Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 33

Prọfesi Isaiah Osu

Prọfesi Isaiah Osu

MATTHEW 12:15-21 MARK 3:7-12

  • OTUOWO ẸBERI JESUS

  • ENYE ANAM PRỌFESI ISAIAH OSU

Ke ini Jesus okopde ke mme Pharisee ye n̄ka mme anditiene Herod ke ẹdiomi ndiwot imọ, enye ye mbet esie ẹkpọn̄ do ẹka Inyan̄ Galilee. Akwa udịmowo ẹto nsio nsio ebiet nte Galilee, mme obio mbenesụk Tyre ye Sidon, edem usiahautịn Akpa Jordan, Jerusalem, ye Idumea emi odude ke usụk usụk, ẹdi ẹbịne enye. Jesus anam idem ọsọn̄ ediwak mmọ. Oro anam mbon oro ẹdọn̄ọde ndiọi udọn̄ọ ẹkanade enye ẹkụk ẹyom nditụk enye. Mmọ ibetke-bet aba enye otụk mmimọ, mmọ ẹkam ẹyom usụn̄ nditụk enye.—Mark 3:9, 10.

Sia otuowo ẹwakde etieti, Jesus ọdọhọ mbet esie ẹnam imọ idụk ekpri ubom. Enye ama odụk ubom, ẹyekeme ndiwat ubom oro ndian̄ade ke mben mmọn̄ mbak mme owo ẹdinen̄ede ẹberi enye. Enye n̄ko eyekeme nditie do n̄kpep mme owo n̄kpọ, mîdịghe ẹmen enye ẹka itie en̄wen ke mbenesụk oro man enye akan̄wam mbon en̄wen.

Matthew ọdọhọ ke utom Jesus anam “se ẹkedade prọfet Isaiah ẹtịn̄” osu. (Matthew 12:17) Ewe prọfesi Isaiah edi emi?

Isaiah ọkọdọhọ ete: “Sese! Asan̄autom mi emi ami mmekde, edima mi, emi ukpọn̄ mi enyịmede! Nyesịn enye spirit mi ke idem, ndien enye ayanam mme idụt ẹfiọk se unenikpe edide. Enye iditọhọke utọk, idinyụn̄ ifiorike n̄kpo, owo idinyụn̄ ikopke uyo esie ke ikpọ efak. Enye idinuakke nnyanyan̄a eke obụn̄ọde, idinyụn̄ inịmeke ikan̄ ọfọn̄ utuenikan̄ eke osiode nsụn̄ikan̄, tutu enye anam unenikpe enyene edikan. Ke akpanikọ, mme idụt ẹyedori enyịn ke enyịn̄ esie.”—Matthew 12:18-21; Isaiah 42:1-4.

Ke akpanikọ, Jesus edi edima asan̄autom emi Abasi emekde. Jesus anam mme idụt ẹfiọk se unenikpe edide. Nsunsu ido ukpono iyakke mme owo ẹfiọk unenikpe. Sia mme Pharisee ẹmade ndiyụrọde Ibet Abasi man ekekem ye ekikere mmọ, mmọ ikemeke ndin̄wam owo oro ọdọn̄ọde ke Sabbath. Jesus owụt ke imọ imenyene spirit Abasi onyụn̄ anam mme owo ẹfiọk se Abasi oyomde mmọ ẹnam, ke ntem, enye obiomode mme owo ọkpọsọn̄ mbiomo, oro edi, anam mmọ ẹtre ndidụk ufụn nnọ ibet owo. Se inamde mme adaiso ido ukpono ẹyom ndiwot enye edi oro. Nso idiọk ntem!

Ndidọhọ ke enye “iditọhọke utọk, idinyụn̄ ifiorike n̄kpo, owo idinyụn̄ ikopke uyo esie ke ikpọ efak” ọwọrọ nso? Ke ini Jesus ọkọkde mme owo udọn̄ọ, m̀mê anamde mme demon ẹwọrọ owo ke idem, enye esinen̄ede akpan “mmọ ete ẹkûnam ẹdiọn̄ọ imọ.” (Mark 3:12) Enye iyomke mme owo ẹsan̄a ke efak ẹfiori n̄kpo man mme owo ẹdiọn̄ọ imọ, inyụn̄ iyomke ẹsan̄a ẹtịn̄ se mîdịghe akpanikọ, utọ nte imọ ndinam n̄kpọ kiet edi mme owo ẹsan̄a ẹtịn̄ ẹte ikanam duop.

N̄kpọ en̄wen edi nte ke Jesus ada etop esie ọsọk mbon oro ẹbietde nnyanyan̄a eke obụn̄ọde, emi ẹfịkde ẹnyụn̄ ẹtịghade ke ikpat. Mmọ ẹbiet ikan̄ ọfọn̄ utuenikan̄ eke osiode nsụn̄ikan̄ nte ọmọn̄ enenịme. Jesus ibụn̄ke utọ ọkpọ nnyanyan̄a oro, inyụn̄ inịmeke utọ utuenikan̄ oro. Utu ke oro, enye owụt ke imekere iban̄a mmọ, onyụn̄ an̄wam mmọ ke ima ima usụn̄. Ke akpanikọ, mme idụt ẹkeme ndidori enyịn ke Jesus!