Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 73

Owo Samaria Owụt ke Imọ Idi Ata Mbọhọidụn̄

Owo Samaria Owụt ke Imọ Idi Ata Mbọhọidụn̄

LUKE 10:25-37

  • SE OWO AKPANAMDE MAN ENYENE NSINSI UWEM

  • OWO SAMARIA EMI EKEDIDE ETI MBỌHỌIDỤN̄

Ini Jesus osụk odude ekpere Jerusalem, mme Jew ẹdi ẹbịne enye. Ndusụk mmọ ẹdi ndikpep n̄kpọ, mbon eken ẹdi ndidomo enye idomo. Owo kiet do emi ọfiọkde Ibet obụp enye ete: “Andikpep, ndinam nso man nnyene nsinsi uwem?”—Luke 10:25.

Jesus ọdiọn̄ọ ke ete emi ibụpke mbụme emi man ọdiọn̄ọ. Etie nte enye oyom Jesus etịn̄ n̄kpọ emi ediyatde mme Jew. Edi Jesus ọdiọn̄ọ ke ete oro ọfọfiọk se enye akpanamde ntre Jesus obụp enye mbụme n̄ko man enye etịn̄ se isịnede enye ke esịt.

Jesus obụp enye ete: “Ẹwet nso ke Ibet? Afo okot didie?” Ete emi ọdiọn̄ọ Ibet Abasi ntre enye etịn̄ se Ibet etịn̄de. Enye etịn̄ se idude ke Deuteronomy 6:5 ye Leviticus 19:18, emi ọdọhọde ete: “‘Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ukeme fo ye ke ofụri ekikere fo,’ onyụn̄ ‘ama mbọhọidụn̄ fo nte idemfo.’” (Luke 10:26, 27) Ndi ibọrọ mbụme ete oro edi oro?

Jesus ọdọhọ enye ete: “Afo ọmọbọrọ nte enende; ‘ka iso nam emi ndien afo eyenyene uwem.’” Ndi nneme oro etre do? Idịghe utọ ibọrọ oro ke ete oro oyom. Enye oyom “ndiwụt ete imọ imenen,” onyụn̄ oyom Jesus ada inua esie ọdọhọ ke se imọ ikerede enen, ke nte imọ isinyụn̄ inamde n̄kpọ ye mbon en̄wen enen n̄ko. Ete oro obụp Jesus ete: “Anie edi mbọhọidụn̄ mi nan̄a?” (Luke 10:28, 29) Mbụme oro ekeme ndida ikọ ndi. Ntak idọhọde ntre?

Mme Jew ẹnịm ke “mbọhọidụn̄” mmimọ edi owo emi anamde n̄kpọ nte mmimọ isinamde. Etie nte se idude ke Leviticus 19:18 ọsọn̄ọ se mmọ ẹnịmde emi. Eyen Jew ekeme ndidọhọ ke “ibet inyịmeke” mmimọ idian idem ye owo emi mîdịghe Jew. (Utom 10:28) Ntre, etie nte ete emi ye idem ndusụk mbet Jesus ẹda idem ke edinen ke ini mmọ enamde n̄kpọ ọfọn ye nditọ mmọ. Edi mmọ ẹkeme ndidiọk ido ye owo emi mîdịghe Jew sia mmọ mîdaha enye nte “mbọhọidụn̄.”

Didie ke Jesus edibọrọ mbụme ete emi ke usụn̄ emi mîdiyatke enye m̀mê mme Jew eken? Jesus obụk mbụk kiet ete: “Owo kiet okoto Jerusalem osụhọde aka Jericho ndien ọkọduọ ke ubọk mbon n̄wo, emi ẹkesion̄ode enye ọfọn̄ ke idem ẹnyụn̄ ẹmiade enye, ndien ẹdaha ẹkpọn̄ enye, enye onyụn̄ ekpere ndikpa.” Enye aka iso ete: “Ke ukem ini oro, oku kiet osụhọde edi ke usụn̄ oro, ndien, ke ini okụtde enye, asan̄a ebe ke n̄kan̄ eken. Kpasụk ntre, eyen Levi kiet osụhọde esịm ebiet oro, okụt enye, onyụn̄ asan̄a ebe ke n̄kan̄ eken. Edi owo Samaria kiet emi asan̄ade ke usụn̄ oro edisịm ebiet emi enye odude, okụt enye, mbọm onyụn̄ anam enye.”—Luke 10:30-33.

Ete emi Jesus obụkde mbụk emi ọnọ ọdiọn̄ọ ke ediwak mme oku ye mme Levite emi ẹsinamde utom ke temple ẹdụn̄ ke Jericho. Mmọ ẹsisan̄a n̄kpọ nte itiat 14 ẹto temple ẹnyọn̄ ufọk. Usụn̄ oro esinyene ndịk, mbon n̄wo ẹsida do n̄ko. Edieke oku ye Levite ẹkpekụtde eyen edem mmọ nte enyenede mfịna, akpana mmọ ẹtuak ẹda ẹn̄wam enye. Edi nte Jesus obụkde, mmọ ikadaha in̄wam enye. Owo Samaria emi mme Jew mîdaha-da nte n̄kpọ kpọt akatuak ada an̄wam enye.—John 8:48.

Didie ke owo Samaria oro akan̄wam eyen Jew oro? Jesus aka iso ete: “Enye asan̄a ekpere, ọtọhọ aran ye wine ke unan esie, onyụn̄ ọbọp mmọ. Ndien emen enye odori ke enan̄ esiemmọ onyụn̄ ada enye aka ufọkisen onyụn̄ ese aban̄a enye. Ndien ke ndan̄nsiere enye osio denarius iba ọnọ enyene ufọkisen, onyụn̄ ọdọhọ ete, ‘Se enye enyịn, ndien se ededi emi edibiatde akan oro, nyosio nnọ fi mma mfiak ndi mi.’”—Luke 10:34, 35.

Ke Jesus emi edide Akwa Andikpep ama okobụk mbụk emi ama, enye obụp ete oro ete: “Anie ke otu owo ita oro ke afo ekere ke edi mbọhọidụn̄ owo emi ọkọduọde ke ubọk mbon n̄wo?” Ete oro ọbọrọ ete: “Owo emi akatuade enye mbọm.” Etie nte enye iyomke ndidọhọ “owo Samaria.” Jesus ndien ọdọhọ enye ete: “Afo ka kanam kpasụk ntre.” Ikọ emi ke Jesus ada owụt enye se enye akpanamde.—Luke 10:36, 37.

Idụhe mfọnn̄kan usụn̄ en̄wen emi Jesus ekpekpepde n̄kpọ emi akan emi. Ekpedi Jesus ọkọdọhọ ete oro ke mbon emi mîdịghe mme Jew ẹdi mme mbọhọidụn̄ esie n̄ko, ndi ete oro ye mme Jew eken emi ẹkesụk ẹkpan̄de utọn̄ ke nneme oro ẹkpenyịme? Etie nte mmọ ikpenyịmeke. Edi ekpri mbụk oro Jesus obụkde do esịn mme n̄kpọ emi mme owo oro ẹdiọn̄ọde, anam mmọ ẹdiọn̄ọ owo emi edide mbọhọidụn̄ mmọ. Owo emi edide ata mbọhọidụn̄ edi owo emi amade owo en̄wen onyụn̄ ọfọnde ido ye enye nte Ikọ Abasi ọdọhọde.

Kpep N̄kpọ En̄wen

“Afo Enyene Ndima Mbọhọidụn̄ Fo Nte Idemfo”

Nso ke ikọ Jesus ọkọwọrọ ke ini enye ọkọdọhọde ke inyene ndima mbọhọidụn̄ nnyịn? Didie ke ikeme ndinam emi?