Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 97

Uwụtn̄kpọ Mbonutom ke In̄wan̄ Vine

Uwụtn̄kpọ Mbonutom ke In̄wan̄ Vine

MATTHEW 20:1-16

  • “AKPATRE” MBONUTOM KE IN̄WAN̄ VINE ẸKABADE ẸDI “AKPA”

Ndondo emi ke Jesus osụk ọdọhọ mbon emi ẹkpan̄de utọn̄ ẹnọ enye ke Perea nte ke “ediwak owo emi ẹdide akpa ẹyedi akpatre, akpatre ẹyenyụn̄ ẹdi akpa.” (Matthew 19:30) Enye ọnọ uwụtn̄kpọ emi aban̄ade mbon emi ẹkpede utom ke in̄wan̄ vine man anam se enye etịn̄de emi an̄wan̄a ete:

“Obio ubọn̄ heaven ebiet enyeneufọk emi ọwọrọde ke tụhi-tụhi usenubọk aka ndikpe mbonutom ndọn̄ ke in̄wan̄ vine esie. Ke enye ama ekenyịme ndikpe mbonutom oro denarius kiet ke usen, enye osio mmọ ọdọn̄ ẹka in̄wan̄ vine esie. Ke ini enye afiakde ọwọrọ ke n̄kpọ nte ọyọhọ hour ita, enye okụt mmọ en̄wen nte ẹdade ke an̄waurua inyụn̄ inyeneke utom; ndien enye ọdọhọ mmọ ete, ‘Mbufo n̄ko, ẹdụk in̄wan̄ vine, ndien nyọnọ mbufo se ededi oro enende.’ Ntre mmọ ẹdaha ẹka. Enye afiak ọwọrọ aka ke n̄kpọ nte ọyọhọ hour itiokiet ye ọyọhọ hour usụkkiet onyụn̄ anam kpasụk ntre. Ke akpatre, enye ọwọrọ ke n̄kpọ nte ọyọhọ hour duopekiet onyụn̄ okokụt mmọ efen nte ẹdade, enye onyụn̄ obụp mmọ ete, ‘Ntak emi mbufo ẹdade mi ofụri usen inyeneke utom?’ Mmọ ẹdọhọ enye ẹte, ‘Koro baba owo kiet ikpehe nnyịn utom.’ Enye ọdọhọ mmọ ete, ‘Mbufo n̄ko ẹdụk in̄wan̄ vine.’”—Matthew 20:1-7.

Anaedi mbon oro ẹkpan̄de utọn̄ mi ẹkere ẹban̄a Jehovah Abasi ke ini Jesus etịn̄de aban̄a “obio ubọn̄ heaven” ye “enyeneufọk.” N̄wed Abasi owụt ke Jehovah edi andinyene in̄wan̄ vine, ndien nditọ Israel ẹdi in̄wan̄ vine oro. (Psalm 80:8, 9; Isaiah 5:3, 4) Mbon oro ẹkedude ke idak Ibet ediomi ẹbiet mbonutom ke in̄wan̄ vine oro. Edi uwụtn̄kpọ Jesus iban̄ake se iketịbede ke eset. Enye etịn̄ aban̄a se itịbede ke eyo esie.

Mme adaiso ido ukpono oro ẹnyụn̄ ẹtie nte mme Pharisee oro ẹsụk ẹbụpde Jesus mbụme ndondo emi ẹban̄a usiondọ man ẹdomo enye ẹse. Mmọ mbiba ẹda nte ke mmimọ imesịn idem etieti inam utom Abasi. Mmọ ẹtie nte mbonutom oro ẹketọn̄ọde utom usenubọk usen oro, ẹnyụn̄ ẹdoride enyịn ndibọ denarius kiet emi edide okụk utom usen.

Mme oku ye mme adaiso ido ukpono mme Jew eken ẹda ke mme usụhọde Jew eken inamke n̄kpọ Abasi nte mmimọ inamde, ke inamke iyọhọ utom usen ke in̄wan̄ vine Abasi. Mmọ ke ẹkpe utom “ke n̄kpọ nte ọyọhọ hour ita” (n̄kanika usụkkiet usenubọk), m̀mê nte ini akade, ke ọyọhọ hour itiokiet, usụkkiet, ndien ke akpatre, ke ọyọhọ hour duopekiet (n̄kanika ition mbubreyo).

Ẹda irenowo ye iban oro ẹtienede Jesus nte “mbon oro ẹma ẹkesụn̄i.” (John 7:49) Mmọ ẹsikọ iyak mîdịghe ẹnam mme ukpekpe utom eken. Ekem ke ini idọk ke isua 29 eyo Christ, “enyene in̄wan̄ vine” ama ọdọn̄ Jesus okokot mme usụhọde owo emi ẹdi ẹdinam utom Abasi nte mme mbet Christ. Mmọ ẹdi mme “akpatre” mbon emi Jesus etịn̄de aban̄a nte ẹkotde ẹdinam utom ke in̄wan̄ vine emi ke ọyọhọ hour duopekiet.

Jesus etịn̄ ndien se itịbede ke ini ẹkụrede utom usen oro. Enye ọdọhọ ete: “Ke ini esịmde mbubreyo, enyene in̄wan̄ vine ọdọhọ esenyịn utom ete, ‘Kot mbonutom ẹdi nyụn̄ kpe mmọ okụkutom mmọ, ọtọn̄ọde ke akpatre tutu esịm akpa.’ Ke ini mbon ọyọhọ hour duopekiet ẹdide, mmọ kiet kiet ẹbọ denarius kiet. Ntre, ke ini mmọ emi ẹkedide akpa ẹdide, mmọ ẹkere ẹte mmimọ iyọbọ ikan oro; edi mmọ n̄ko ẹbọ denarius kiet. Ke ini mmọ ẹbọde, mmọ ẹtọn̄ọ ndisụk enyeneufọk uyo ẹnyụn̄ ẹdọhọ ẹte, ‘Mmọ emi ẹkedide akpatre ẹkesịn hour kiet ke utom; edi afo amanam mmọ ẹdi ukem ye nnyịn emi ikobiomde ọkpọsọn̄ mfịghe usen inyụn̄ ifọbọde eyo!’ Edi enye ọbọrọ owo kiet ke otu mmọ ete, ‘Ufan, nnamke fi idiọk ndomokiet. Nte ami ye afo ikebiereke denarius kiet? Bọ se idide okwo nyọn̄. Nyom ndinọ akpatre owo emi ukem nte nnọde fi. Nte nnyeneke unen ndida mme n̄kpọ mi nnam se mmade? M̀mê nte enyịn fo akabade ọdiọk koro ami mfọnde?’ Ntem ke mme akpatre ẹdidi akpa, mme akpa ẹnyụn̄ ẹdi akpatre.”—Matthew 20:8-16.

Mme mbet ẹkeme ndikere nte akpatre ikpehe uwụtn̄kpọ emi Jesus etịn̄de mi editịbede. Mme adaiso ido ukpono mme Jew emi ẹdade idem nte “akpa” ẹdisan̄a didie ididi “akpatre”? Mme mbet Jesus ẹdinyụn̄ isan̄a didie idi “akpa”?

Mme Pharisee ye mbon en̄wen ẹda mme mbet Jesus nte “akpatre,” edi mmọ ẹdidi “akpa” ndibọ utịp utom mmọ. Abasi ọmọn̄ esịn Jerusalem eke isọn̄ ndondo oro Jesus akpade, ọmọn̄ onyụn̄ emek obufa idụt emi edide “Israel Abasi.” (Galatia 6:16; Matthew 23:38) John Andinịm Owo Baptism eketịn̄ aban̄a mbon emi ẹdidude ke obufa idụt emi ke ini enye ọkọdọhọde ke ẹyeda edisana spirit ẹnịm mme owo baptism. Mbon emi ẹdide “akpatre” ẹdidi akpa ndina baptism oro nnyụn̄ nnyene ifet editie ntiense mban̄a Jesus “tutu esịm ata utịt ikpehe isọn̄.” (Utom 1:5, 8; Matthew 3:11) Edieke mme mbet ẹkemede nditịm ndiọn̄ọ se Jesus etịn̄de ọnọ mmọ emi, mmọ ẹyekụt ke mme adaiso ido ukpono emi ẹdidide “akpatre” ẹyesua mmimọ idiọk idiọk.