Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 71

Mme Pharisee Ẹfak Owo Emi Ekedide Nnan Mbụme

Mme Pharisee Ẹfak Owo Emi Ekedide Nnan Mbụme

JOHN 9:19-41

  • MME PHARISEE ẸFAK OWO EMI EKEDIDE NNAN MBỤME

  • MME ADAISO IDO UKPONO ẸDI “NNAN”

Mme Pharisee imaha ndinyịme ke Jesus anam ete oro akamanade nnan do okụt usụn̄, ntre mmọ ẹdọn̄ ẹkot ete ye eka esie ẹdi. Ete ye eka owo emi ẹdiọn̄ọ ke ẹkeme ‘ndibịn mmimọ nsio ke synagogue’ ke ntak n̄kpọ emi. (John 9:22) Edieke ẹbịnde mmọ ẹsio, uwem ọyọsọn̄ ye mmọ, idụhe eke edinyụn̄ amade ndidian idem ye mmọ aba.

Mme Pharisee ẹbụp mmọ mbụme iba emi: “Ndi eyen mbufo emi mbufo ẹdọhọde ke enye akamana nnan edi emi? Enye asan̄a didie, ndien, okụt usụn̄ idahaemi?” Ete ye eka owo oro ẹbọrọ ẹte: “Nnyịn imọfiọk ite ke eyen nnyịn edi emi ye nte ke enye akamana nnan. Edi nte enye asan̄ade okụt usụn̄ nnyịn ifiọkke, nnyịn inyụn̄ ifiọkke m̀mê anie akatat enye enyịn.” Ekpededi eyen mmọ ama etịn̄ nte enye akasan̄ade okụt usụn̄ ọnọ mmọ, mmọ ẹdikpekpeme se ẹtịn̄de. Mmọ ẹdọhọ ẹte: “Mbufo ẹbụp enye. Enye okpon ekem. Yak enye etịn̄ ikọ idemesie.”—John 9:19-21.

Mme Pharisee ẹfiak ẹkot owo oro edi. Mmọ ẹtịn̄ idiọk ikọ ẹdian Jesus man ndịk anam enye. Mmọ ẹte enye: “Nọ Abasi ubọn̄; nnyịn imọfiọk ite owo emi edi anamidiọk.” Ete oro imaha ndifan̄a ikọ oro ye mmọ, utu ke oro enye ọdọhọ mmọ ete: “M̀mê enye edi anamidiọk ami mfiọkke. N̄kpọ kiet ke ami mfiọk, nte, n̄kedi nnan, idahaemi mmokụt usụn̄.”—John 9:24, 25.

Edi isụk ikemke-kem mme Pharisee, ntre mmọ ẹka iso ẹbụp enye ẹte: “Nso ke enye akanam ye afo? Enye akasan̄a didie atat fi enyịn?” Ete oro ọbọrọ mmọ uko uko ete: “Mma ntetịn̄ nnọ mbufo, edi mbufo ikopke. Nso idi ntak emi mbufo ẹyomde ndifiak n̄kop? Nte mbufo n̄ko ẹyom ndikabade ndi mbet esie?” Ikọ oro ayat mme Pharisee, mmọ ẹnyụn̄ ẹdọhọ enye ẹte: “Afo edi mbet owo oro, edi nnyịn idi mbet Moses. Nnyịn imọfiọk ite Abasi ama etịn̄ ikọ ye Moses; edi amaedi owo emi, nnyịn ifiọkke ebiet eke enye otode.”—John 9:26-29.

Eben̄e eben̄e oro etịn̄ ke n̄kpaidem ete: “Ke akpanikọ emi edi utịben̄kpọ, nte ke mbufo ifiọkke ebiet eke enye otode, edi enye ama atat mi enyịn.” Ete emi etịn̄ ikọ emi akpanamde ẹdiọn̄ọ utọ owo emi Abasi amade onyụn̄ okopde uyo esie. Enye ọdọhọ ẹte: “Nnyịn imọfiọk ite Abasi ikpan̄ke utọn̄ inọ mme anamidiọk, edi edieke owo ekededi abakde Abasi onyụn̄ anamde uduak esie, enye akpan̄ utọn̄ ọnọ owo oro. Toto ke eset akananam owo ikopke ite owo ekededi atat enyịn owo emi akamanade nnan.” Emi anam eben̄e eben̄e oro ọdọhọ ke “edieke owo emi mîkpotoho Abasi, enye ikpanamke baba n̄kpọ kiet.”—John 9:30-33.

Mme Pharisee inyeneke se ẹbọrọde eben̄e eben̄e emi aba, ntre mmọ ẹsụn̄i enye ẹte: “Afo akamana ke idiọkn̄kpọ ofụri ofụri, ndien ndi afo ekpep nnyịn n̄kpọ?” Mmọ ndien ẹbịn enye ẹsio.—John 9:34.

Ke ini Jesus okopde se itịbede, enye oyom ete oro okụt onyụn̄ obụp enye ete: “Nte afo ọmọbuọt idem ye Eyen owo?” Ete oro ọbọrọ ete: “Ete, enye edi anie, man mbuọt idem ye enye?” Jesus ọdọhọ enye ete: “Afo omokụt enye ndien, akan oro, enye edi owo emi etịn̄de ikọ ye afo.”—John 9:35-37.

Ete oro ọdọhọ ete: “Mmọbuọt idem ye enye, Ọbọn̄.” Enye onụhọ ọnọ Jesus man owụt ke imokpono enye inyụn̄ ibuọt idem ke enye. Jesus ọdọhọ ete: “N̄kedi ke ererimbot emi kaban̄a ubiereikpe emi: man mbon emi mîkwe usụn̄ ẹkpekụt ndien mbon emi ẹkụtde ẹkpekabade ẹdi nnan.”—John 9:38, 39.

Mme Pharisee emi ẹdude do ke ini Jesus etịn̄de ikọ emi ẹdiọn̄ọ ke mmimọ idịghe nnan. Edi ndi mmọ ẹnam utom mmọ? Ndi mmọ ẹn̄wam mme owo ẹdiọn̄ọ Abasi? Mmọ ẹdomo ndinyan̄a idem ẹte: “Nnyịn n̄ko idịghe nnan, nte imedi?” Jesus ọbọrọ mmọ ete: “Edieke mbufo ẹkpedide nnan, mbufo ikpenyeneke idiọkn̄kpọ. Edi mbufo ke emi ẹdọhọ ẹte, ‘Nnyịn imokụt usụn̄.’ Idiọkn̄kpọ mbufo osụk ododu.” (John 9:40, 41) Ekpedi mmọ ikedịghe mme andikpep ke Israel ke ini mmọ ẹdọhọde ke Jesus idịghe Messiah, ikọ ikpodụhe. Edi mmọ ndidiọn̄ọ Ibet, edi ẹfiak ẹsịn Jesus ọwọrọ ke mmọ ẹnam ata akwa idiọkn̄kpọ.