Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 100

Uwụtn̄kpọ Emi Aban̄ade Mina Duop

Uwụtn̄kpọ Emi Aban̄ade Mina Duop

LUKE 19:11-28

  • JESUS ỌNỌ UWỤTN̄KPỌ ABAN̄A MINA DUOP

Etie nte Jesus osụk odu ye mbet esie ke ufọk Zacchaeus kpa ye oro edide enye ke osụk adaduak ndika Jerusalem. Mme mbet Jesus ẹkere ke “obio ubọn̄ Abasi” ọmọn̄ ọtọtọn̄ọ ndikara idahaoro, ke Jesus ọmọn̄ onyụn̄ ada ubọn̄. (Luke 19:11) N̄kpọ emi in̄wan̄ake mmọ, kpa nte ikọ Jesus emi aban̄ade imọ ndikpa mînyụn̄ in̄wan̄ake mmọ. Ntre enye ọnọ mmọ uwụtn̄kpọ man an̄wam mmọ ẹkụt ke Obio Ubọn̄ oro edidi ke ini iso.

Enye ọdọhọ ete: “Ọbọn̄ kiet akaka anyan idụt ndikọbọ ubọn̄ nda nnyụn̄ mfiak nnyọn̄ ndi.” (Luke 19:12) Utọ isan̄ emi esida ini. Nte an̄wan̄ade, Jesus edi “ọbọn̄” oro akakade “anyan idụt” emi edide heaven do, ndien Ete esie ọyọnọ enye ubọn̄.

Mbemiso “ọbọn̄” oro ke uwụtn̄kpọ emi adaha isan̄ oro, enye okot ifịn esie duop, ọnọ owo mmọ kiet kiet mina, onyụn̄ ọdọhọ mmọ ete: “Ẹnam mbubehe tutu ndi.” (Luke 19:13) Mina ikedịghe ekpri okụk. Owo emi anamde utom in̄wan̄ ekesida ọfiọn̄ ita an̄wana mina kiet.

Etie nte mbet Jesus ẹdiọn̄ọ ke mmimọ ibiet ifịn duop oro ke uwụtn̄kpọ emi, sia Jesus ama ememen mmọ odomo ye mbon emi ẹnamde utom idọk. (Matthew 9:35-38) Edi enye idọhọke mmọ ẹda se ẹdọkde ke in̄wan̄ ẹdi. Utu ke oro, se enye etịn̄de aban̄a edi mme mbet efen emi ẹditienede ikara ke Obio Ubọn̄ Abasi. Mme mbet ẹda ini ye inyene mmọ ẹnam utom man mbon en̄wen ẹkeme nditiene n̄kakara ke Obio Ubọn̄ Abasi.

Nso en̄wen ke Jesus ada uwụtn̄kpọ emi ayarade? Enye ọdọhọ ke mbio obio “esie ẹsua [Ọbọn̄ oro] ẹnyụn̄ ẹsio otu mme isụn̄utom ẹdọn̄ ẹka ẹbịne enye, ẹkedọhọ ẹte, ‘Nnyịn iyomke owo emi edi edidem nnyịn.’” (Luke 19:14) Mme mbet Jesus ẹdiọn̄ọ ke mme Jew imaha enye, ndusụk mmọ ẹkam ẹyoyom usụn̄ nte ẹkpewotde enye. Ke Jesus ama akakpa onyụn̄ ọnyọn̄ heaven, ediwak mme Jew ẹwụt nte isuade enye ke ndikọbọ mme mbet esie. Mme andibiọn̄ọ emi ẹnanam ẹwụt ke mmimọ iyomke Jesus edi Edidem mmimọ.—John 19:15, 16; Utom 4:13-18; 5:40.

Ifịn duop oro ndien-e? Didie ke mmọ ẹda mina mmọ ẹnam n̄kpọ tutu “ọbọn̄” oro ọbọ “ubọn̄” afiak ọnyọn̄ edi? Jesus ọdọhọ ete: “Ekem ke ini enye ama ọkọbọ ubọn̄ ada onyụn̄ afiak ọnyọn̄ edi, enye ọnọ uyo ete ẹkot ifịn emi imọ ikọnọde okụk silver ẹdi, man idụn̄ọde ifiọk udori eke mmọ ẹkenyenede ke mbubehe. Edi akpa owo edi, edidọhọ ete, ‘Ọbọn̄, mina duop odoro ke mina fo.’ Ntre enye ọdọhọ owo oro ete, ‘Emetịm anam, eti ofụn! Sia akanamde akpanikọ ke ata ekpri n̄kpọ, di andikara obio duop.’ Ndien udiana edi, edidọhọ ete, ‘Ọbọn̄, mina ition odoro ke mina fo.’ Enye ọdọhọ enye emi n̄ko ete, ‘Afo, nde, kara obio ition.’”—Luke 19:15-19.

Edieke mme mbet ẹdiọn̄ọde ke mmimọ itie nte ifịn oro ẹdade se ẹnọde mmọ ẹsịn ifịk ẹnam mme mbet, mmọ ẹdiọn̄ọ n̄ko ke esịt eyenem Jesus aban̄a se mmimọ inamde. Mmọ ẹnịm ke akpanikọ n̄ko ke enye ọyọdiọn̄ ifịk oro mmimọ isịnde ke utom. Sia kpukpru nnuenubọk mîdịghe ukem, ndusụk mbet Jesus ẹkeme ndinam ekese ndien mbon eken ikemeke. Kpa ye oro edide ntre, Jesus emi ọbọde “ubọn̄” oyokụt onyụn̄ ọdiọn̄ kpukpru ukeme oro mmọ ẹsịnde ẹnam mme mbet.—Matthew 28:19, 20.

Edi kop esen esen n̄kpọ en̄wen emi etịbede, oro Jesus adade eberi uwụtn̄kpọ emi: “Edi [ofụn] en̄wen edi, edidọhọ ete, ‘Ọbọn̄, sese mina fo, emi n̄kọbọpde ke ọfọn̄ nnịm. Okokụt do, mfefehe fi, koro afo edide owo nsọn̄ido; afo atatan̄ se mûkenịmke onyụn̄ ọdọdọk se mûkọtọhọ.’ Enye ọdọhọ owo oro ete, ‘Nyada ikọ inua fo n̄kpe ikpe nnọ fi, afo idiọk ofụn. N̄kọ ama ọfiọk ete ndi owo nsọn̄ido, emi ntan̄de se mmen̄kenịmke nnyụn̄ ndọkde se mmen̄kọtọhọ? Ntak ndien mûkemenke okụk silver mi usịn ke itie unịm okụk? Ndien ke nnyọn̄de ndi n̄kpọbọ iso okụk ye udori.’ Ntre enye ọdọhọ mmọ emi ẹdade ẹkpere ete, ‘Ẹbọ enye mina oro ẹmen ẹnọ owo emi enyenede mina duop.’”—Luke 19:20-24.

N̄kpọ atak ofụn emi mîmaha ndin̄wana n̄kpọ nnọ eteufọk esie. Mme apostle ẹdori enyịn Jesus ndikara ke Obio Ubọn̄ Abasi. Ntem mmọ ẹda se Jesus etịn̄de aban̄a akpatre ofụn emi ẹdiọn̄ọ ke edieke mmimọ mîsịnke ifịk inam utom ukwọrọikọ, ke mmimọ ididụkke Obio Ubọn̄ oro.

Ikọ Jesus emi ayanam mme mbet esie ẹnen̄ede ẹsịn ifịk ẹnam utom Abasi. Ke akpatre, Jesus ọdọhọ ete: “Ndọhọ mbufo nte, Ẹyedian efen efen ẹnọ owo eke enyenede; edi ẹyebọ owo eke mînyeneke kpa se enye enyenede.” Enye n̄ko adian do ete ke ẹyesobo mme asua imọ emi mîkoyomke imọ idi “edidem mmọ.” Ke enye ama eketịn̄ mme ikọ emi ama, enye afiak ọtọn̄ọ isan̄ uka Jerusalem.—Luke 19:26-28.

Kpep N̄kpọ En̄wen

ENYỌN̄-UKPEME (EKE UKPEPNKPỌ)

Se Uwụtn̄kpọ Talent Ekpepde Nnyịn

Ibuotikọ emi anam uwụtn̄kpọ Jesus oro aban̄ade talent enen̄ede an̄wan̄a nnyịn.