Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 67

“Akananam Owo Ndomokiet Itịn̄ke Ikọ Ntem”

“Akananam Owo Ndomokiet Itịn̄ke Ikọ Ntem”

JOHN 7:32-52

  • ẸDỌN̄ MME ASAN̄AUTOM ẸKEMỤM JESUS

  • NICODEMUS ETỊN̄ IKỌ KE IBUOT JESUS

Jesus osụk ododu ke Jerusalem odụk Usọrọ Mme Ataya. Esịt enem enye nte ‘ediwak owo ẹbuọtde idem ye enye.’ Edi esịt inemke mme adaiso ido ukpono, ntre mmọ ẹdọn̄ mme asan̄autom emi ẹnyụn̄ ẹtiede nte mme bodisi ẹkemụm enye. (John 7:31, 32) Jesus ọdiọn̄ọ ke ẹmọn̄ ẹmụm imọ, edi enye idịbeke.

Utu ke Jesus ndidedịbe, enye ekpep mme owo n̄kpọ an̄wan̄wa ke Jerusalem, onyụn̄ ọdọhọ mmọ ete: “Nyaka iso ndu ye mbufo ke esisịt ini mbemiso nnyọn̄de mbịne enye emi ọkọdọn̄de mi. Mbufo ẹyeyom mi, edi mbufo idikwe mi, ndien ebiet emi ami ndude mbufo ikemeke ndidi.” (John 7:33, 34) Ikọ emi in̄wan̄ake mme Jew, ntre mmọ ẹdọhọ ke otu idemmọ ẹte: “M̀mọ̀n̄ ke owo emi aduak ndika emi nnyịn mîdikwe enye? Nte enye aduak ndika mbịne mme Jew emi ẹsuanade ẹdụn̄ọ ke otu mme Greek nnyụn̄ n̄kekpep mme Greek n̄kpọ? Nso ke ikọ emi ọwọrọ, emi enye ọdọhọde ete, ‘Mbufo ẹyeyom mi, edi mbufo idikwe mi, ndien ebiet emi ami ndude mbufo idikemeke ndidi’?” (John 7:35, 36) Jesus etịn̄ aban̄a n̄kpa esie ye ini emi enye edisetde ika heaven. Mme asua esie idikemeke nditiene enye n̄ka do.

Ọyọhọ usen usọrọ itiaba edisịm. Se Jesus oyomde nditịn̄ idahaemi ọmọn̄ eti mme owo se oku esinamde kpukpru usenubọk ke ini usọrọ emi. Oku esika okokoi mmọn̄ ke N̄kpọdiọhọ Mmọn̄ Siloam ediduọk ke itieuwa man enye ewet ekesịm ukot itieuwa. Jesus ọdọhọ ete: “Edieke owo ekededi okopde nsatitọn̄, yak enye edi ebịne mi edin̄wọn̄ mmọn̄. Owo eke ọbuọtde idem ye ami, kpa nte N̄wed Abasi ọdọhọde, ‘Idịm mmọn̄ uwem oyoto enye ke ata esịtidem ewet ọwọrọ.’”—John 7:37, 38.

Ikọ Jesus oro aban̄a se iditịbede ke ini ẹdidade edisana spirit iyet mme mbet esie aran ẹnyụn̄ ẹmek mmọ ndika n̄kakara ke heaven. Ẹditọn̄ọ ndiyet mmọ aran ke Jesus ama akakpa. Ọtọn̄ọde ke usen Pentecost isua oro eketienede, idịm mmọn̄ uwem emi ama ọtọn̄ọ ndiwet n̄wọrọ ke ini mme mbet emi ẹkedade spirit ẹyet aran ẹkekwọrọde ikọ ẹnọ mme owo.

Ke ini mme owo ẹkopde se Jesus ekpepde emi, ndusụk mmọ ẹdọhọ ẹte: “Ke akpanikọ, owo emi edi Prọfet oro.” Etie nte prọfet emi mmọ ẹtịn̄de mi edi enye oro ẹkedọhọde ke oyokpon akan Moses. Mbon en̄wen ẹdọhọ ẹte: “Emi edi Christ.” Edi ndusụk owo ẹdọhọ ẹte: “Nte Christ ke akpanikọ ediwọrọ oto Galilee? Nte N̄wed Abasi idọhọke ite ke Christ ediwọrọ oto eyen David, onyụn̄ oto ke Bethlehem kpa obio-in̄wan̄ emi David ekesidude?”—John 7:40-42.

Ọwọrọ otuowo ẹkere nsio nsio n̄kpọ ẹban̄a Jesus. Kpa ye emi ndusụk owo ẹyomde ẹmụm Jesus, idụhe eke otụkde enye ubọk. Ke ini mme asan̄autom emi ẹkedọn̄de ẹkemụm Jesus ẹnyọn̄de ẹdi ubọk ubọk, mbọn̄ oku ye mme Pharisee ẹbụp mmọ ẹte: “Nso idi ntak emi mbufo mîdaha enye idi?” Mme asan̄autom oro ẹbọrọ ẹte: “Akananam owo ndomokiet itịn̄ke ikọ ntem.” Esịt ayat mme adaiso ido ukpono oro. Mmọ ẹtọn̄ọ ndisak nnyụn̄ nsụn̄i mme asan̄autom oro. Mmọ ẹdọhọ ẹte: “Nte ẹtụn mbufo usụn̄ n̄ko? Ndi ndomo owo kiet ke otu mme andikara m̀mê mme Pharisee ọbuọt idem ye enye? Edi otuowo emi mîfiọkke Ibet mi ẹdi mbon oro ẹma ẹkesụn̄i.”—John 7:45-49.

Ini emi ke Nicodemus emi edide Pharisee onyụn̄ edide owo Sanhedrin osioro uyo etịn̄ ikọ ke ibuot Jesus. Ke isua iba ye ubak ke edem, Nicodemus ama aka ebịne Jesus ke okoneyo ọkọdọhọ ke imọbuọt idem ye enye. Nicodemus ọdọhọ mmọ ete: “Ndi Ibet nnyịn obiom owo ikpe ke owo mîbemke iso ikop ikọ ito enye inyụn̄ ifiọk se enye anamde?” Mmọ ẹyom se ẹtịn̄de ẹnyan̄a idem ẹte: “Ndi afo n̄ko oto Galilee? Dụn̄ọde ke oyokụt ete prọfet ndomokiet iwọrọke ito Galilee.”—John 7:51, 52.

N̄wed Abasi itịn̄ke nnennen nnennen ite ke prọfet ndomokiet oyoto Galilee. Edi Ikọ Abasi ama etịn̄ n̄kpọ emi owụtde ke Christ edito do; enye ọkọdọhọ ke “akwa un̄wana” ayayama ke “Galilee mme idụt.” (Isaiah 9:1, 2; Matthew 4:13-17) Jesus akamana ke Bethlehem onyụn̄ edi eyen David kpa nte ẹma ẹketetịn̄ n̄ko ke N̄wed Abasi. Kpa ye emi edide mme Pharisee ẹdiọn̄ọ kpukpru emi, etie nte mmọ ẹnam mme owo ẹkere ediwak ndiọi n̄kpọ ẹban̄a Jesus.