Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 44

Jesus Anam Inyan̄ Ana Sụn̄

Jesus Anam Inyan̄ Ana Sụn̄

MATTHEW 8:18, 23-27 MARK 4:35-41 LUKE 8:22-25

  • JESUS ANAM INYAN̄ ANA SỤN̄

Jesus ọkwọrọ ikọ tọn̄ọ ke usenubọk, ndien idem emem enye. Ke mbubreyo, enye ọdọhọ mme mbet esie ete: “Ẹyak nnyịn ibe ika edem mbeninyan̄ oko,” emi asakde iso ese Capernaum.—Mark 4:35.

Mmọ ẹka idụt mbon Gerasa emi odude ke edem usiahautịn Inyan̄ Galilee. N̄kan̄ emi n̄ko osụk edi Decapolis. Kpa ye oro mme Jew ẹwakde ke Decapolis, mme owo do ẹdu uwem nte mbon Greece.

Mme owo ẹkụt ini emi Jesus ọkpọn̄de Capernaum aka idụt mbon Gerasa. Ntre mmọ ẹtọn̄ọ ndidụk ubom ntiene n̄ka n̄kan̄ oro. (Mark 4:36) Ebiet oro Jesus akade iyomke usụn̄. Inyan̄ Galilee edi n̄kpọ nte itiat 13, okpon ke n̄kpọ nte itiat 7 , onyụn̄ otụn̄ọ.

Kpa ye oro Jesus ọfọnde ama, ukwọrọikọ emi enye ọkwọrọde toto ke usenubọk anam idem emem enye. Ntre, ndondo oro mmọ ẹwatde ẹsio, enye osụhọde ana ke etak ubom, odori ibuot ke udotibuot, onyụn̄ ede idap.

Ediwak mme apostle esie ẹdi nta mme awat-inyan̄, edi uwat mfịn iditiehe nte esitiede. Inyan̄ Galilee odu ke ufọt ikpọ obot, ndien enyọn̄ inyan̄ emi esifofiop. Ndusụk ini, mbịtmbịt ofụm esito ikpọ obot emi edibuaha ye ufiop ofụm ke enyọn̄ inyan̄ emi onyụn̄ anam ọkpọsọn̄ oyobio efịme ke ini owo mîdorike enyịn. Se itịbede idahaemi edi oro. Ibịghike, mbufụt mmọn̄ ọtọn̄ọ ndimia mben ubom onyụn̄ anam “mmọn̄ ọtọn̄ọ ndiyọhọ ubom.” Emi anam ndịk ọtọn̄ọ ndinam mme mbet Jesus. (Luke 8:23) Edi Jesus ke ede idap!

Idịghe akpa oyobio esịmde nta mme awat-inyan̄ emi edi emi; ntre mmọ ẹdomo ndida ifiọk mmọ n̄wat mbe nte ẹsisụk ẹnamde. Edi uwat isan̄ enye emi itiehe nte esitiede. Sia mmọ ẹkerede ke eke mmimọ okụre, mmọ ẹdemede Jesus ke idap ẹnyụn̄ ẹdọhọ ẹte: “Ọbọn̄, nyan̄a nnyịn, nnyịn imọn̄ itak!” (Matthew 8:25) Mme mbet ẹkere ke ubom ọmọn̄ esịp!

Jesus adaha ada onyụn̄ ọdọhọ mme apostle ete: “Mbufo mbon ekpri mbuọtidem, ntak emi mbufo ẹfehede ndịk?” (Matthew 8:26) Ekem Jesus aduat ofụm ye inyan̄ ete: “Dobo! Na sụn̄!” (Mark 4:39) Ofụm odobo, inyan̄ onyụn̄ ana sụn̄. (Ke ini Mark ye Luke ẹbụkde mbụk emi, mmọ ẹbem iso ẹtịn̄ ẹban̄a nte Jesus anamde ofụm odobo, ndien ekem ẹdọhọ ke mme mbet ikenyeneke mbuọtidem.)

N̄kpọ emi enen̄ede akpa mme mbet esie idem! Mmọ ẹkụt inyan̄ emi akadamade idat anade sụn̄. Ndịk anam mmọ etieti. Mmọ ẹbụp kiet eken ẹte: “Anie ededi emi, emi ofụm ye inyan̄ ẹkopde uyo esie?” Ekem mmọ ẹwat ifụre ifụre ẹkedian ke edem n̄kan̄ oko. (Mark 4:41–5:1) Ekeme ndidi mme ubom eken ẹma ẹfiak ẹnyọn̄ edem usoputịn.

Enen̄ede enem nnyịn ndifiọk ke Eyen Abasi enyene odudu nditre mme oto-obot afanikọn̄! Ke ini enye edikarade kpukpru n̄kpọ ke isọn̄, kpukpru owo ẹyedu ke emem, koro oto-obot afanikọn̄ ididụhe!

Kpep N̄kpọ En̄wen

Nso Idi Obio Ubọn̄ Abasi?

Anie edi Edidem Obio Ubọn̄ Abasi, ndien nso ke Obio Ubọn̄ Abasi edinam?