpọn̄ obot ekpri. Ke mmọ ẹma ẹkedụk mmọn̄, Jesus osụhọde etetie onyụn̄ ọtọn̄ọ ndikpep otuowo oro ẹbohode ke mbenesụk oro n̄kpọ mban̄a Obio Ubọn̄ Abasi.

Ke oro ebede, Jesus ọdọhọ Peter ete: “Ẹwat ẹka udem, ẹnyụn̄ ẹkeduọn̄ọ iyịre man ẹmụm iyak.” Edi Peter ọbọrọ ete: “Andikpep, nnyịn ima ikpa utom ofụri okoneyo inyụn̄ imụmke baba n̄kpọ kiet, edi ke uyo fo nyọduọk iyịre.”—Luke 5:4, 5.

Mmọ ẹduọk iyịre mmọ ẹnyụn̄ ẹmụm ata ediwak iyak tutu iyịre mmọ ọtọn̄ọ ndiwaha! Ntre mmọ ẹsọsọp ẹnam idiọn̄ọ ẹkot nsan̄a mmọ ẹte ẹdin̄wam mmimọ. Ibịghike, iyak ọyọhọ ubom mbiba emi tutu mmọ ẹtọn̄ọ ndisịp. Ke ini Peter okụtde emi, enye ọduọ Jesus ke iso onyụn̄ ọdọhọ enye ete: “Daha kpọn̄ mi, Ọbọn̄, koro ami ndide anamidiọk.” Jesus ọdọhọ enye ete: “Kûfehe ndịk. Ọtọn̄ọde ke emi afo edikọ owo ye uwem.”—Luke 5:8, 10.

Jesus ọdọhọ Peter ye Andrew ete: “Ẹtiene mi, ndien nyanam mbufo ẹdi mme ọkọ owo.” (Matthew 4:19) Enye okot mme ọkọiyak iba en̄wen, oro edi, James ye John, nditọ Zebedee, ẹte ẹtiene imọ. Mmọ n̄ko ẹtiene enye ye unana ubiatini. Ntem, owo inan̄ emi ẹkpọn̄ mbubehe iyak oro mmọ ẹkesinamde, ẹnyụn̄ ẹkabade ẹdi mme akpa mbet oro ẹdisan̄ade ye Jesus kpukpru ini.

Kpep N̄kpọ En̄wen

Kpebe Mbuọtidem Mmọ

Peter Fought Against Fear and Doubt

Doubt can be a powerful, destructive force. But Peter overcame his fear and doubts about following Jesus.