Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 50

Jesus Etịm Mbet Idem Ndikwọrọ Ikọ Kpa ye Oro Ẹdikọbọde Mmọ

Jesus Etịm Mbet Idem Ndikwọrọ Ikọ Kpa ye Oro Ẹdikọbọde Mmọ

MATTHEW 10:16–11:1 MARK 6:12, 13 LUKE 9:6

  • JESUS ỌNỌ MME APOSTLE UKPEP ONYỤN̄ ỌDỌN̄ MMỌ ẸKEKWỌRỌ IKỌ

Jesus ekpep mme apostle esie nte ẹkpekwọrọde ikọ onyụn̄ ọdọn̄ mmọ ẹsan̄a iba iba ẹkekwọrọ. Edi enye itreke do. Enye etịn̄ n̄ko se mbon oro ẹsuade mmọ ẹdinamde: “Sese! Ami mmosio mbufo ndọn̄ nte erọn̄ ke ufọt mme wolf . . . Ẹkpeme idem ye mme owo; koro mmọ ẹyeda mbufo ẹka mme esopikpe n̄kann̄kụk, ẹyenyụn̄ ẹmia mbufo ke mme synagogue mmọ. Kamse, ẹyedụri mbufo ẹda ẹka iso mme andikara ye iso ndidem ke ntak mi.”—Matthew 10:16-18.

Okposụkedi emi Jesus ọdọhọde ke ẹkeme ndikọbọ mbet imọ idiọk idiọk, enye ọdọhọ mmọ ete: “Ke ini ẹyakde mbufo ẹnọ, ẹkûtịmede esịt ẹte m̀mê mmimọ iditịn̄ nso; koro ẹyenọ mbufo se ẹditịn̄de kpa ke hour oro; koro idịghe mbufo ẹtịn̄ ikọ, edi edi spirit Ete mbufo ada mbufo etịn̄ ikọ.” Jesus aka iso ọdọhọ mmọ ete: “Eyeneka ayada eyeneka ọnọ n̄kpa, ete oyonyụn̄ ada eyen esie ọnọ, ndien nditọ ẹyedaha ẹda ẹn̄wana ye ete ye eka ẹnyụn̄ ẹnam ẹwot mmọ. Mbufo ẹyenyụn̄ ẹdi mbon emi kpukpru owo ẹsuade ke ntak enyịn̄ mi; edi ẹyenyan̄a owo eke ediyọde tutu esịm utịt.”—Matthew 10:19-22.

Sia utom ukwọrọikọ edide ata akpan utom, Jesus etịn̄ ke ana mme mbet ẹnam n̄kpọ ye eti ibuot man ẹkeme ndika iso nnam utom mmọ. Enye ọdọhọ ete: “Ke ini mmọ ẹkọbọde mbufo ke obio kiet, ẹfehe ẹka obio efen; koro ke akpanikọ ke ndọhọ mbufo nte, mbufo idisan̄ake ikanade ofụri obio ke n̄kann̄kụk Israel mbemiso Eyen owo edide.”—Matthew 10:23.

Jesus ọnọ apostle 12 oro item, etịn̄ se iditịbede inọ mmọ, onyụn̄ ọsọn̄ọ mmọ idem. Kpukpru se enye anamde emi ọnọ mmọ ọfọn etieti. Se enye eketịn̄de ọnọ mme apostle esie ebehe nnyịn emi iditienede inam utom emi n̄ko ke Jesus ama akakpa onyụn̄ eset. Idịghe mme apostle kpọt ke ẹdisua, ẹyesua nnyịn n̄ko. Idiọn̄ọ emi sia enye ọdọhọ ke mbet esie ẹdidi “mbon emi kpukpru owo ẹsuade.” Bible idọhọke ke ẹma ẹda mme apostle ẹka iso mme andikara ye iso ndidem ke ekpri ini emi mmọ ẹkekwọrọde ikọ mi ke Galilee, owo inyụn̄ itịn̄ke ke mme iman mmọ ẹma ẹnam ẹwot mmọ.

Se ikotde emi owụt ke ikọ emi Jesus eketịn̄de ye mbet esie akaban̄a ini iso. Fiak kere ise enye emi enye ọdọhọde ke mbet esie idisan̄ake ikanade ofụri obio ke n̄kann̄kụk Israel “mbemiso Eyen owo edide.” Ikọ esie ọwọrọ ke mbet imọ idinamke utom emi ima mbemiso imọ idi nte Edidem emi Abasi emekde idibiere ikpe inọ mme owo.

Edieke ẹkọbọde mme apostle ke ini mmọ ẹkwọrọde ikọ, ikpanaha idem akpa mmọ sia Jesus ọdọhọ mmọ ete: “Mbet ikponke ikan andikpep enye, ofụn inyụn̄ ikponke ikan ọbọn̄ esie.” Ikọ Jesus an̄wan̄a mmọ. Ẹnam Jesus ediwak n̄kpọ ẹnyụn̄ ẹkọbọ enye ke ndikwọrọ Obio Ubọn̄ Abasi, ntre n̄ko ke ẹdinam ye mme mbet. Edi Jesus ọdọhọ mmọ ete: “Ẹkûfehe mmọ emi ẹwotde ikpọkidem edi mîkemeke ndiwot ukpọn̄; edi ẹkam ẹfehe enye emi ekemede ndisobo ukpọn̄ ye ikpọkidem ke Gehenna.”—Matthew 10:24, 28.

Jesus ama enịm uwụtn̄kpọ ke se enye etịn̄de emi. Enye ama enyịme ẹwot imọ utu ke nditre ndinam n̄kpọ nnọ Jehovah emi enyenede odudu akan owo ekededi. Jehovah Abasi kpọt ekeme ndisobo “ukpọn̄” (ndinam owo okûdu uwem ke nsinsi) m̀mê ndinam enye eset edidu uwem ke nsinsi. Imenịm ke ikọ emi ama ọsọn̄ọ mme apostle idem.

Jesus ada uwụtn̄kpọ kiet etịn̄ nte Abasi amade onyụn̄ esede aban̄a ikọt esie. Enye ọdọhọ ete: “Nte owo inyamke akadan̄abasi iba ke okudọk okụk kiet? Edi baba kiet ke otu mmọ iduọhọ ke isọn̄ ke Ete mbufo mîfiọkke. . . . Ke ntre ẹkûfehe ndịk: Mbufo ẹmesọn̄ urua ẹkan ediwak akadan̄abasi.”—Matthew 10:29, 31.

Etop Obio Ubọn̄ emi mbet Jesus ẹkwọrọde eyesịn ubahade ke ndusụk ufọk; ndusụk owo ẹyema, mbon eken idimaha. Jesus ọdọhọ ete: “Ẹkûkere ẹte n̄kedi ndisịn emem ke isọn̄.” Isimemke utom inọ owo kiet emi ọwọrọde ke ubon edikpep akpanikọ. Jesus ọdọhọ n̄ko ete: “Owo eke amade ete m̀mê eka akan mi idotke ye ami; owo eke onyụn̄ amade eyen esie eren m̀mê eyen esie an̄wan akan mi idotke ye ami.”—Matthew 10:34, 37.

Kpa ye emi, mme owo do emi ẹdimade mbet Jesus. Enye adian do ete: “Owo ekededi eke ọnọde kiet ke otu n̄kpri owo emi cup mbịtmbịt mmọn̄ kiet ọn̄wọn̄ koro enye edide mbet, ndọhọ mbufo ke akpanikọ nte, enye iditreke-tre ndibọ utịp esie.”—Matthew 10:42.

Ke Jesus ama ọkọnọ mme apostle item ama, etịn̄ se iditịbede inọ mmọ, onyụn̄ ọsọn̄ọ mmọ idem, mmọ ẹdaha, “ẹsan̄a to ke obio-in̄wan̄ sịm obio-in̄wan̄ ke ikpehe oro, ẹtan̄a eti mbụk ẹnyụn̄ ẹkọk udọn̄ọ ke kpukpru ebiet.”—Luke 9:6.

Kpep N̄kpọ En̄wen

Yọ Idomo Nyụn̄ Kop Idatesịt!

Kot man ọfiọk se ikan̄wamde Paul ye Silas ẹka iso ẹkop idatesịt kpa ye ukọbọ.