Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 64

Ntak Anade Isifen Inọ Owo

Ntak Anade Isifen Inọ Owo

MATTHEW 18:21-35

  • NDI ẸKPEFEN OWO IKATIABA?

  • UWỤTN̄KPỌ OFỤN EMI MÎTUAHA OWO MBỌM

Peter ama okop item emi Jesus ọkọnọde aban̄a se ẹkpenamde edieke nditọete ẹnyenede mfịna man mmọ ẹbiere mfịna oro ke otu idemmọ. Edi etie nte Peter oyom ndidiọn̄ọ ikafan̄ emi anade imọ inam emem ye mme owo.

Peter obụp ete: “Ọbọn̄, ikafan̄ ke eyenete mi edinam mi idiọkn̄kpọ ndien ami mfen nnọ enye? Tutu esịm utịm ikatiaba?” Ndusụk mme adaiso ido ukpono ẹsikpep ẹte yak owo efen ọnọ owo utịm ikata. Ntem ekeme ndidi Peter ekere ke imọfọn uwem etieti edieke ifende eyenete imọ “utịm ikatiaba.”—Matthew 18:21.

Edi Jesus ikpepke ite owo enenịm ibat ini emi owo eduede enye. Emi anam enye ọdọhọ Peter ete: “Ndọhọ fi nte, idịghe, Tutu esịm utịm ikatiaba, edi, Tutu esịm utịm ike-ata ye efịteba.” (Matthew 18:22) Emi ọwọrọ ke akpana ẹsifen kpukpru ini. Peter ikpenyeneke ndinịm ibat ini oro enye efende eyenete esie.

Jesus ndien ọnọ Peter ye mbon eken uwụtn̄kpọ man mmọ ẹtịm ẹkụt ke ana mmọ ẹsifen mbon en̄wen. Uwụtn̄kpọ emi aban̄a ofụn emi mîtuaha owo mbọm nte eteufọk esie akatuade enye. Edidem oro oyom ndinam ibat ye ifịn esie. Ẹda ofụn kiet emi akamade enye talent 10,000 [denarius 60,000,000] ẹdi. Idụhe nte enye edikemede ndikpe isọn oro mma. Ntre edidem oro ọdọhọ ẹnyam enye ye n̄wan esie ye nditọ esie ẹda ẹkpe isọn oro. Ofụn oro ọduọ ke ukot eteufọk esie ekpe ubọk ete: “Nyene ime ye ami ndien nyekpe fi kpukpru.”—Matthew 18:26.

Mbọm ofụn emi anam ete emi tutu enye abiat ofụri isọn oro efep. Ndondo oro edidem abiatde isọn esie efep, enye ọwọrọ okokụt ofụn nte enye emi akamade enye denarius 100. Enye efịk ofụn oro omụm ọtọn̄ọ ndifịk enye itọn̄ ete: “Sio se ededi oro afo akamade mi.” Edi ofụn oro akamade enye isọn ọduọ ke isọn̄, ekpe enye ubọk ete: “Nyene  ime ye ami ndien nyosio isọn fo.” (Matthew 18:28, 29) Edi ofụn emi eteufọk mmọ akabiatde isọn esie efep ituaha ekemmọ ofụn emi mbọm. Enye ọdọhọ ẹtop ofụn emi ẹsịn ke ufọk-n̄kpọkọbi tutu enye osio kpukpru se enye akamade. Edi isọn emi ofụn oro akamade enye idịghe n̄kpọ ndomokiet.

Ekem Jesus etịn̄ ke ifịn eken emi ẹkụtde se ofụn emi anamde ẹka ẹketịn̄ ẹnọ eteufọk mmọ. Ete emi ndien ayat esịt ọdọn̄ ẹkot ofụn oro onyụn̄ ọdọhọ enye ete: “Idiọk ofụn, mma mbiat kpukpru isọn fo mfep, ke ini afo ekekpede mi ubọk. Nte afo n̄ko ukpatuaha ekemmọ ofụn mbọm, kpa nte ami n̄katuade fi mbọm?” Edidem ayat esịt ọdọhọ mme ekpeme ufọk-n̄kpọkọbi ẹmen enye ẹkekọbi tutu enye osio kpukpru se enye akamade imọ. Jesus adian do ete: “Kpasụk ntre ke Ete mi eke heaven edinam ye mbufo edieke mbufo mîfenke inọ eyenete mbufo ke ofụri esịt.”—Matthew 18:32-35.

Akpana inen̄ede ikpep n̄kpọ ito uwutn̄kpọ emi aban̄ade edifen nnọ mi! Abasi esifen idiọkn̄kpọ oro inamde. Nnyịn ikemeke ndimen se ededi oro eyenete nnyịn anamde edue nnyịn ndomo ye se nnyịn inamde idue Abasi. Ndien Jehovah isifenke inọ nnyịn ini kiet kpọt, edi esifen ediwak ini. Ndi nnyịn inyụn̄ ikemeke ndifen nnọ eyenete nnyịn idem edieke mmọ ẹduede nnyịn ediwak ini? Nte Jesus ekekpepde ke Ukwọrọikọ Oro ke Obot, Abasi edifen inọ nnyịn “kpa nte nnyịn n̄ko ifende inọ” mbon en̄wen.—Matthew 6:12.