Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 59

Anie Edi Eyen Owo?

Anie Edi Eyen Owo?

MATTHEW 16:13-27 MARK 8:22-38 LUKE 9:18-26

  • JESUS ANAM NNAN OKỤT USỤN̄

  • ẸYENỌ PETER MME UKPỌHỌDE OBIO UBỌN̄

  • JESUS ỌDỌHỌ KE IYAKPA INYỤN̄ ISET

Jesus ye mbet esie ẹdisịm Bethsaida. Mme owo ẹmen ete kiet emi edide nnan ẹdi ẹdikpe enye ubọk ẹte otụk ete oro man enye afiak okụt usụn̄.

Jesus omụm enye ubọk ọwọrọ aka edem obio, afiari etap esịn enye ke enyịn onyụn̄ obụp enye ete: “Nte omokụt n̄kpọ ndomokiet?” Ete oro ọdọhọ ete: “Mmokụt mme owo, koro n̄kụt se itiede nte mme eto, edi mmọ ẹsasan̄a.” (Mark 8:23, 24) Jesus ada ubọk esie otụk enye enyịn onyụn̄ anam enye afiak okụt usụn̄. Enye ọdọhọ ete oro ọnyọn̄ ufọk onyụn̄ ọdọhọ enye okûdụk obio.

Ekem Jesus ye mbet esie ẹkpọn̄ do ẹka Caesarea Philippi. Idịghe ekpri isan̄ edi emi-o, sia to Bethsaida sịm do edi n̄kpọ nte itiat 25. N̄kan̄ oro etie obot obot, onyụn̄ ekpere Obot Hermon emi snow esifụkde ke etịn̄e. Anaedi mmọ ẹsan̄a usen ifan̄ mbemiso ẹsịmde do.

Nte mmọ ẹsụk ẹkade ke usụn̄, Jesus ọkpọn̄ mmọ aka ndibọn̄ akam. N̄kpọ nte ọfiọn̄ usụkkiet m̀mê duop kpọt ayak mbemiso Jesus akpade, ndien enye osụk ekere nte n̄kpọ editiede ye mbet esie. Ibịghike ediwak mbet ẹketre nditiene enye, ndien mbon eken inen̄ekede ifiọk se ẹkpenamde, n̄kpọ inyụn̄ itiehe nte ndusụk mbet esie ẹkekerede. Ndusụk mmọ ẹkeme ndikere m̀mê nso inam enye mîkenyịmeke ndidi edidem ye ntak enye mîkanamke utịben̄kpọ ndiwụt utọ owo emi enye edide.

Ke ini mbet esie ẹdide ẹdisịm ebiet emi enye ọbọn̄de akam, Jesus obụp mmọ ete: “Mme owo ẹdọhọ ke Eyen owo edi anie?” Mmọ ẹbọrọ ẹte: “Ndusụk owo ẹte John Andinịm Owo Baptism, mbon efen ẹte Elijah, mbon efen n̄ko ẹte Jeremiah mîdịghe kiet ke otu mme prọfet.” Mme owo ẹkere ke ẹma ẹnam kiet ke otu mme owo emi eset edidi Jesus. Jesus obụp mbet esie mbụme emi n̄ko man mmọ ẹtịn̄ se mmọ ẹkerede. Enye obụp mmọ ete: “Edi mbufo ẹdọhọ ke ami ndi anie?” Peter ọsọsọp ọbọrọ ete: “Afo edi Christ, Eyen odu-uwem Abasi.”—Matthew 16:13-16.

Jesus ọdọhọ Peter yak enye enem esịt nte Abasi ayararede n̄kpọ oro ọnọ enye, onyụn̄ adian do ete: “Ndọhọ fi nte, Afo edi Peter, ndien nyọbọp esop mi ke enyọn̄ akamba itiat emi, ndien mme inuaotop Udi idikanke enye.” Ikọ Jesus ọwọrọ ke imọ imọn̄ itọn̄ọ esop nti ikọt Abasi. Edieke mbon esop oro ẹsọn̄ọde ẹda ẹnam n̄kpọ Abasi tutu mmọ ẹkpa, n̄kpa idikpanke mmọ ndibọ edidiọn̄ Abasi. Enye ọdọhọ Peter ete: “Nyọnọ fi mme ukpọhọde obio ubọn̄ heaven.”—Matthew 16:18, 19.

Jesus ikemekke Peter ite edi etubom mme apostle eken, ikonyụn̄ inamke enye edi itiat idakisọn̄ esop oro. Jesus ke idemesie edi Itiat emi ẹdibọpde esop esie ẹdori. (1 Corinth 3:11; Ephesus 2:20) Ẹdinọ Peter ukpọhọde ita. Enye ediberede usụn̄ inọ m̀mê edin̄wam nsio nsio owo ẹkeme ndidụk Obio Ubọn̄ heaven.

Peter edida akpa ukpọhọde oro inam n̄kpọ ke Pentecost isua 33, ke ini enye ediwụtde mme  Jew emi ẹkabarede esịt ye mbon idụt emi ẹtienede mme Jew ẹkpono Abasi se anade mmọ ẹnam man ẹnyan̄a mmọ. Enye edida ọyọhọ ukpọhọde iba inam mbon Samaria emi ẹbuọtde idem ye Christ ẹdụk Obio Ubọn̄ Abasi. Ekem ke isua 36 eyo Christ, enye ayada ọyọhọ ukpọhọde ita anam mme Gentile emi mînaha mbobi ẹkeme ndidụk Obio Ubọn̄ Abasi, ọtọn̄ọde ye Cornelius, mme iman esie, ye mme ufan esie.—Utom 2:37, 38; 8:14-17; 10:44-48.

Ini Jesus osụk enemede n̄kpọ emi ye mmọ, esịt inemke mme apostle esie ke ini enye ọdọhọde ke ibịghike ẹmọn̄ ẹtụhọde ẹnyụn̄ ẹwot imọ ke Jerusalem. Peter idiọn̄ọke kan̄a ke ẹdinam Jesus eset afiak ọnyọn̄ heaven, ntre enye omụm Jesus esịk ada onyụn̄ ọtọn̄ọ ndisua nnọ enye, ete: “Tua idemfo mbọm, Ọbọn̄; n̄kpọ emi idiwọrọke fi tutu amama.” Edi Jesus akpa edem owụt Peter onyụn̄ ọdọhọ enye ete: “Da mi ke edem, Satan! Afo edi n̄kpọ iduọ ọnọ mi, koro afo ukereke ekikere Abasi, edi ekere eke owo.”—Matthew 16:22, 23.

Jesus etịn̄ ikọ ye mme apostle esie ye mme mbet eken onyụn̄ ọdọhọ mmọ ke idimemke utom ndidi mbet imọ. Enye ọdọhọ ete: “Edieke owo ekededi oyomde nditiene mi, yak enye akan̄ idemesie onyụn̄ emen eto ndutụhọ esie aka iso etiene mi. Koro owo ekededi eke oyomde ndinyan̄a ukpọn̄ esie ọyọduọk enye; edi owo ekededi eke ọduọkde ukpọn̄ esie ke ntak mi ye eti mbụk ayanyan̄a enye.”—Mark 8:34, 35.

Ana mbet Jesus ẹnyene uko ẹnyụn̄ ẹnyịme ndiyak n̄kpọ atak mmọ edieke mmọ ẹyomde Jesus enem esịt ye mmọ. Jesus ọdọhọ mmọ ete: “Owo ekededi eke okopde bụt aban̄a mi ye ikọ mi ke idiọk emana efịbe emi, Eyen owo oyokop bụt n̄ko aban̄a enye ke ini enye edidide ke ubọn̄ Ete esie, asan̄a ye ndisana angel.” (Mark 8:38) Ke ini Jesus edidide, “enye ọyọnọ owo kiet kiet utịp nte ekemde ye ido esie.”—Matthew 16:27.