Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 26

“Ẹmefen Mme Idiọkn̄kpọ Fo”

“Ẹmefen Mme Idiọkn̄kpọ Fo”

MATTHEW 9:1-8 MARK 2:1-12 LUKE 5:17-26

  • JESUS EFEN ỌNỌ OWO AKPAUBEN̄ ONYỤN̄ ANAM IDEM ỌSỌN̄ ENYE

Etop Jesus esịm mme owo ke kpukpru itụn̄ ye inụk. Mme owo ẹto nsio nsio itie ẹdi ndikop nte enye ekpepde n̄kpọ, ndinyụn̄ nse mme utịben̄kpọ esie. Edi ke usen ifan̄ ẹbede, Jesus afiak ọnyọn̄ Capernaum, emi enye esiwakde ndidu n̄kwọrọ ikọ. Mme owo emi ẹdude ẹkpere Inyan̄ Galilee ẹkop ke enye afiak ọnyọn̄ edi. Ntre ediwak owo ẹdi ufọk emi enye odude. Ndusụk mmọ ẹdi mme Pharisee ye mme ekpep Ibet emi ẹtode Galilee, Judea ye Jerusalem.

Bible ọdọhọ ete: “Ediwak owo ẹsop idem, ẹwak tutu ufan̄ idụhe aba, idem ke enyịnusụn̄, ndien enye ọtọn̄ọ nditịn̄ ikọ nnọ mmọ.” (Mark 2:2) Idahaemi, n̄kpọ emi akanam mîtịbeke ọmọn̄ etịbe. Se iyomde nditịbe emi ayanam nnyịn ifiọk ke Jesus enyene odudu nditre ufen oro mme owo ẹbọde nnyụn̄ nnam idem ọsọn̄ owo ekededi oro enye amade.

Ke ini Jesus osụk ekpepde otuowo emi n̄kpọ, irenowo inan̄ ẹbiom owo akpauben̄ ke n̄kpọnna ẹdi. Mmọ ẹyom Jesus anam idem ọsọn̄ owo akpauben̄ emi. Edi mme owo ẹwak ẹkaha ke ufọk, “mmọ [ikemeke] ndida enye mbe ndụk nsọk Jesus.” (Mark 2:4) Kam kere nte oro akpabiakde owo! Ntre mmọ ẹdọk mbatmbat ọkọm ufọk oro ẹnyụn̄ ẹyarade ọkọm itie emi Jesus etiede. Ekem, mmọ ẹsụhọde n̄kpọnna emi owo akpauben̄ anade ẹsịn ke esịt ufọk.

Ndi Jesus ayat esịt ọdọhọ ke mmọ ẹtịmede nneme imọ? Baba-o! Esịt enem enye etieti ndikụt adan̄a nte mbuọtidem mmọ okponde, ntre enye ọdọhọ owo akpauben̄ oro ete: “Ẹmefen mme idiọkn̄kpọ fo.” (Matthew 9:2) Ndi akpanikọ ke Jesus ekeme ndifen mme idiọkn̄kpọ? Se iyatde mme Pharisee edi oro. Mmọ ẹkere ẹte: “Ntak owo emi etịn̄de ikọ ntem? Enye etịn̄ ikọ isụn̄i adian Abasi. Anie ekeme ndifen mme idiọkn̄kpọ ke mîbọhọke owo kiet, kpa Abasi?”—Mark 2:7.

Jesus ọfiọk se mmọ ẹkerede, ntre enye ọdọhọ mmọ ete: “Ntak emi mbufo ẹkerede mme n̄kpọ emi ke esịt mbufo? Ewe emem akan, ndi ndidọhọ owo akpauben̄, ‘Ẹmefen mme idiọkn̄kpọ fo,’ m̀mê ndidọhọ, ‘Daha ke enyọn̄ nyụn̄ men n̄kpọnna fo san̄a’?” (Mark 2:8, 9) Ke akpanikọ, Jesus ekeme ndifen mme idiọkn̄kpọ, sia nte ini akade, enye ayawa idemesie ke ibuot kpukpru owo.

Jesus owụt otuowo oro ye mme okụt ndudue oro ke imenyene odudu ndifen idiọkn̄kpọ mme owo. Enye ọwọn̄ọde ese owo akpauben̄ oro onyụn̄ ọdọhọ enye ete: “Ndọhọ fi nte, Daha ke enyọn̄, men n̄kpọnna fo nyọn̄ ufọk fo.” Ndien owo oro adaha ke enyọn̄, emen n̄kpọnna esie kpa idaha oro onyụn̄ asan̄a ọwọrọ ke iso mmọ kpukpru. Idem akpa mmọ kpukpru, mmọ ẹnyụn̄ ẹnọ Abasi ubọn̄, ẹte: “Akananam nnyịn ikwe n̄kpọ eke etiede ntem.”—Mark 2:11, 12.

Mbọk fiọk ete ke se Jesus etịn̄de owụt ke idiọkn̄kpọ esinyene n̄kpọ ndinam ye udọn̄ọ, n̄ko ke edifen nnọ ekeme ndinam idem ọsọn̄ owo. Bible ọdọhọ ke Adam, akpa ete nnyịn ama anam idiọkn̄kpọ, n̄ko ke kpukpru nnyịn idada idiọkn̄kpọ ye n̄kpa imana. Edi ke ini Jesus edikarade ke Obio Ubọn̄ Abasi, enye eyefen idiọkn̄kpọ kpukpru mbon oro ẹmade Abasi ẹnyụn̄ ẹnamde n̄kpọ esie. Udọn̄ọ ididụhe aba ke nsinsi.—Rome 5:12, 18, 19.

Kpep N̄kpọ En̄wen

ENYỌN̄-UKPEME

Ndi Abasi Ekeme Ndifen Mme Idiọkn̄kpọ Nnyịn?

Ndi Abasi esifen ikpọ idiọkn̄kpọ? Nso ke ikpanam man Abasi efen ọnọ nnyịn?