Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 42

Jesus Asua Ọnọ Mme Pharisee

Jesus Asua Ọnọ Mme Pharisee

MATTHEW 12:33-50 MARK 3:31-35 LUKE 8:19-21

  • JESUS ETỊN̄ ABAN̄A ‘IDIỌN̄Ọ JONAH’

  • MBET ẸKPERE ENYE ẸKAN EKA YE NDITỌEKA ESIE

Mme scribe ye mme Pharisee ndidọhọ ke idịghe odudu Abasi ke Jesus ada ebịn mme demon osion̄o mme owo ke idem ekeme ndinam mmọ ẹsụn̄i edisana spirit. Afo nyụn̄ kere ise, anie ke mmọ ẹda ẹnọ, ndi Abasi m̀mê Satan? Jesus ọdọhọ mmọ ete: “Ẹnam eto ọfọn ẹnyụn̄ ẹnam mfri esie ọfọn mîdịghe ẹnam eto edi mbumbu ẹnyụn̄ ẹnam mfri esie edi mbumbu; koro ẹda mfri eto ẹdiọn̄ọ eto.”—Matthew 12:33.

Iwụtke eti ibuot ndidọhọ ke Jesus ọbọ Satan odudu ada anam eti n̄kpọ, oro edi, ada ebịn mme demon. N̄kọ emeti ke Jesus ọkọdọhọ ke ukwọrọikọ esie oro ke obot ete ke eti eto esin̄wụm eti mfri, in̄wụmke mbumbu mfri. Ntem, nso mfri ke mme Pharisee ẹdi ke emi mmọ ẹsude nsu ẹdori Jesus mi? Mmọ ẹdi mbumbu mfri. Jesus ọdọhọ mmọ ete: “Nditọ ibọm, mbufo ẹkeme didie nditịn̄ nti n̄kpọ, ke adan̄aemi mbufo ẹdiọkde? Koro oto uyọhọ esịt inua osio etịn̄.”—Matthew 7:16, 17; 12:34.

Ata akpanikọ ke Jesus etịn̄ emi, koro nnyịn isitịn̄ se isịnede nnyịn ke esịt, ndien oro ke ẹdida ibiere ikpe inọ nnyịn. Emi anam Jesus ọdọhọ ete: “Ndọhọ mbufo nte kpukpru ikpîkpu ikọ emi mme owo ẹtịn̄de, mmọ ẹyenam ibat ke Usen Ikpe; koro ẹdida ikọ fo ẹbat fi ke edinen, ẹdinyụn̄ ẹda ikọ fo ẹbiom fi ikpe.”—Matthew 12:36, 37.

Kpa ye ofụri ikpọ utịben̄kpọ emi Jesus anamde, mme scribe ye mme Pharisee ke ẹyoyom enye anam utịben̄kpọ en̄wen, ntre mmọ ẹdọhọ enye ẹte: “Andikpep, nnyịn iyom ndikụt idiọn̄ọ eke otode fi.” Edide mmọ ẹma ẹkụt mme utịben̄kpọ Jesus m̀mê ikekwe, ata ediwak owo ẹma ẹkụt ẹnyụn̄ ẹtịn̄ ẹban̄a mmọ. Ntre Jesus ọdọhọ mmọ ete: “Emana eke ọdiọkde onyụn̄ esịnde efịbe aka iso ndiyom idiọn̄ọ, edi owo idinọhọ enye idiọn̄ọ ndomokiet ibọhọke idiọn̄ọ prọfet Jonah.”—Matthew 12:38, 39.

Jesus ọsọsọp anam mmọ ẹdiọn̄ọ se ikọ esie ọwọrọde, enye ọdọhọ mmọ ete: “Kpa nte Jonah ekesịnede ke idịbi akamba iyak uwemeyo ita ye okoneyo ita, ntre ke Eyen owo edisịne ke esịt isọn̄ uwemeyo ita ye okoneyo ita.” Akamba iyak ama emen Jonah onyụn̄ ọkpọhi enye, ndien eketie nte n̄kpọ eke ẹnamde Jonah eset. Ikọ Jesus ọwọrọ ke imọ iyakpa inyụn̄ iset ke ọyọhọ usen ita. Ke ini oro etịbede, ikpọ owo mme Jew imaha ndinịm ‘idiọn̄ọ Jonah’ emi, inyụn̄ inyịmeke ndikabade esịt. (Matthew 27:63-66; 28:12-15) Edi “mbon Nineveh” ẹma ẹkabade esịt ke ini Jonah ọkọkwọrọde ikọ ọnọ mmọ. Ntre mmọ ẹyebiom emana emi ikpe. Jesus ọdọhọ n̄ko ke ọbọn̄ an̄wan Sheba oyonyụn̄ obiom mmọ ikpe, koro enye ama oyom ndikop ọniọn̄ Solomon, se enye okokopde ama onyụn̄ akpa enye idem. Do ke Jesus adian ete: “Se ikponde ikan Solomon odu mi.”—Matthew 12:40-42.

Jesus ọdọhọ ke idiọk emana emi ẹtie nte owo emi idiọk spirit ọwọrọde ke enye idem. (Matthew 12:45) Edi sia owo oro mîkereke nti n̄kpọ, idiọk spirit oro ada ndiọi spirit itiaba emi ẹdiọkde ẹkan enye afiak edidụk enye idem. Ukem ntre, ẹma ẹnam nditọ Israel ẹsana ukem nte owo emi idiọk spirit ọwọrọde ke idem. Edi mmọ ikakpan̄ke utọn̄ inọ mme prọfet Abasi, ndien oro anam mmọ ẹbiọn̄ọ Jesus emi mme owo ẹkụtde ke enyene spirit Abasi, onyụn̄ anam itie mmọ ọdiọk akan akpa.

Ke ini Jesus osụk etịn̄de ikọ, eka ye nditọeka esie ẹdida ke an̄wa. Ndusụk mbon emi ẹtiede ẹkpere enye ẹdọhọ enye ẹte: “Eka fo ye nditọeka fo iren ke ẹda ke an̄wa ẹyom ndikụt fi.” Jesus anam mmọ ẹfiọk ke imọ imenen̄ede ikpere mme mbet imọ, ke mmọ ẹtie nte mme eka ye nditọeka iren ye iban ẹnọ imọ. Enye anyan ubọk owụt mme mbet esie onyụn̄ ọdọhọ ete: “Eka mi ye nditọeka mi iren ẹdi mmọ emi ẹkopde ikọ Abasi ẹnyụn̄ ẹnamde.” (Luke 8:20, 21) Ikọ esie emi owụt ke kpa ye oro enye amade eka ye nditọeka esie, ke mme mbet esie ke enye ama akan. Esinen̄ede enem ndikpere nditọete ke esop idem, akpan akpan ke ini emi mme owo ẹsuade nnyịn ye nti utom nnyịn, ẹnyụn̄ ẹdade nnyịn nte mbon nsu.