Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 51

Ẹwot Owo ke Usọrọ Usen Emana

Ẹwot Owo ke Usọrọ Usen Emana

MATTHEW 14:1-12 MARK 6:14-29 LUKE 9:7-9

  • HEROD ỌDỌHỌ ẸSỊBE JOHN ANDINỊM OWO BAPTISM IBUOT

Mme apostle Jesus ke ẹsan̄a ẹkwọrọ ikọ ke Galilee, edi idem owo emi ọkọdọhọde mme owo ẹtiene Jesus, odu ke ufọk-n̄kpọkọbi. N̄kpọ nte isua iba edi emi tọn̄ọ ẹkemụm John Andinịm Owo Baptism ẹsịn ke ufọk-n̄kpọkọbi.

Ntak emi ẹsịnde John ke ufọk-n̄kpọkọbi? Se idude edi emi: Herod Antipas emi edide edidem osio n̄wan esie ndọ man ọdọ Herodias, n̄wan Philip eyenete esie. Edi Ibet Moses emi enye Herod ọdọhọde ke imesinịm inyịmeke owo anam utọ n̄kpọ oro, sia efịbe edi oro. Ntem, John ọdọhọ Herod ke ikpanaha enye emen Herodias ọdọ. Emi anam Herod esịn John ke ufọk-n̄kpọkọbi, edi etie nte Herodias ọdọhọ Herod anam emi.

Herod idiọn̄ọke se enye akpanamde John sia mme owo ‘ẹda John nte prọfet.’ (Matthew 14:5) Edi Herodias ifeheke owo ndomokiet, enye ebebiere se enye edinamde John. Enye esịn John ke esịt onyụn̄ oyom usụn̄ ndiwot enye. (Mark 6:19) Ke akpatre, enye enyene ifet ndien ndinam se enye okoyomde.

Passover isua 32 ekpere, Herod anam usọrọ usen emana esie. Ikpọ owo ukara ye ikpọ mbonekọn̄ Herod, ye ikpọ owo Galilee, ẹsop idem ndidia usọrọ emi. Nte usọrọ osụk akade iso, ẹkot Salome, ekpri eyenan̄wan Herodias emi enye akamande ọnọ Philip akpa ebe esie, edinek unek ọnọ isenowo. Eyenan̄wan oro enek unek etieti, anam esịt enem mbon oro ẹkedide usọrọ oro.

N̄kpọ emi enem Herod tutu enye ọdọhọ eyenan̄wan oro ete: “Ben̄e mi se ededi eke afo oyomde, ndien nyọnọ fi.” Ekem enye ọn̄wọn̄ọ ọnọ eyenan̄wan oro ete: “Se ededi eke afo eben̄ede, nyọnọ fi, ekpedi ubak edem kiet ke obio ubọn̄ mi.” Salome ọwọrọ okobụp eka esie ete: “Nso ke n̄kpeben̄e?”—Mark 6:22-24.

Herodias akakam etetie ebet utọ n̄kpọ emi! Enye ọsọsọp ọdọhọ eyen esie ete, “Ibuot John andinịm owo baptism.” Inikiet inikiet Salome afiak edidọhọ Herod ete: “Nyom afo ọnọ mi ibuot John Andinịm Owo Baptism ke usan idahaemi.”—Mark 6:24, 25.

N̄kpọ emi enen̄ede afịna Herod! Edi mbon emi enye okokotde usọrọ emi ẹma ẹkop enye ọdọhọde Salome ke iyọnọ enye se ededi emi enye oyomde. Bụt ayanam enye edieke enye mînamke se enye ọkọn̄wọn̄ọde, ọkpọkọm emi ediyom enye owot owo emi mîduehe. Ntem, enye ọdọn̄ owo ukpeme esie kiet ata idiọk utom ke ufọk-n̄kpọkọbi. Ibịghike, owo ukpeme oro ada ibuot John ke usan ediyak ọnọ Salome, ndien enye emen ọsọk eka esie.

Ke ini mbet John ẹkopde n̄kpọ emi, mmọ ẹdimen enye ẹkebụk, ekem ẹketịn̄ ẹnọ Jesus.

Nte ini akade, ke ini Herod okopde ke Jesus ke ọkọk mme owo udọn̄ọ onyụn̄ ebịn demon osion̄o mme owo ke idem, ndịk anam enye. Enye ekere m̀mê ẹkam ẹnam John Andinịm Owo Baptism “eset ke n̄kpa,” m̀mê enye John asan̄a anam utịben̄kpọ oro. (Luke 9:7) Ntem, Herod Antipas enen̄ede oyom ndikụt Jesus, edi idịghe nte oyom ndikop ukwọrọikọ esie, edi oyom ndifiọk m̀mê ẹnam John eset ke akpanikọ m̀mê owo inamke.