Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 74

Jesus Ekpep N̄kpọ Aban̄a Ukama Isen ye Akam

Jesus Ekpep N̄kpọ Aban̄a Ukama Isen ye Akam

LUKE 10:38–11:13

  • JESUS AKA EKESE MARTHA YE MARY

  • OYOM ẸBỌN̄ AKAM KE UBỌK KE UBỌK

Bethany odu ke edem usiahautịn Obot Olive. To Jerusalem sịm do edi n̄kpọ nte itiat iba. (John 11:18) Jesus aka ufọk mme Martha ye Mary ke Bethany. Nditọeka iba emi ye Lazarus eyeneka mmọ ẹdi ufan Jesus, esịt onyụn̄ enem mmọ ndikụt Jesus.

Idịghe ekpri n̄kpọ Messiah ndika ufọk owo. Martha etem ediwak udia sia enye oyom ndinen̄ede n̄kama Jesus esen. Nte Martha osụk etịmede, Mary eyeneka esie ke etie ekpere ukot Jesus akpan̄ utọn̄ okop se Jesus ekpepde. Nte ini akade, Martha ọdọhọ Jesus ete: “Ọbọn̄, nte afo ukereke emi eyeneka mi ọkpọn̄de utom ọnọ mi ikpọn̄? Dọhọ enye edi edin̄wam mi nan̄a.”—Luke 10:40.

Jesus iyatke esịt ye Mary, utu ke oro enye akam ọnọ Martha item ke nte enye afịnade idem esie nditem ediwak udia. Enye ọdọhọ ete: “Martha, Martha, afo amayak ediwak n̄kpọ ẹtịmede fi esịt ye ekikere. Ibat ibat n̄kpọ, m̀mê n̄kpọ kiet kpọt, ke ẹyom. Amaedi Mary, enye emek eti udeme eke owo mîdibọhọ enye.” (Luke 10:41, 42) Ikọ Jesus ọwọrọ ke ufọn idụhe Martha ndibiat ini ntem nsio nsio udia, ke udia kiet kpọt ekem.

Se Martha oyomde ndinam nnọ Jesus idiọkke. Enye oyom ndikama Jesus esen. Edi enye ndisịn kpukpru ekikere esie ke utem udia iyakke enye okop se Eyen Abasi ekpepde! Jesus ọdọhọ ke Mary akam anam nnennen n̄kpọ nte enye akpan̄de utọn̄ ọnọ imọ, sia se enye ekpepde ayanam ufọn ọnọ enye. Ọfọn kpukpru nnyịn isiti item emi.

Jesus ekpep mbet esie akpan n̄kpọ en̄wen ke enye ama ọkọkpọn̄ do. Mbet esie kiet ọdọhọ enye ete: “Ọbọn̄, kpep nnyịn ndibọn̄ akam, kpa nte John ekekpepde mme mbet esie.” (Luke 11:1) Jesus ama ekpekpep mme owo ndibọn̄ akam n̄kpọ nte isua kiet ye ubak emi ẹkebede, ke ini ọwọrọetop ukwọrọikọ esie oro ke Obot. (Matthew 6:9-13) Etie nte mbet emi ikodụhe ini oro, ntre Jesus afiak etịn̄ mme akpan n̄kpọ emi enye ekekpepde mmọ ke akam oro. Ekem enye ọnọ uwụtn̄kpọ ndiwụt ntak emi anade ẹbọn̄ akam ke ubọk ke ubọk.

“Anie ke otu mbufo edinyene ufan, edinyụn̄ aka ebịne enye ke ufọt okoneyo ọkọdọhọ enye ete, ‘Ufan, buọt mi uyo ita, koro ufan mi kiet osụk oto isan̄ edi, ndien nnyeneke n̄kpọ eke nnịmde enye ke iso’? Ndien owo emi odu ke esịt ufọk ọbọrọ ete, ‘Kûfịna mi. Mmọkọkọbi usụn̄, ndien ami ye n̄kpri nditọ mi imododụk idap; n̄kemeke ndidaha nda nnọ fi n̄kpọ ndomokiet.’ Ndọhọ mbufo nte, Okposụkedi nte enye mîdidahake ida inọ enye n̄kpọ ke ntak edide ufan esie, ke akpanikọ ke ntak emi enye ọsọn̄ọde eyịre, enye ayadaha ke enyọn̄ ọnọ enye n̄kpọ eke enye oyomde.”—Luke 11:5-8.

Ikọ Jesus iwọrọke ke Jehovah etie nte ufan owo oro, ke enye isimaha ndikop akam. Utu ke oro, akam ọwọrọ ke edieke owo emi mîkoyomke ndin̄wam ufan esie ke akpa akan̄wamde ke ini ẹkeyịrede ẹben̄e enye, ke edima Ete nnyịn emi odude ke heaven ayanam eben̄e emi nti ikọt esie ẹyịrede ẹben̄e enye! Jesus adian do ete: “Ndọhọ mbufo nte, Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo. Koro kpukpru owo eke ẹben̄ede ẹbọde, kpukpru owo eke ẹnyụn̄ ẹyomde ẹkụtde, ẹyenyụn̄ ẹberede ẹnọ kpukpru owo eke ẹkọn̄de.”—Luke 11:9, 10.

Jesus ọnọ uwụtn̄kpọ ete ye eyen man ikọ esie enen̄ede an̄wan̄a. Enye ọdọhọ ete: “Ewe ete odu ke otu mbufo eke edinọde eyen esie urụkikọt utu ke iyak ke ini eyen esie eben̄ede enye iyak? M̀mê edinọde eyen ikpeyen ke ini eyen eben̄ede enye nsenunen? Ke ntre, edieke mbufo, okposụkedi emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven edinọ mbon oro ẹben̄ede enye edisana spirit!” (Luke 11:11-13) Enem nnyịn etieti ndidiọn̄ọ ke Ete nnyịn emi odude ke heaven oyokop akam nnyịn onyụn̄ ọnọ nnyịn se inanade nnyịn!

Kpep N̄kpọ En̄wen

Nso ke N̄kpeben̄e Abasi?

Se ntak emi idọhọde ke Abasi isidaha mfịna nnyịn mfefere mfefere.