Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 60

Edikpụhọde Mbiet Owụt Ubọn̄ Emi Christ Edinyenede

Edikpụhọde Mbiet Owụt Ubọn̄ Emi Christ Edinyenede

MATTHEW 16:28–17:13 MARK 9:1-13 LUKE 9:27-36

  • N̄KUKỤT EDIKPỤHỌDE MBIET

  • MME APOSTLE ẸKOP UYO ABASI

Jesus osụk odu ke Caesarea Philippi ekpep mme owo n̄kpọ. To Caesarea Philippi ka Obot Hermon edi n̄kpọ nte itiat 15. Nte enye osụk ekpepde mme owo n̄kpọ, enye etịn̄ ikọ emi akpade mme apostle esie idem ete: “Ke akpanikọ ke ndọhọ mbufo nte ndusụk owo ẹdu ke otu mmọ emi ẹdade mi emi mîditabike n̄kpa tutu mmọ ẹbem iso ẹkụt Eyen owo nte edide ke obio ubọn̄ esie.”—Matthew 16:28.

Anaedi mbet Jesus ẹkere m̀mê ikọ esie oro ọwọrọ nso. Ke n̄kpọ nte urua kiet ebede, enye asan̄a ye apostle ita, oro edi, Peter, James, ye John, ọdọk akamba obot kiet. Etie nte eyo enen̄ede ọsọn̄, sia idap ọtọn̄ọ ndinam mme apostle oro. Ke ini Jesus osụk ọbọn̄de akam, ẹkpụhọde enye mbiet ke enyịn mmọ. Mme apostle ẹkụt iso Jesus ayamade nte utịn ẹnyụn̄ ẹkụt ọfọn̄ esie akabarede afia onyụn̄ esem etieti.

Ekem mmọ ẹkụt mbiet owo iba, Bible okot mmọ “Moses ye Elijah.” Owo iba emi ẹtọn̄ọ nneme ye Jesus ẹban̄a ‘unyọn̄ esie oro edidide ke Jerusalem.’ (Luke 9:30, 31) Unyọn̄ oro aban̄a n̄kpa Jesus ye nte ẹdinamde enye eset. Ndondo emi ke Jesus osụk eneme n̄kpọ emi ye mme mbet esie. (Matthew 16:21) Se mmọ ẹnemede emi owụt ke ana Jesus akpa n̄kpa esuene, emi Peter ọkọdọhọde ke ikpanaha edi ntre.

Idap atara mme apostle ita emi ke enyịn. Idem akpa mmọ etieti, mmọ ke ẹtat enyịn ẹse se itịbede, ke ẹnyụn̄ ẹkop se ẹnemede. N̄kukụt ke edi, edi ebiet ata ata n̄kpọ etịbe tutu Peter ọtọn̄ọ nditiene nsịn uyo ke nneme oro. Enye ọdọhọ ete: “Rabbi, ọfọn nnyịn ndidu mi, ntre yak nnyịn iwụk tent ita, kiet enyene fi, kiet enyene Moses, kiet onyụn̄ enyene Elijah.” (Mark 9:5) Ndi Peter oyom ẹwụk tent man n̄kukụt oro edisọp okụre?

Nte Peter osụk etịn̄de ikọ emi, un̄wana ayama akan mmọ okụk, uyo onyụn̄ ọwọrọ ke un̄wana oro ete: “Emi edi edima Eyen mi, emi ami nnyịmede; ẹkpan̄ utọn̄ ẹnọ enye.” Ke ini mme apostle ẹkopde uyo Abasi, ndịk anam mmọ, mmọ ẹnyụn̄ ẹduọn̄ọ ẹkịbi iso ke isọn̄. Edi Jesus ọdọhọ mmọ ete: “Ẹdaha ke enyọn̄, ẹkûnyụn̄ ẹfehe ndịk.” (Matthew 17:5-7) Ke ini mmọ ẹdahade ẹda, mmọ ẹdikụt Jesus ikpọn̄. N̄kukụt oro okụre. Ke ini eyo esierede, nte mmọ ẹsụk ẹtode obot oro ẹsụhọde, Jesus ọdọhọ mmọ ete: “Ẹkûtịn̄ n̄kukụt emi ẹnọ owo ndomokiet tutu Eyen owo eset ke n̄kpa.”—Matthew 17:9.

Elijah emi mmọ ẹkekụtde ke n̄kukụt oro anam mme apostle Jesus ẹbụp mbụme. Mmọ ẹbụp enye ẹte: “Ntak, ndien, mme scribe ẹdọhọde ẹte ke ana Elijah ebem iso edi?” Jesus ọbọrọ ete: “Elijah ama ededi ndien mmọ ikọfiọkke enye.” (Matthew 17:10-12) Jesus etịn̄ aban̄a John Andinịm Owo Baptism, emi akanamde ukem utom Elijah. Elijah ekedi edidiọn̄ usụn̄ ọnọ Elisha, se John okonyụn̄ anamde ọnọ Christ edi oro.

N̄kukụt emi ọsọn̄ọ Jesus ye mme apostle oro idem onyụn̄ owụt ubọn̄ emi ẹdinọde Christ ke ini enye edidide edidem. Mme mbet ẹma ẹkụt “Eyen owo nte edide ke obio ubọn̄ esie,” kpasụk nte Jesus ọkọdọhọde. (Matthew 16:28) Ini mmọ ẹkedude ke obot oro, mmọ ẹma ẹkụt “akwa ubọn̄ esie.” Okposụkedi oro mme Pharisee ẹkeyomde idiọn̄ọ emi ediwụtde ke Jesus ke Abasi ekemek ete edi Edidem, enye ikowụtke mmọ idiọn̄ọ ndomokiet. Edi ẹma ẹnam mme mbet Jesus ẹkụt nte ẹkpụhọrede enye mbiet, ndien emi ama anam mmọ ẹtịm ẹnịm se ẹkebemde iso ẹwet ke Bible ẹban̄a Obio Ubọn̄. Oro akanam Peter ewet nte ini akade ete: “Ẹdọdiọn̄ ẹsọn̄ọ ikọ mme prọfet ẹnọ nnyịn.”—2 Peter 1:16-19.

Kpep N̄kpọ En̄wen

Peter Was Loyal in the Face of Tests

How did Peter’s faith and loyalty help him to accept correction from Jesus?