Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 79

Ntak Ẹdisobode Mme Jew Oro Mînịmke ke Akpanikọ

Ntak Ẹdisobode Mme Jew Oro Mînịmke ke Akpanikọ

LUKE 13:1-21

  • JESUS ADA N̄KPỌ IBA EMI ẸKETỊBEDE EKPEP MME OWO N̄KPỌ

  • ANAM UDỌN̄Ọ OKỤRE MMA KIET KE SABBATH

Jesus odomo ke nsio nsio usụn̄ ndinam mme owo ẹkere ẹban̄a nte mmọ ẹnamde n̄kpọ Abasi. N̄kpọ en̄wen etịbe emi afiakde ada nneme emi edi ke mmọ ẹma ẹkewọrọ ke ufọk Pharisee kiet.

Ndusụk owo ẹtịn̄ ẹban̄a n̄kpọ mmọn̄eyet kiet emi eketịbede. Mmọ ẹtịn̄ “ẹban̄a mbon Galilee emi [Pontius] Pilate akadade iyịp mmọ abuak ye uwa mmọ.” (Luke 13:1) Nso ke utọ ikọ oro ọwọrọ?

Etie nte mbon Galilee emi ẹdi mbon emi ẹkewotde ke ini ediwak mme Jew ẹkesịnde ntịme ẹdọhọ ke mmimọ inyịmeke Pilate osio okụk emi ẹsitịpde ke temple ada anam ekwa emi edimende mmọn̄ idụk Jerusalem. Edi etie nte ikpọ owo temple ẹma ẹnyịme Pilate ada okụk emi anam n̄kpọ emi. Ekeme ndidi mbon emi ẹbụkde mbụk emi ẹnọ Jesus ẹkere ke mbon Galilee oro ẹkekpan̄a ke ntak idiọkn̄kpọ mmọ. Edi Jesus inyịmeke se mmọ ẹtịn̄de oro.

Enye obụp mmọ ete: “Nte mbufo ẹkere ke mbon Galilee emi ẹma ẹdiọk ẹkan ofụri mbon Galilee eken koro mme n̄kpọ emi ẹkesịmde mmọ?” Jesus ọdiọn̄ọ ke idịghe ntre. Enye ada n̄kpọntịbe emi odụri mme Jew utọn̄ ete: “Ke mbufo mîkabakede esịt, kpukpru mbufo ẹyetak kpasụk ntre.” (Luke 13:2, 3) Jesus etịn̄ n̄kpọ mmọn̄eyet en̄wen emi osụk etịbede ndondo emi. Etie nte enye oro eketịbe n̄ko ke ini ẹsụk ẹnamde ekwa mmọn̄ oro. Enye obụp ete:

“Owo efịteta emi tọwa Siloam ọkọduọde ọtọ, onyụn̄ owotde mmọ, nte mbufo ẹkere ke mmọ ẹkama isọn eke okponde akan eke kpukpru owo eken emi ẹdụn̄de ke Jerusalem?” (Luke 13:4) Ekeme ndidi otuowo emi ẹkere ke mme owo emi ẹkekpan̄a ke ntak idiọkido mmọ. Jesus isụk inyịmeke utọ ekikere emi. Enye ọdiọn̄ọ ke mme “n̄kpọntịbe unana idotenyịn” ẹsinyụn̄ ẹdi ntak utọ n̄kpọ mmọn̄eyet emi. (Ecclesiastes 9:11) Akpana mme owo emi ẹkpep n̄kpọ ẹto n̄kpọntịbe emi. Jesus ọdọhọ mmọ ete: “Ke mbufo mîkabakede esịt, kpukpru mbufo ẹyetak kpasụk ntre.” (Luke 13:5) Edi nso inam Jesus ọsọn̄ọ etịn̄ n̄kpọ emi idahaemi?

Edi ke ntak emi ini emi osụk osụhọde enye ndida n̄kwọrọ ikọ mîwakke aba. Ntre enye ọnọ mmọ uwụtn̄kpọ emi: “Owo kiet ekenyene eto fig emi ẹtọde ke in̄wan̄ vine esie, enye onyụn̄ edi ediyom mfri ke esịt, edi ikwe. Ndien enye ọdọhọ ọdiọn̄ vine ete, ‘Sese isua ita ẹdi emi n̄kasan̄a nyom mfri ke eto fig emi, edi n̄kwe. Kpi enye duọk! Ntak emi enye adade abiat isọn̄?’ Ọdiọn̄ vine oro ọbọrọ enye ete, ‘Eteufọk, yak enye ada isua emi n̄ko, tutu ntịbi isọn̄ n̄kanade enye n̄kụk nnyụn̄ nduọn̄ọ mbio ke esịt; ndien edieke enye edin̄wụmde mfri ke ini iso, eyetịm ọfọn; edi edieke mîn̄wụmke, afo eyekpi enye ọduọk.’”—Luke 13:6-9.

Ke se ibede isua ita idahaemi, Jesus esịn idem an̄wam mme Jew ẹnyene mbuọtidem. Edi ibat ibat owo ẹdi mbet esie ke adan̄a ofụri utom emi enye anamde. Idahaemi ke ọyọhọ isua inan̄ emi enye anamde utom ukwọrọikọ, enye ke enen̄ede esịn ukeme. Eketie nte n̄kpọ emi enye etịbide isọn̄ akanade mme Jew, emi eto fig oro akadade aban̄a, okụk onyụn̄ ọduọn̄ọ mbio ke esịt ke ndikwọrọ ikọ nnyụn̄ n̄kpep mme owo n̄kpọ ke Judea ye Perea. Edi nso ikedi utịp? Mbon Jew ifan̄ kpọt ẹnam n̄kpọ ẹban̄a ukwọrọikọ esie. Ata ediwak mme Jew inyịmeke ndikabade esịt, ndien ana ẹsobo mmọ.

Sia ata ediwak mmọ mîmaha ndikabade esịt, mmọ ẹfiak ẹwụt emi esisịt ini ke oro ebede, ke usen Sabbath. Jesus ke osụk ekpep n̄kpọ ke synagogue. Enye okụt mma kiet emi onụhọde ke isua 18 ke ntak emi demon otụhọrede enye. Mbọm mma emi anam Jesus, enye onyụn̄ ọdọhọ enye ete: “N̄wan owo, ẹsana fi ke mmemidem fo ẹyak.” (Luke 13:12) Jesus odori enye ubọk, ndien kpa idahaoro enye enen̄ede ada onyụn̄ ọtọn̄ọ ndinọ Abasi ubọn̄.

N̄kpọ emi ayat akwa owo emi etiede ibuot ke synagogue oro esịt, enye onyụn̄ ọdọhọ ete: “Usen itiokiet ẹdu oro ẹkpenamde utom; ntre mbufo ẹdi ke mme usen oro man ẹnam udọn̄ọ ẹkụre mbufo, ẹkûdi ke usen sabbath.” (Luke 13:14) Ete oro idọhọke ke Jesus inyeneke odudu ndikọk mme owo udọn̄ọ; utu ke oro, enye okụt ndudue ọnọ mme owo ndimen udọn̄ọ mmọ mbịne Jesus ke Sabbath! Jesus obụp mmọ mbụme emi anamde owo ekere n̄kpọ mi ete: “Mbon mbubịk, nte mbufo owo kiet kiet isitatke enan̄ m̀mê ass mbufo ke ufọk ufene ke sabbath ida iwọrọ ikọnọ mmọn̄ ọn̄wọn̄? Nte ini ikemke nte ẹkpetatde n̄wan emi edide eyen Abraham mi n̄kpọkọbi emi ke usen sabbath, kpa n̄wan emi Satan ọkọbọpde ke ofụri isua efịteta emi?”—Luke 13:15, 16.

Bụt anam mme andibiọn̄ọ emi, edi esịt enem otuowo ndikụt ikpọ n̄kpọ emi Jesus anamde. Ekem Jesus afiak etie ke Judea ọnọ uwụtn̄kpọ iba oro ẹban̄ade Obio Ubọn̄, emi enye ama ọkọnọnọ ke ini etiede ke esịt ubom ke Inyan̄ Galilee.—Matthew 13:31-33; Luke 13:18-21.