Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 63

Jesus Etịn̄ Aban̄a Edinam Owo Atuak Ukot Ọduọ ye Ini Ẹduede Owo

Jesus Etịn̄ Aban̄a Edinam Owo Atuak Ukot Ọduọ ye Ini Ẹduede Owo

MATTHEW 18:6-20 MARK 9:38-50 LUKE 9:49, 50

  • JESUS ỌDỌHỌ OWO OKÛDI N̄KPỌ IDUỌ UNỌ OWO

  • EDIEKE EYENETE FO EDUEDE FI

Idahaemi ke Jesus osụk ọnọ item aban̄a nte mme mbet esie ẹkpetiede. Enye ọdọhọ ke mmọ ẹkpeda idem mmọ nte n̄kpri nditọ, ẹsụhọde idem, inyụn̄ idaha idem ke n̄kpọ. Mme mbet ẹkpenyene ‘ndidara utọ n̄kpri nditọwọn̄ emi ke ntak enyịn̄ Jesus.’—Matthew 18:5.

Mme mbet ẹkeme ndida ikọ Jesus emi nte nsuannọ sia ibịghike mmọ ẹkeneni ẹban̄a owo emi okponde akan. Apostle John etịn̄ n̄kpọ en̄wen emi eketịbede ke mîbịghike. Enye ọdọhọ ete: “Nnyịn ima ikụt owo kiet adade enyịn̄ fo ebịn mme demon ndien nnyịn idomo ndikpan enye, koro enye mîsan̄ake ye nnyịn.”—Luke 9:49.

Ndi John ekere ke mme apostle kpọt ke ẹnọ odudu ndinam idem ọsọn̄ mbon en̄wen m̀mê ndibịn demon nsio owo ke idem? Edieke ekpedide ntre, eyen Jew emi anam didie ekeme ndibịn ndiọi spirit nsion̄o mme owo ke idem? Etie John nte ke ikpanaha owo emi anam n̄kpọ emi sia enye mîsan̄ake ye Jesus ye mme apostle esie.

Jesus etịn̄ ikọ emi akpade John idem ete: “Ẹkûdomo ndikpan enye, koro idụhe owo eke edinamde utom odudu ke enyịn̄ mi oro edikemede ndisọp nsụn̄i mi; koro owo eke mîbiọn̄ọke nnyịn ada ye nnyịn. Koro owo ekededi eke ọnọde mbufo cup mmọn̄ kiet ẹn̄wọn̄ ke ntak oro mbufo ẹdide eke Christ, ke akpanikọ ke ndọhọ mbufo, enye iditabake utịp esie ke baba usụn̄ kiet.”—Mark 9:39-41.

Inaha ete emi asan̄a ye Jesus idahaemi mbemiso ẹdiọn̄ọ ke enye ada ye Jesus. Sia owo mîtọn̄ọke esop mme Christian kan̄a, ete emi nditre ndisan̄a ye Jesus iwọrọke ke enye idaha ye Jesus inyụn̄ iwọrọke ke enye ọtọn̄ọ nsunsu ido ukpono. Ete emi ọbuọt idem ke enyịn̄ Jesus, se Jesus onyụn̄ etịn̄de owụt ke enye n̄ko eyenyene nsinsi uwem.

Edi edieke se mme apostle ẹtịn̄de ẹnyụn̄ ẹnamde akpanamde ete oro atuak ukot ọduọ, ata idiọkn̄kpọ ekpedi emi. Jesus ọdọhọ ete: “Owo ekededi eke anamde kiet ke otu n̄kpri owo emi ẹnịmde ke akpanikọ atuak ukot ọduọ, ọkpọfọn ye enye akan edieke ẹkpemende utọ itiat ukọkn̄kpọ emi ass esiyụtde ẹkọn̄ enye ke itọn̄ ẹnyụn̄ ẹtop enye ẹduọk ke inyan̄.” (Mark 9:42) Jesus ọdọhọ n̄ko ke edieke utọ n̄kpọ nte ubọk, ukot, m̀mê enyịn ekemede ndinam mbet esie ẹduọ, ke ana mbet esie ẹsịbe enye ẹfep m̀mê ẹwụbede enyịn oro ẹtop ẹduọk. Ọfọn owo anana utọ akpan n̄kpọ ntre odụk Obio Ubọn̄ akan enye ndinyene edi atak ke Gehenna (Itịghede Hinnom). Imenịm ke mme apostle esie ẹkụt itịghede emi okodude ekpere Jerusalem mi. Ẹkesifọp mbio mi, ntre ama an̄wan̄a mmọ ke itie oro ada aban̄a nsinsi nsobo.

Jesus odụri mmọ utọn̄ n̄ko ete: “Ẹkụt ẹte mbufo isịnke kiet ke otu n̄kpri owo emi ke ndek; koro ndọhọ mbufo nte mme angel mmọ ke heaven ẹsikụt iso Ete mi emi odude ke heaven kpukpru ini.” Didie ke Jehovah ada utọ “n̄kpri owo” emi? Jesus ọnọ mmọ uwụtn̄kpọ ete kiet emi enyenede erọn̄ 100 edi kiet ọbọhọ enye osop. Ete emi ọkpọn̄ erọn̄ 99 aka ndiyom kiet emi osopde. Ke ini enye okụtde erọn̄ emi, enye enem esịt aban̄a kiet emi akan 99 eken. Jesus adian do ete: “Ete mi emi odude ke heaven iyomke kiet ke otu n̄kpri owo emi atak.”—Matthew 18:10, 14.

Jesus ọnọ item en̄wen. Etie nte enye ọnọ item emi ke ntak emi mme mbet ẹkenenide ẹban̄a owo emi okponde akan. Enye ọdọhọ ete: “Ẹnyene inụn̄ ke idem mbufo, ẹnyụn̄ ẹtie ke emem ye kiet eken.” (Mark 9:50) Inụn̄ esinam udia enem. Ndamban̄a inụn̄ edinam ẹkeme ndikop nnyụn̄ nda se owo etịn̄de, ndien emi ayanam ẹnyene emem. Eneni isiyakke emem odu.—Colossae 4:6.

Ke ini ke ini, eyenete ekeme ndinen̄ede ndue owo, ndien Jesus etịn̄ se ẹkpenamde edieke emi etịbede. Enye ọdọhọ ete: “Edieke eyenete fo eduede fi, ka kemen ndudue esie wụt enye, sụk fi ye enye ikpọn̄. Edieke enye okopde uyo fo, afo amada eyenete fo enyene.” Edi edieke enye mîkopke? Jesus ọdọhọ: “Da owo kiet m̀mê iba en̄wen san̄a, man ke inua ntiense iba m̀mê ita kpukpru ikọ ẹkpesọn̄ọ ẹda.” Edieke mfịna oro mîsụk ikụreke, ana mmọ ẹka ẹketịn̄ ẹnọ “esop,” oro edi, mbiowo emi ẹkemede ndise mban̄a n̄kpọ oro. Edi edieke owo oro mîsụk imaha ndikop uyo mbiowo? Jesus ọdọhọ ete: “Yak enye etie fi nte owo mme idụt ye nte ọbọ a-tax.” Mme Jew ikesidụkke ndụk ye utọ mbon emi.—Matthew 18:15-17.

Ana mbiowo ẹda Ikọ Abasi ẹbiere kpukpru n̄kpọ. Edieke mmọ ẹkụtde ke owo edue onyụn̄ edi se ẹnọde ntụnọ, se mmọ ẹbierede emi ke ẹnyụn̄ ẹbiere ke heaven. Edieke mmọ ẹkụtde ke owo oro iduehe, kpa ntre ke ẹda owo oro ke heaven. Item emi edinyene ufọn ke ini ẹditọn̄ọde esop mme Christian. Ke ini mbiowo ẹtiede ẹneme utọ akpan n̄kpọ emi, Jesus ayan̄wam mmọ sia enye ọkọdọhọ ete: “Ebiet eke owo iba m̀mê ita ẹsopde idem ke enyịn̄ mi, ami ndodu ke ufọt mmọ.”—Matthew 18:18-20.