Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 66

Jesus Odu ke Jerusalem Man Odụk Usọrọ Mme Ataya

Jesus Odu ke Jerusalem Man Odụk Usọrọ Mme Ataya

JOHN 7:11-32

  • JESUS EKPEP MME OWO N̄KPỌ KE TEMPLE

Ata ediwak owo ẹdiọn̄ọ Jesus ke isua ifan̄ emi ẹbede tọn̄ọ enye akana baptism. Ediwak tọsịn mme Jew ẹkụt mme utịben̄kpọ emi enye anamde, ndien mbụk esie asuana ke ofụri obio mmọ. Idahaemi, ediwak owo ẹyoyom enye ke Usọrọ Mme Ataya emi ẹnịmde mi ke Jerusalem.

Mme owo ẹkere n̄kpọ nsio nsio ẹban̄a Jesus. Ndusụk owo ẹdọhọ ẹte: “Enye edi eti owo.” Mmọ eken ẹte: “Idịghe, edi enye otụn otuowo usụn̄.” (John 7:12) Se mme owo ẹtịn̄de edi emi ke otu idemmọ ke ntọn̄ọ ntọn̄ọ usọrọ emi. Edi idụhe eke enyenede esịt etịn̄ eti ikọ aban̄a Jesus ke iso mme owo sia mme owo ẹfefehe se mme adaiso ido ukpono mme Jew ẹdinamde mmọ.

Nte usọrọ osụk akade iso, Jesus aka temple ndikpep mme owo n̄kpọ. Idem akpa ediwak owo ke nte enye ekpepde n̄kpọ. Mme Jew ẹdiọn̄ọ ke akananam enye ikaha ufọkn̄wed mme rabbi, oro anam mmọ ẹbụp ẹte: “Owo emi asan̄a didie ọfiọk ndikot n̄wed, ke ini enye mîkọbọhọ ukpep ke ufọkn̄wed?”—John 7:15.

Jesus ọdọhọ mmọ ete: “Se ami n̄kpepde idịghe okịm, edi enyene enye emi ọkọdọn̄de mi. Edieke owo ekededi oyomde ndinam uduak Esie, enye ọyọfiọk aban̄a ukpepn̄kpọ emi m̀mê oto Abasi, m̀mê ntịn̄ ke ifiọk idemmi.” (John 7:16, 17) Jesus ekpep se isịnede ke Ibet Abasi, ntre akpana mme owo ẹkụt ke enye iyomke ẹtoro imọ, ke akam oyom ẹtoro Abasi.

Jesus adian do ete: “Nte Moses ikọnọhọ mbufo Ibet? Edi baba owo kiet ke otu mbufo inịmke Ibet oro. Nso idi ntak emi mbufo ẹyomde ndiwot mi?” Ndusụk owo ke otuowo oro idiọn̄ọke ke odu mbon emi ẹyomde ndiwot Jesus. Etie nte mmọ ẹdi isenowo ke Jerusalem. In̄wan̄ake mmọ se ikpanamde owo oyom ndiwot owo emi ọdiọn̄ọde ndikpep n̄kpọ ntem. Ntre mmọ ẹkere ke enyene se ifịnade Jesus emi anamde enye ọdọhọ ke ẹyom ndiwowot imọ. Mmọ ẹdọhọ enye ẹte: “Afo emenyene demon. Anie oyom ndiwot fi?”—John 7:19, 20.

Ke nditịm ntịn̄, isua kiet ye ubak ke edem, mme adaiso ido ukpono mme Jew ẹma ẹyom ndiwot Jesus ke enye ama akanam idem ọsọn̄ ete kiet ke Sabbath. Idahaemi Jesus etịn̄ ikọ emi anamde mmọ ẹdiọn̄ọ ke ifọnke mmọ ndiyom ndiwot imọ ke ndinam eti n̄kpọ ke Sabbath. Ibet ọdọhọ ke ana ẹnịm eyen erenowo mbobi ke ọyọhọ usen itiaita, ọkpọkọm usen oro ọduọ ke Sabbath. Jesus obụp mmọ ete: “Edieke owo anade mbobi ke sabbath man okûbiat ibet Moses, ndi mbufo ẹnen̄ede ẹyat esịt ye ami koro nnamde owo okop ọyọhọ nsọn̄idem ke sabbath? Ẹtre ndikpe ikpe nte ẹkụtde ke enyịn, edi ẹkpe edinen ikpe.”—John 7:23, 24.

Mme andidụn̄ Jerusalem emi ẹdiọn̄ọde ke ẹyom ndiwowot Jesus ẹdọhọ ẹte: “Nte idịghe owo emi ke mmọ [mme andikara] ẹyom ndiwot? Ndien kamse! enye ke etịn̄ ikọ an̄wan̄wa, mmọ inyụn̄ itịn̄ke baba ikọ kiet ye enye. Nte mme andikara itịmke ifiọk ite emi edi Christ?” Nso inam ndien ediwak owo mînịmke ke Jesus edi Christ? Mmọ ẹdọhọ ẹte: “Nnyịn imọfiọk ebiet emi owo emi otode; edi ke ini Christ edidide, baba owo kiet idifiọkke ebiet emi enye otode.”—John 7:25-27.

Jesus ada ke temple oro ọdọhọ mmọ ete: “Mbufo ẹmefiọk mi ye ebiet eke ami ntode. N̄ko, ami ndịghe ke odudu idemmi, edi enye emi ọkọdọn̄de mi enen̄ede odu, mbufo inyụn̄ ifiọkke enye. Ami mmọfiọk enye, koro ndide andida ke ibuot esie, ndien Enye okonyụn̄ osio mi ọdọn̄.” (John 7:28, 29) Ke ini ikpọ owo emi ẹkopde ikọ emi, mmọ ẹfiak ẹyom ndimụm Jesus man ẹkesịn ke ufọk-n̄kpọkọbi m̀mê ẹkewot. Edi mmọ ikemeke ndimụm enye sia ini mîkemke kan̄a Jesus ndikpa.

Ediwak owo ẹbuọt idem ye Jesus. Jesus asan̄a ke enyọn̄ mmọn̄, anam oyobio odobo, ada uyo ye iyak ifan̄ ọnọ ediwak tọsịn owo udia, anam idem ọsọn̄ mbon emi ẹdọn̄ọde, anam mbụn̄ọ ẹsan̄a isan̄, anam nnan ẹkụt usụn̄, ọkọk mbon akpamfia udọn̄ọ, onyụn̄ anam mme owo ẹset. Ntre mmọ iduehe ke ndibụp ẹte: “Ke ini Christ edidide, nte enye ayanam mme idiọn̄ọ akan se owo emi anamde?”—John 7:31.

Ke ini mme Pharisee ẹkopde se mme owo ẹtịn̄de emi, mmọ ye mbọn̄ oku ẹdọn̄ mme owo ẹka ẹkemụm Jesus.