Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 61

Jesus Ebịn Demon Osio Akparawa Kiet ke Idem

Jesus Ebịn Demon Osio Akparawa Kiet ke Idem

MATTHEW 17:14-20 MARK 9:14-29 LUKE 9:37-43

  • ANA MBET JESUS ẸNEN̄EDE ẸNYENE MBUỌTIDEM MAN ẸKEME NDIBỊN DEMON

Ke ini Jesus, Peter, James, ye John ẹsụhọrede ke obot ẹdi, mmọ ẹkụt akwa otuowo. Edi enyene se itịbede. Mme scribe ke ẹda ẹkanade mme mbet eken ẹnyụn̄ ẹneni eneni ye mmọ. Ke ini mme owo ẹkụtde Jesus esịt enem mmọ, mmọ ẹnyụn̄ ẹfehe ẹkekọm enye. Jesus obụp ete: “Nso ke mbufo ẹneni ye mmọ?”—Mark 9:16.

Ete kiet edi editọn̄ọ edọn̄ ọdọhọ Jesus ete: “Andikpep, n̄kada eyeneren mi nsọk fi koro enye enyenede spirit imụm; ndien ebiet ekededi eke spirit emi omụmde enye, osio enye ọduọk ke isọn̄, enye osio efot onyụn̄ ata edet ndien ọbọ enye in̄wek. Ndien mma ndọhọ mme mbet fo ẹbịn enye ẹduọk, edi mmọ ikemeke.”—Mark 9:17, 18.

Ekeme ndidi mme scribe oro ẹketịn̄ ikọ ye mme mbet Jesus m̀mê ẹsak mmọ sia mmọ mîkekemeke ndibịn demon nsio eyen oro ke idem. Utu ke ndibọrọ kan̄a ete oro, Jesus ọdọhọ otuowo ete: “O emana unana mbuọtidem ye eke ukwan̄ido, adan̄a didie ke ndika iso ye mbufo? Adan̄a didie ke ndiyọ mbufo?” Enye etịn̄ ikọ emi ye mme scribe emi ẹkenamde mfịna ye mme mbet esie ke ini enye mîkodụhe. Ekem Jesus ọwọn̄ọde ese ete eyen oro demon afịnade onyụn̄ ọdọhọ ete: “Da eyen fo di mi.”—Luke 9:41.

Nte akparawa oro osụk asan̄ade edi demon osio enye ọduọk ke isọn̄ onyụn̄ enen̄ede esịn̄ede enye. Eyen oro ewere ke isọn̄, ke osio efot ke inua. Jesus obụp ete esie m̀mê ‘ebịghi adan̄a didie n̄kpọ emi ọkọtọn̄ọ ndinam enye.’ Enye ọdọhọ, “toto ke uyen; ndien esisio enye esịn ke ikan̄ ye ke mmọn̄ ediwak ini man owot enye.” Ete oro ekpe Jesus ubọk ete: “Edieke afo ekemede ndinam n̄kpọ, tua nnyịn mbọm nyụn̄ n̄wam nnyịn.”—Mark 9:21, 22.

Enyịn anan enye sia idem mbet Jesus ikekemeke ndibịn demon oro. Se ete oro etịn̄de anam Jesus ọdọhọ enye ete: “Ikọ oro, ‘Edieke afo ekemede’! Kamse, kpukpru n̄kpọ ẹkeme ndiwọrọ nnọ owo edieke enye enyenede mbuọtidem.” M̀mê Jesus etetịn̄ ama, ete oro ofiori ete: “Mmenyene mbuọtidem! N̄wam mi ke ebiet oro nnanade mbuọtidem!”—Mark 9:23, 24.

Ke ini Jesus okụtde nte mme owo ẹfehede ẹdi ndise se imọ iyomde ndinam, enye aduat demon oro ete: “Afo spirit imụm ye inan, mmowụk fi, wọrọ enye ke idem, kûnyụn̄ udụk enye ke idem aba.” Mbemiso demon oro ọwọrọde, enye anam eyen oro ofiori n̄kpo onyụn̄ esịn̄ede enye n̄kpa n̄kpa. Eyen oro osụhọ, ana nte akpakpa. Ke ini otuowo ẹkụtde emi, ata ediwak mmọ ẹdọhọ ẹte: “Enye akpa!” (Mark 9:25, 26) Edi Jesus omụm eyen oro ubọk emenede, ndien eyen oro adaha ada; “udọn̄ọ onyụn̄ okụre eyen oro kpa ke hour oro.” (Matthew 17:18) Idem enen̄ede akpa mme owo.

Mbemiso usen emi, ke ini Jesus ọkọdọn̄de mme mbet esie ẹka ẹkekwọrọ ikọ, mmọ ẹma ẹbịn mme demon ẹsio mme owo ke idem. Ntre ke ini mmọ ẹdude ikpọn̄ ye enye ke esịtufọk, mmọ ẹbụp enye ẹte: “Ntak emi nnyịn mîkekemeke ndibịn enye nduọk?” Jesus ọdọhọ ke mmọ ikenyeneke mbuọtidem, onyụn̄ ọdọhọ ke “n̄kpọ ndomokiet ikemeke ndinam orụk enye emi ọwọrọ, ibọhọke akam.” (Mark 9:28, 29) Ekpedi mmọ ẹma ẹnen̄ede ẹbuọt idem ke Abasi ẹnyụn̄ ẹbọn̄ akam ẹben̄e spirit esie, mmọ ẹkpekekeme ndibịn demon oro.

Ke akpatre Jesus ọdọhọ mmọ ete: “Ke akpanikọ ke ndọhọ mbufo nte, edieke mbufo ẹnyenede mbuọtidem eke ekpride nte n̄kpasịp mustard, mbufo ẹyedọhọ obot emi ẹte, ‘Wụhọde mi kowụhọ ko,’ ndien enye oyowụhọde, n̄kpọ ndomokiet idinyụn̄ isọn̄ke ikan mbufo.” (Matthew 17:20) Idụhe se mbuọtidem mîkemeke ndinam!

Idomo ye mme n̄kpọ eken emi mîyakke isịn idem inam n̄kpọ Jehovah ẹtie nte ikpọ obot. Ekeme nditie nte ke mfịna nnyịn idikụreke tutu amama. Edi edieke inen̄erede ibuọt idem ke Abasi, ikpọ obot oro idibiọn̄ọke nnyịn.