Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 75

Jesus Etịn̄ Se Idinamde Owo Okop Inemesịt

Jesus Etịn̄ Se Idinamde Owo Okop Inemesịt

LUKE 11:14-36

  • ẸDA “NNUENUBỌK ABASI” ẸBỊN MME DEMON

  • SE IDINAMDE OWO OKOP INEMESỊT

Ibịghike Jesus akafiak ekpep mme owo nte ẹkpebọn̄de akam, edi idịghe n̄kpọ enye emi ikpọn̄ edi se enye afiakde etịn̄ aban̄a ke ini ukwọrọikọ esie. Ke ini Jesus akanamde utịben̄kpọ ke Galilee, mme owo ẹkedọhọ ke enye ada odudu andikara mme demon anam mme utịben̄kpọ oro. Ẹfiak ẹtịn̄ ukem ikọ emi ye enye ke Judea.

Enyene ete kiet emi demon esịnede enye ke idem inyụn̄ iyakke enye etịn̄ ikọ. Ke ini Jesus anamde demon ọwọrọ enye ke idem, idem akpa otuowo. Edi idem ikpaha mbon emi ẹyomde ndikụt ndudue nnọ Jesus. Mmọ ẹdori enye ikọ ẹte: “Enye ada Beelzebub, andikara mme demon, ebịn mme demon.” (Luke 11:15) Mbon en̄wen ẹdọhọ Jesus owụt mmimọ idiọn̄ọ emi otode heaven man mmimọ ida oro idiọn̄ọ owo emi enye edide.

Jesus ọdiọn̄ọ ke mmọ ẹdodomo imọ, ntre enye ọbọrọ mmọ se enye ọkọbọrọde mbon Galilee. Enye ọdọhọ mmọ ke obio ubọn̄ ekededi emi mîdianake kiet idibịghike. Enye aka iso ete: “Edieke Satan n̄ko abaharede ada an̄wana ye idemesie, didie ke obio ubọn̄ esie edisọn̄ọ ada?” Jesus adian do ete: “Edieke edide nda nnuenubọk Abasi mbịn mme demon, obio ubọn̄ Abasi esesịm mbufo.”—Luke 11:18-20.

Akpana “nnuenubọk Abasi” emi Jesus etịn̄de aban̄a mi anam mme owo ẹti se iketịbede ke mbụk nditọ Israel ke ata edem edem. Ke ini Moses akanamde utịben̄kpọ ke esịt okụre Pharaoh, mbon emi ẹkedude do ẹma ẹdọhọ ẹte: “Emi edi nnuenubọk Abasi!” “Nnuenubọk Abasi” oro ekewet Ibet Duop ke itiatn̄wed iba. (Exodus 8:19; 31:18) Kpa “nnuenubọk Abasi,” oro edi, edisana spirit esie, anam Jesus ekeme ndibịn demon nsio owo ke idem nnyụn̄ nnam idem ọsọn̄ owo. Obio Ubọn̄ Abasi esesịm mbon emi ẹsuade Jesus mi, sia Jesus emi edide Edidem Obio Ubọn̄ oro, ada oro ye mmọ anam utịben̄kpọ.

Jesus ndibịn demon nsio owo ke idem owụt ke enye enyene odudu akan Satan. Se enye anamde etie nte owo emi okopde odudu ndika n̄kan̄wana ye ekpeme ufọk ubọn̄, akan enye, onyụn̄ ebe odụk ufọk ubọn̄ oro. Jesus afiak ọnọ uwụtn̄kpọ emi aban̄ade owo emi ndedehe spirit ọwọrọde enye ke idem. Edieke owo oro mîtan̄ke nti n̄kpọ idọn̄ ke esịt esie, spirit emi ọkọwọrọde enye ke idem ayasan̄a ye ndedehe spirit itiaba en̄wen afiak edi, ndien se idiwọrọde owo oro isan̄ enye emi ọyọdiọk akan eke akpa. (Matthew 12:22, 25-29, 43-45) Se iwọrọde nditọ Israel edi oro.

Se Jesus etịn̄de anam mma kiet ke otuowo ọdọhọ enye ete: “Idịbi emi akamande fi ye eba emi afo akawapde ẹkop inemesịt!” Iban Jew ẹkesibọbọn̄ akam ẹyom ndidi eka prọfet. Enye emi mmọ ẹkeyomde ẹkan ekedi ndidi eka Messiah. Oro anam mma emi ekere ke esịt enem Mary etieti ndidi eka owo emi ekpepde n̄kpọ ntem. Edi Jesus etịn̄ ikọ emi anamde mma oro ọdiọn̄ọ se idinamde owo okop inemesịt. Enye ọdọhọ ete: “Baba, akam edi mbon oro ẹkopde ikọ Abasi ẹnyụn̄ ẹnamde enye ẹkop inemesịt!” (Luke 11:27, 28) Jesus ikọdọhọke mme owo ẹsikpono Mary nte Abasi. Idịghe owo ndidi iman ọwọrọetop owo m̀mê owo ndiwọrọ etop edinam enye okop inemesịt. Owo ndidi ata asan̄autom Abasi edinam owo okop inemesịt.

Jesus asua ọnọ mbon emi ẹdọhọde enye owụt mmimọ idiọn̄ọ emi otode heaven. Se enye akanamde ke Galilee edi emi n̄ko. Enye ọdọhọ ke n̄kukụre idiọn̄ọ emi ẹdinọde mmọ edi “idiọn̄ọ Jonah.” Jonah ndikesịne ke idịbi iyak usen ita ye enye ndikọkwọrọ ikọ uko uko tutu mbon Nineveh ẹkabade esịt edi idiọn̄ọ oro. Jesus ọdọhọ ete: “Edi, sese! se ikponde ikan Jonah odu mi.” (Luke 11:29-32) Jesus okpon akan Solomon n̄ko emi ọbọn̄ an̄wan Sheba okokopde mbụk ọniọn̄ esie edi ndise.

Jesus adian do ete: “Owo idomoke utuenikan̄ inịm ke ubet unịm n̄kpọ m̀mê ndimen aban̄ mfụk, edi ẹwụk ke uwụk utuenikan̄.” (Luke 11:33) Ikọ Jesus ekeme ndiwọrọ ke ndikpep n̄kpọ nnyụn̄ nnam mme utịben̄kpọ ke iso mbon emi etie nte ndidịp un̄wana ikan̄. Mme n̄kpọ emi inyeneke ufọn inọ mmọ sia mmọ mînen̄ekede ikụt se enye anamde.

Ibịghike Jesus akanam demon ọwọrọ owo ke idem. Demon emi ikayakke ete oro ekeme nditịn̄ ikọ. Akpana oro anam mme owo ẹtoro Jehovah Abasi ẹnyụn̄ ẹtịn̄ se enye anamde ẹnọ mbon en̄wen. Jesus ọdọhọ mbon emi ẹkụtde ndudue ẹnọ enye ete: “Ke ntre, kpeme idem, mbak un̄wana eke odude fi ke idem edidi ekịm. Ntre, edieke ofụri idem fo ayamade, baba nde kiet mînyụn̄ ikịmke, enye ayayama ofụri ofụri nte emi utuenikan̄ ayamade ọnọ fi un̄wana.”—Luke 11:35, 36.

Kpep N̄kpọ En̄wen

Mary—“Look! Jehovah’s Slave Girl!”

What does Mary’s response to the angel Gabriel reveal about her faith? What other valuable qualities did she display?