Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 69

Ndi Abraham Edi Ete Mmọ M̀mê Devil Edi?

Ndi Abraham Edi Ete Mmọ M̀mê Devil Edi?

JOHN 8:37-59

  • MME JEW ẸDỌHỌ KE ABRAHAM EDI ETE MMIMỌ

  • JESUS AMA ODODU MBEMISO ABRAHAM

Jesus aka iso ndikpep mme owo akpan n̄kpọ ke Ikọ Abasi ke ini Usọrọ Mme Ataya ke Jerusalem. Ndusụk mme Jew emi ẹdude do ẹdọhọ enye ẹte: “Nnyịn idi nditọ Abraham ndien akananam nnyịn idụkke ufụn inọ owo ekededi.” Jesus ọbọrọ mmọ ete: “Mmọfiọk nte mbufo ẹdi nditọ Abraham; edi mbufo ẹyom ndiwot mi, koro ikọ mi ikọrike ke esịt mbufo. Se ededi oro n̄kụtde ye Ete mi ke ntịn̄; edi mbufo ẹnam mme n̄kpọ emi mbufo ẹkopde ẹto ete mbufo.”—John 8:33, 37, 38.

Ikọ Jesus ọwọrọ ke idịghe Ete imọ obon mmọ. Edi sia mîn̄wan̄ake mme Jew oro ntre, mmọ ẹfiak ẹtịn̄ se mmọ ẹketịn̄de ke akpa ẹte: “Ete nnyịn edi Abraham.” (John 8:39; Isaiah 41:8) Sia mmọ ẹdide nditọ nditọ Abraham, mmọ ẹkere ke mmimọ ituak ibuot inọ ukem Abasi emi Abraham akatuakde ibuot ọnọ, emi okonyụn̄ edide ufan esie.

Edi Jesus etịn̄ ikọ emi akpade mmọ idem ete: “Edieke mbufo ẹdide nditọ Abraham, ẹnam mme utom Abraham.” N̄kọ eyen esibiet ete. Jesus aka iso ọdọhọ mmọ ete: “Edi ke emi mbufo ke ẹyom ndiwot mi, kpa owo emi asiande mbufo akpanikọ oro enye okokopde oto Abasi. Abraham ikanamke ntem.” Jesus ndien afiak etịn̄ se ikpade mmọ idem ete: “Mbufo ẹnam utom ete mbufo.”—John 8:39-41.

Mme Jew emi isụk idiọn̄ọke owo emi Jesus etịn̄de aban̄a. Mmọ ẹtịn̄ ikọ ndiwụt ke mmimọ idi ata nditọ, ẹte: “Nnyịn ikamanake ke use; nnyịn inyene Ete kiet, kpa Abasi.” Edi ndi Abasi edi ata Ete mmọ? Jesus ọdọhọ mmọ ete: “Edieke Abasi ekpedide Ete mbufo, mbufo ẹkpema mi, koro n̄koto Abasi ndi mi. Ami n̄konyụn̄ ndịghe ke odudu idemmi, edi Enye okosio mi ọdọn̄.” Jesus obụp mmọ mbụme kiet ete: “Nso idi ntak emi mbufo mîfiọkke se ami ntịn̄de?” Enye onyụn̄ ọbọrọ mbụme oro ke idemesie, ete: “Koro mbufo mîkemeke ndikop ikọ mi.”—John 8:41-43.

Jesus odomo ndiwụt mmọ se idiwọrọde mmọ sia mmọ mîbuọtke idem ye enye. Edi idahaemi enye etịn̄ ọkpọikọ emi ete: “Mbufo ẹto ete mbufo kpa Devil, mbufo ẹnyụn̄ ẹyom ndinam mme udọn̄ ete mbufo.” Ete mmọ esinam nso? Jesus idịpke inua, enye ọdọhọ ete: “Enye ekedi owotowo toto ke editọn̄ọ esie, enye ikonyụn̄ isọn̄ọke ida ke akpanikọ.” Enye adian do ete: “Owo emi edide eke Abasi okop ikọ Abasi. Ntak edi oro mbufo mîkopke, koro mbufo mîtoho Abasi.”—John 8:44, 47.

Ikọ emi abiak mme Jew, ndien mmọ ẹbọrọ enye ẹte: “Nte nnyịn idọhọke ite, Afo edi owo Samaria, omonyụn̄ enyene demon?” Mmọ ndidọhọ ke Jesus edi “owo Samaria” owụt nte mmọ ẹsuade enye ẹketre. Edi Jesus ibọrọke ikọ usọn̄enyịn emi, utu ke oro enye ọdọhọ ete: “Nnyeneke demon, edi n̄kpono Ete mi, edi mbufo ẹmesuene mi.” Se Jesus afiakde etịn̄ owụt nte se mmọ ẹnamde oro ọdiọkde eketre. Enye ọdọhọ ete: “Edieke owo ekededi anamde ikọ mi, enye idikwe n̄kpa tutu amama.” Ikọ Jesus iwọrọke ite ke mme apostle ye mbon en̄wen oro ẹbuọtde idem ye imọ idikpaha tutu amama. Edi ọwọrọ ke mmọ idikpaha nsinsi n̄kpa, oro edi, “udiana n̄kpa” emi owo mîdinamke mmọ ẹfiak ẹset.—John 8:48-51; Ediyarade 21:8.

Edi mme Jew ẹkere ke ikọ Jesus ọwọrọ ke mme mbet idikpaha ata n̄kpa. Mmọ ẹdọhọ enye ẹte: “Nnyịn imọfiọk ndien ite afo emenyene demon. Abraham ama akpa, ye mme prọfet n̄ko; edi afo ọdọhọ ete, ‘Edieke owo ekededi anamde ikọ mi, enye iditabike n̄kpa tutu amama.’ Afo ukponke ukan ete nnyịn Abraham, emi ama akakpa, ndi omokpon akan? . . . Afo ekere ke imọ idedi anie?”—John 8:52, 53.

Jesus eketịn̄ ikọ esie ndiwụt ke imọ idi Messiah. Edi utu ke enye ọbọrọ mbụme mmọ nnennen nnennen, enye ọdọhọ ete: “Edieke nnọde idemmi ubọn̄, ubọn̄ mi iwọrọke n̄kpọ ndomokiet. Edi Ete mi ọnọ mi ubọn̄, kpa enye emi mbufo ẹdọhọde nte edide Abasi mbufo; ndien mbufo ifiọkke enye. Edi ami mmọfiọk enye. Edieke nnyụn̄ ndọhọde ke mfiọkke enye, n̄kpedi osu nsu nte mbufo.”—John 8:54, 55.

 Jesus ndien etịn̄ aban̄a uwụtn̄kpọ ete ete mmọ emi ekedide owo Abasi, ete: “Ete mbufo Abraham ama adara etieti ke idotenyịn edikụt usen mi, ama onyụn̄ okụt onyụn̄ adara.” Sia Abraham ekenịmde ke Abasi ayanam se enye ọn̄wọn̄ọde, enye ama ọdiọn̄ọ ke Messiah eyedi. Mme Jew inịmke ikọ emi, mmọ ẹdọhọ enye ẹte: “Afo ukam usịmke kan̄a isua aba ye duop ke emana, edi afo ama okokụt Abraham?” Jesus ọbọrọ mmọ ete: “Ke ata akpanikọ ke ndọhọ mbufo, Ami mma ndodu mbemiso Abraham edidu.” Enye etịn̄ aban̄a ini emi enye okodude ke heaven onyụn̄ edide akwa angel Abasi.—John 8:56-58.

Esịt enen̄ede ayat mme Jew sia Jesus ọdọhọde ke ima idodu mbemiso Abraham, ndien mmọ ẹtan̄ itiat ẹte itọ enye. Edi Jesus adaha ọkpọn̄ mmọ do.