Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 23

Jesus Anam Ikpọ Utịben̄kpọ ke Capernaum

Jesus Anam Ikpọ Utịben̄kpọ ke Capernaum

MATTHEW 8:14-17 MARK 1:21-34 LUKE 4:31-41

  • JESUS OSIO OWO DEMON KE IDEM

  • ANAM IDEM ỌSỌN̄ EKA AN̄WAN PETER

Jesus okot owo inan̄—Peter, Andrew, James, ye John—ete ẹdidi mme ọkọ owo. Ndien ke usen Sabbath, kpukpru mmọ ẹka synagogue ke Capernaum. Jesus afiak ekpep n̄kpọ ke synagogue, idem akpa mme owo aban̄a usụn̄ nte enye ekpepde n̄kpọ. Enye ekpep n̄kpọ nte owo emi Abasi ọnọde odudu, ikpepke nte mme scribe.

Owo emi enyenede ndedehe spirit odu ke synagogue ke usen Sabbath emi. Owo oro ofiori do ke synagogue ete: “Nnyịn isan̄a nso ye afo, Jesus eyen Nazareth? Nte afo ekedi ndisobo nnyịn? Mmetịm mfiọk owo emi afo edide, afo edi Edisana Eyen Abasi.” Jesus aduat idiọk spirit emi esịnede owo oro ke idem ete: “Kịbi inua, nyụn̄ wọrọ enye ke idem!”—Mark 1:24, 25.

Ndien ndedehe spirit osio owo oro ọduọk ke isọn̄, esịn̄ede enye onyụn̄ ofiori n̄kpo. Edi ekem ọwọrọ enye ke idem “inyụn̄ inọhọ enye unan.” (Luke 4:35) Idem enen̄ede akpa mme owo ke synagogue tutu mmọ ẹbụp ẹte: ‘Nso idi emi? Enye ada odudu owụk ndedehe spirit, ndien mmọ ẹkop uyo esie.’ (Mark 1:27) Utọ mbụk emi itreke-tre ndisịm kpukpru itie ke Galilee.

Jesus ye mbet esie ẹkpọn̄ synagogue ẹka ufọk Simon, oro edi Peter. Edi ọkpọsọn̄ ufiopidem anam eka an̄wan Peter. Mmọ ẹkpe Jesus ubọk ẹte anam idem ọsọn̄ enye. Jesus aka okomụm enye ubọk ete adaha ada. Ufiopidem oro okụre enye kpa idahaoro. Enye adaha ada ọtọn̄ọ ndinam udia nnọ mmọ.

Ke mbubreyo, mme owo ẹto nsio nsio itie ke obio ẹda mbon udọn̄ọ ẹdi ufọk Peter. Ibịghike-bịghi, ufọk Peter ọyọhọ nte urua. Ntak emi mme owo ẹyọhọde ntem ke ufọk Peter? Mmọ ẹyom ẹkọk udọn̄ọ mmimọ. Bible ọdọhọ ke “kpukpru owo eke ẹnyenede mbon emi ẹdọn̄ọde nsio nsio udọn̄ọ ẹda mmọ ẹsọk enye. Enye odori mmọ kiet kiet ubọk onyụn̄ ọkọk mmọ udọn̄ọ.” (Luke 4:40) Jesus ọkọk kpukpru orụk udọn̄ọ mmọ, kpa nte prọfet Abasi eketịn̄de. (Isaiah 53:4) Enye ama akam ebịn demon osion̄o mme owo ke idem. Ke ini ndiọi spirit emi ẹwọn̄ọde mme owo ke idem, mmọ ẹfiọri ete: “Afo edi Eyen Abasi.” (Luke 4:41) Edi Jesus aduat mmọ, iyakke mmọ ẹsioro uyo aba. Jesus ọfiọk ke ndiọi spirit emi ẹfiọk ke imọ idi Christ, edi enye iyomke etie nte ke mmọ ẹkpono ata Abasi.