Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 78

Ana Akama-Ukpọhọde Emi Anamde Akpanikọ Eben̄e Idem!

Ana Akama-Ukpọhọde Emi Anamde Akpanikọ Eben̄e Idem!

LUKE 12:35-59

  • ANA AKAMA-UKPỌHỌDE EMI ANAMDE AKPANIKỌ EBEN̄E IDEM

  • JESUS EKEDI NDITỌ UBAHADE

Jesus ama etịn̄ ke “ekpri otuerọn̄” ke ẹdinọ itie ke Obio Ubọn̄ heaven. (Luke 12:32) Edi oyoyom mmọ ẹnen̄ede ẹsịn idem ẹnam n̄kpọ man ẹkeme ndibọ n̄wọrọnda utịp oro. Ke nditịm ntịn̄, enye etịn̄ ntak emi anade owo odu eti uwem edieke enye oyomde ndidụk Obio Ubọn̄ oro.

Ntem, Jesus ọdọhọ mme mbet esie ẹben̄e idem ẹbet ini emi enye edifiakde edi. Enye ọdọhọ ete: “Ẹbọbọ mbọbọ ke isịn mbufo ẹnyụn̄ ẹnam mme utuenikan̄ mbufo ẹsak, mbufo ẹnyụn̄ ẹbiet mme owo emi ẹtiede ẹbet eteufọk mmọ ke ini enye otode ndọ ọnyọn̄ edi, man ke ini enye edidide edikọn̄ usụn̄, mmọ ẹkpeberede ẹnọ enye inikiet inikiet. Ifịn emi eteufọk mmọ edidide edikụt mmọ ẹtiede ẹkpeme ẹkop inemesịt!”—Luke 12:35-37.

Mme mbet ẹsọsọp ẹdiọn̄ọ utọ edu emi Jesus oyomde mmọ ẹnyene. Ifịn emi enye etịn̄de aban̄a ẹtetie ẹbet ini emi eteufọk mmọ edinyọn̄de idi. Jesus ọdọhọ ete: “Edieke enye [eteufọk mmọ] otode edi ke ufọt okoneyo, m̀mê ke n̄kpọusen, onyụn̄ okụtde mmọ ẹnamde ntem, mmọ ẹyekop inemesịt!”—Luke 12:38.

Item Jesus emi iban̄ake asan̄autom ndisisịn ifịk nnam utom esie. Se Jesus emi edide Eyen owo etịn̄de aban̄a idemesie ke uwụtn̄kpọ emi anam idiọn̄ọ emi. Enye ọdọhọ mme mbet esie ete: “Mbufo nde, ẹben̄e idem, koro Eyen owo eyedi ke hour eke mbufo mîdorike enyịn.” (Luke 12:40) Ọwọrọ ke Jesus eyedi ke ini iso. Enye oyom mme anditiene enye ẹdu ke mben̄eidem, akpan akpan mbon emi ẹdude ke “ekpri otuerọn̄.”

Sia Peter oyomde nditịm mfiọk se Jesus etịn̄de aban̄a, enye obụp ete: “Ọbọn̄, nte afo etịn̄ uwụtn̄kpọ emi ọnọ nnyịn m̀mê etịn̄ ọnọ kpukpru owo nde?” Utu ke Jesus ọbọrọ se Peter obụpde nnennen nnennen, enye ọnọ mmọ uwụtn̄kpọ ete: “Anie ndien edi akama-ukpọhọde emi anamde akpanikọ, onyụn̄ enyenede ọniọn̄, emi eteufọk esie edimekde ete ese aban̄a otu asan̄autom esie onyụn̄ ọnọ mmọ udeme udia mmọ ke nnennen ini? Ofụn oro eteufọk esie edidide okụt enye anamde ntem, okop inemesịt! Ke akpanikọ ke ndọhọ mbufo nte, Enye eyemek enye ete ese aban̄a kpukpru inyene esie.”—Luke 12:41-44.

Ke uwụtn̄kpọ emi enye ọkọnọde mmọ mbemiso idahaemi, “eteufọk” oro ekedi Jesus emi edide Eyen owo. Ntem mbon emi ẹdude ke “ekpri otuerọn̄” ke ẹkot “akama-ukpọhọde emi anamde akpanikọ,” mmọ ke ẹdinyụn̄ ẹnọ Obio Ubọn̄ oro. (Luke 12:32) Ikọ Jesus emi ọwọrọ ke ndusụk mbon emi ẹdude ke otu emi ẹdinọ “otu asan̄autom esie” se mmọ ẹyomde, oro edi, “udeme udia mmọ ke nnennen ini.” Ntem, Peter ye mme mbet eken emi Jesus esikpepde Ikọ Abasi ẹdiọn̄ọ ke odu ini emi Eyen owo edidide ke ini iso. Mmọ ẹdiọn̄ọ n̄ko ke ini oro, ẹyenam ndutịm man ẹsikpep “otu asan̄autom” Jesus Ikọ Abasi.

Jesus ada usụn̄ en̄wen owụt ntak emi anade mme mbet esie ẹdu ke mben̄eidem ẹnyụn̄ ẹkpeme nte mmọ ẹdude uwem. Enye anam emi koro mmọ ẹkeme ndifu ifu, idem nditọn̄ọ ntịme ye mme mbet nte mmọ. Enye ọdọhọ ete: “Edi edieke ofụn oro edidọhọde ke esịt esie ete, ‘Eteufọk mi ebịghi ndidi,’ edinyụn̄ ọtọn̄ọde ndimia ifịn iren ye ifịn iban, onyụn̄ adia onyụn̄ ọn̄wọn̄ onyụn̄ akpa mmịn, eteufọk ofụn oro eyedi ke usen eke enye mîdorike enyịn enye ndidi ye ke hour eke enye mîfiọkke, oyonyụn̄ ọnọ enye ata ọkpọsọn̄ ufen onyụn̄ ọnọ enye udeme ke otu mmọ emi mînamke akpanikọ.”—Luke 12:45, 46.

Jesus ọdọhọ ke imọ ikedi “ndisịn ikan̄ ke isọn̄.” Enye ama onyụn̄ anam oro n̄ko, sia se enye ekekpepde ama ayarade nsunsu ukpepn̄kpọ ye ido edinam mme owo onyụn̄ anam ndusụk owo ẹnen̄ede ẹtọhọ ye enye. Se enye ekekpepde ama akam anam mbon emi ẹkpedianade kiet ẹtre ndidiana, anam ‘ete adian̄ade ọkpọn̄ eyeneren esie, eyeneren onyụn̄ adian̄ade ọkpọn̄ ete, anam eka adian̄ade ọkpọn̄ eyen esie an̄wan, eyenan̄wan onyụn̄ adian̄ade ọkpọn̄ eka, anam eka ebe adian̄ade ọkpọn̄ n̄wan eyen esie, n̄wan eyen onyụn̄ adian̄ade ọkpọn̄ eka ebe.’—Luke 12:49, 53.

Enye etịn̄ mme ikọ emi aban̄a mme mbet esie. Jesus ndien ọtọn̄ọ nditịn̄ ikọ nnọ otuowo. Ata ediwak owo inyịmeke ndinịm mme n̄kpọ oro ẹwụtde ke enye edi Messiah, ntem enye ọdọhọ mmọ ete: “Ke ini mbufo ẹkụtde idiọk enyọn̄ ọwọrọde ke edem usoputịn, idaha oro mbufo ẹte, ‘Oyobio ke edi,’ ndien osu ntre. Ndien ke ini mbufo ẹkụtde ofụm edem usụk abarade, mbufo ẹdọhọ ẹte, ‘Eyo oyofiop etieti,’ ndien ọwọrọ ntre. Mbon mbubịk, mbufo ẹmefiọk nte ẹdụn̄ọrede idiọn̄ọ eke ẹdude ke iso isọn̄ ye ikpaenyọn̄, anam didie ndien mbufo mîfiọkke nte ẹdụn̄ọrede akpan ini emi?” (Luke 12:54-56) Ke akpanikọ mmọ iben̄eke idem.

Kpep N̄kpọ En̄wen

Ntak Emi Christ Editọn̄ọde Ntak Idi?

Ntak emi Christ editọn̄ọde ntak idi? Didie ke enye editọn̄ọ ntak edi, nso ke enye edidi idinam?