Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 58

Jesus Anam Uyo Awak Onyụn̄ Ọnọ Mbet Esie Item Aban̄a Leaven

Jesus Anam Uyo Awak Onyụn̄ Ọnọ Mbet Esie Item Aban̄a Leaven

MATTHEW 15:32–16:12 MARK 8:1-21

  • JESUS ỌNỌ IRENOWO 4,000 UDIA

  • ENYE ỌNỌ MBET ESIE ITEM ABAN̄A LEAVEN MME PHARISEE

Ediwak owo ẹka ẹbịne Jesus ke Decapolis, ke n̄kan̄ edem usiahautịn Inyan̄ Galilee. Mmọ ẹdi ndikop se enye ekpepde ẹnyụn̄ ẹdi man enye ọkọk mmọ udọn̄ọ. Mmọ ẹkama udia ke ikpọ akpasa.

Nte ini akade, Jesus ọdọhọ mbet esie ete: “Mbọm otuowo emi anam mi, koro usen ita ẹdi emi nte mmọ ẹkedu ye ami mmọ inyụn̄ inyeneke se ẹdiade; ndien edieke nnamde mmọ ẹsan̄a biọn̄ ẹnyọn̄ọ ufọk, idem ẹyemem mmọ ke usụn̄. Ke akpanikọ, ndusụk mmọ ẹto anyan ebiet.” Mbet esie ẹbụp enye ẹte: “Owo edikeme ndida uyo ke m̀mọ̀n̄ ke nsannsan ebiet emi nyụhọ mme owo emi?”—Mark 8:2-4.

Jesus obụp mbet esie ete: “Mbufo ẹnyene uyo ifan̄?” Mmọ ẹbọrọ: “Itiaba, ye n̄kpri iyak ifan̄.” (Matthew 15:34) Jesus ọdọhọ mme owo oro ẹsụhọde ẹtetie ke isọn̄. Enye ọbọ uyo ye iyak oro, ọbọn̄ akam ọnọ Abasi, onyụn̄ ayak ọnọ mbet esie ete ẹdeme ẹnọ mme owo. Kpukpru owo ẹdia ẹyụhọ! Kpa ye oro edide irenowo 4,000, ye iban, ye nditọwọn̄ ke ẹnọ udia, se ẹdiade ẹsụhọ ọyọhọ ikpọ akpasa itiaba.

Jesus osio otuowo unyọn̄. Ekem enye ye mbet esie ẹdụk ubom ẹwat ẹka Magadan, ke n̄kan̄ edem usoputịn Inyan̄ Galilee. Mme Pharisee ye ndusụk mme Sadducee ẹdi ndidomo Jesus, mmọ ẹdọhọ enye owụt mmimọ idiọn̄ọ emi otode heaven.

Sia Jesus ọdiọn̄ọde se isịnede mmọ ke esịt, enye ọdọhọ mmọ ete: “Ke mbubreyo, ẹmehe mbufo ndidọhọ ẹte, ‘Enyọn̄ ọyọfọn, koro enyọn̄ eyịbe’; ndien ke usenubọk, mbufo ẹte, ‘Mfịn eyetuebe onyụn̄ edep edịm, koro enyọn̄ eyịbe, onyụn̄ okpụk.’ Mbufo ẹmefiọk nditịn̄ nte ikpaenyọn̄ etiede, edi mbufo ikemeke ndifiọk mme idiọn̄ọ ini.” (Matthew 16:2, 3) Ekem enye ọdọhọ mme Pharisee ye mme Sadducee ke imọ idiwụtke mmọ idiọn̄ọ ndomokiet ibọhọke idiọn̄ọ Jonah.

Jesus ye mme mbet esie ẹdụk ubom ẹwat ẹka n̄kan̄ Bethsaida, ke enyọn̄-enyọn̄ Inyan̄ Galilee. Nte mmọ ẹsụk ẹwatde ẹka, mme mbet ẹti ke mmimọ ikamake uyo oro edikemde. Uyo kiet kpọt ke mmọ ẹkama. Jesus ọnọ mmọ item ete: “Ẹtịn̄ enyịn ẹkpeme mbak leaven mme Pharisee ye leaven Herod.” Ikọ Jesus aban̄a nneme emi enye ekenemede ye mme Pharisee ye mme Sadducee emi ẹdide mme anditiene Herod, edi mbet esie ẹkere ke enye etịn̄ ke ntak emi mmimọ ikefrede ndimen uyo. Ke ini Jesus ọdiọn̄ọde ke se mmọ ẹkerede edi emi, enye ọdọhọ mmọ ete: “Ntak emi mbufo ẹnenide ẹban̄a nte mbufo mînyeneke uyo?”—Mark 8:15-17.

Ibịghike Jesus ọkọnọ ediwak tọsịn owo uyo ẹta ntre akpana mbet esie ẹdiọn̄ọ ke idịghe ata ata uyo ke enye etịn̄ aban̄a. Enye obụp mmọ ete: “Nte mbufo itịghi, ke ini n̄kobụn̄de uyo ition nnọ owo tọsịn ition, mbufo ẹketan̄ mben̄e ẹyọhọ akpasa ifan̄?” Mmọ ẹte enye: “Duopeba.” Jesus afiak obụp mmọ ete: “Ke ini n̄kobụn̄de uyo itiaba nnọ owo tọsịn inan̄, mbufo ẹketan̄ mben̄e ẹyọhọ akpasa udọn̄n̄kpọ ifan̄?” Mmọ ẹbọrọ enye ẹte: “Itiaba.”—Mark 8:18-20.

Jesus obụp ete: “Nso inam mbufo mîfiọkke ite n̄ketịn̄ke ye mbufo mban̄a uyo?” Enye adian do ete: “Edi ẹkpeme mbak leaven mme Pharisee ye mme Sadducee.”—Matthew 16:11.

Ikọ esie edin̄wan̄a mme mbet ndien. Ẹsida leaven ẹnam n̄kpọ ofụt ẹnyụn̄ ẹda ẹnam bred ọtọt. Jesus owụt ke leaven etie nte n̄kpọ emi ekemede ndibiat n̄kpọ. Enye ọdọhọ mbet esie ẹkpeme idem ke “ukpepn̄kpọ mme Pharisee ye mme Sadducee” emi ekemede ndibiat mmọ.—Matthew 16:12.

Kpep N̄kpọ En̄wen

Ndida Ibat Ibat Owo Nnọ Ediwak Owo Udia

Didie ke Jesus ọkọnọ mme Christian ke eyo mme apostle udia eke spirit? Ndi emi owụt nte ẹdinamde mfịn?