Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 38

John Oyom Jesus Etịn̄ M̀mê Enye Edi Messiah

John Oyom Jesus Etịn̄ M̀mê Enye Edi Messiah

MATTHEW 11:2-15 LUKE 7:18-30

  • JOHN OBỤP M̀MÊ JESUS EDI MESSIAH

  • JESUS OTORO JOHN

John Andinịm Owo Baptism esịne ke ufọk-n̄kpọkọbi ke n̄kpọ nte isua kiet idahaemi. Enye ke okop mme utịben̄kpọ emi Jesus anamde. Kere nte etiede John ke idem ke ini mbet esie ẹtịn̄de ẹnọ enye ke Jesus anam eyen ebeakpa ke Nain eset. Edi kpa ye se John okopde emi, enye oyom Jesus ke idemesie etịn̄ se mme utịben̄kpọ esie ẹdade ẹban̄a. Ntem, enye osio mbet esie iba ọdọn̄ utom. Nso ke enye ọdọn̄ mmọ? Enye oyom mmọ ẹkebụp Jesus ẹte: “Nte afo edi Enye Emi Enyenede Ndidi m̀mê nnyịn ikpodori enyịn ke owo efen?”—Luke 7:19.

Ndi mbụme John emi akpa fi idem? Ke n̄kpọ nte isua iba emi ẹkebede, ke ini enye ekenịmde Jesus baptism, n̄kọ enye ama okụt edisana spirit edide edidoro Jesus ke idem onyụn̄ okop nte Abasi ọdọhọde ke Jesus edi Eyen imọ. Ikpanaha nnyịn idọhọ ke John ọtọn̄ọ ndiyịk m̀mê Jesus akam edi Messiah, sia edieke ekpedide ntre, Jesus ikpotoroke enye kpa ke ebe oro mbet esie ẹdide ẹdibụp enye mbụme do. Edi ntak emi John obụpde utọ mbụme emi edieke enye osụk enịmde ke Jesus edi Messiah?

Ekeme ndidi John oyom Jesus ada inua esie etịn̄ ke imọ idi Messiah. Emi ayanam enye aka iso ọbuọt idem ye Abasi ke adan̄aemi enye osụk ọbọde ufen ke ufọk-n̄kpọkọbi. N̄kpọ en̄wen edi nte ke etie nte enyene ntak en̄wen emi anamde John obụp mbụme emi. John ọfiọk ke mme prọfet Abasi ẹkedọhọ ke Enye emi Abasi Eyetde Aran edidi edidem ye andinyan̄a. Edi n̄kpọ nte ọfiọn̄ ifan̄ ke Jesus ama akana baptism, ẹmụm John ẹsịn ke ufọk-n̄kpọkọbi. Ntem, John oyom ndifiọk m̀mê owo en̄wen eyedi edida itie Jesus, onyụn̄ anam mme n̄kpọ eken emi mme prọfet ẹkedọhọde ke Messiah ayanam.

Utu ke Jesus ndidọhọ mbet John ẹkedọhọ enye ẹte, ‘Ami ndi Messiah nan̄a,’ Jesus anam idem ọsọn̄ mbon oro ẹdọn̄ọde nsio nsio udọn̄ọ man owụt ke imọ ida odudu Abasi inam mme n̄kpọ emi. Ekem enye ọdọhọ mbet John ete: “Ẹka ẹnyụn̄ ẹkebụk se mbufo ẹkopde ẹnyụn̄ ẹkụtde ẹnọ John: Mme nnan ẹkụt usụn̄, mbụn̄ọ ẹnyụn̄ ẹsan̄a isan̄, ẹnam mbon akpamfia ẹsana, inan ẹkop n̄kpọ, ẹnyụn̄ ẹnam mme akpan̄kpa ẹset, ẹnyụn̄ ẹkwọrọ eti mbụk ẹnọ mme ubuene.”—Matthew 11:4, 5.

Ekeme ndidi John ekere ke enyene mme n̄kpọ en̄wen emi akpanade Jesus anam, n̄ko ke akpana Jesus osio imọ ke ufọk-n̄kpọkọbi. Edi se Jesus ọdọhọde ẹkedọhọ John owụt ke imọ idinamke n̄kpọ ikan mme utịben̄kpọ emi imọ inamde.

Ke ini mbet John ẹnyọn̄de, Jesus ọdọhọ mme owo emi ẹdude do ke John okpon akan prọfet. Enye edi “isụn̄utom” Jehovah emi ẹketịn̄de ẹban̄a ke Malachi 3:1. Kpa enye anam utom prọfet Elijah emi ẹketịn̄de ẹban̄a ke Malachi 4:5, 6. Jesus ọdọhọ ete: “Ke akpanikọ ke ndọhọ mbufo nte, ke otu mmọ eke iban ẹmande, akananam owo idahake ida emi okponde akan John Andinịm Owo Baptism; edi owo emi ekpride akan ke obio ubọn̄ heaven okpon akan enye.”—Matthew 11:11.

Ndidọhọ ke owo emi ekpride akan ke Obio Ubọn̄ heaven okpon akan John owụt ke John iditieneke ikara ke Obio Ubọn̄ heaven. John ọdiọn̄ usụn̄ ọnọ Jesus, edi enye ayakpa mbemiso Jesus eberede usụn̄ ọnọ mme owo ndidụk heaven. (Mme Hebrew 10:19, 20) John edi ata prọfet Abasi, edi enye edidu mi ke isọn̄.

Kpep N̄kpọ En̄wen

Se Bible Etịn̄de Aban̄a Messiah

Ndi ama ọfiọk ke Bible ama etetịn̄ ke Messiah ekenyene ndikpa mbemiso okụrede utom esie?