Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 87

Da Ọniọn̄ Ben̄e Idem Nọ Ini Iso

Da Ọniọn̄ Ben̄e Idem Nọ Ini Iso

LUKE 16:1-13

  • UWỤTN̄KPỌ IDIỌK AKAMA-UKPỌHỌDE

  • DA INYENE FO ‘NAM UFAN’

Idahaoro ke Jesus osụk okụre mbụk eyen emi okosopde. Akpana mbụk emi anam mme ọbọ a-tax, mme scribe, ye mme Pharisee ẹdiọn̄ọ ke Abasi amama ndifen nnọ mme anamidiọk emi ẹkabarede esịt. (Luke 15:1-7, 11) Jesus ọnọ uwụtn̄kpọ efen emi ebehede mbet esie. Uwụtn̄kpọ enye emi aban̄a owo inyene emi okopde idiọk mbụk aban̄a akama-ukpọhọde esie.

Jesus ọdọhọ ke mme owo ẹketịn̄ ẹnọ ete oro ẹte ke akama-ukpọhọde esie atatahade inyene esie. Ntre ete oro ọdọhọ ke imọn̄ isio enye ke utom. Enye ọtọn̄ọ ndikere ete: “Nso ke ndinam, koro eteufọk mi ọmọn̄ edibọ mi itie akama-ukpọhọde? Nnyeneke odudu nditịbi isọn̄, ndiben̄e eben̄e edi mi n̄kpọ bụt.” Enye osio ifiọk edi man n̄kpọ edisọn̄ ye enye ke ini iso. Kop se enye ọdọhọde mi: “Mmọfiọk se ndinamde, man, ke ini ẹdibọde mi itie akama-ukpọhọde, mme owo ẹkpeda mi ẹsịn ke ufọk mmọ.” Enye ọsọsọp aka okokot mbon emi ẹkamade eteufọk esie isọn onyụn̄ obụp akpa owo ete, “Akama eteufọk mi ifan̄?”—Luke 16:3-5.

Akpa owo oro ete: “Aban̄ aran olive ikie.” Oro edi n̄kpọ nte lita 2,200. Etie nte akama-isọn emi enyene akamba in̄wan̄ olive mîdịghe edi ke enye esinyam aran. Akama-ukpọhọde oro ọdọhọ enye ete: “Fiak bọ n̄wed ediomi fo, sụhọde tetie, sọsọp wet aba ye duop [lita 1,100].”—Luke 16:6.

Akama-ukpọhọde oro obụp owo en̄wen ete: “Afo nde, akama ifan̄?” Enye oro ọbọrọ ete: “Cor wheat ikie.” Emi edi n̄kpọ nte lita 22,000. Akama-ukpọhọde oro ọdọhọ enye ete: “Fiak bọ n̄wed ediomi fo nyụn̄ wet anan̄.” Enye osio cor wheat 20 ke se owo oro akakamade.—Luke 16:7.

Sia edide akama-ukpọhọde emi ke osụk ananam utom ọnọ owo inyene emi, enye enyene unen ndibiat ndusụk isọn emi mme owo ẹkamade eteufọk esie mfep. Mbon emi enye abiatde ndusụk isọn emi mmọ ẹkekamade ẹyen̄wam enye ke ini ẹdisiode enye ke utom.

Usen kiet, eteufọk esie okop se enye anamde ye mbon emi ẹkamade enye isọn. Kpa ye oro edide se ẹkenamde emi editak enye, idem akpa enye ndifiọk se ofụn esie anamde emi, enye onyụn̄ otoro ofụn emi sia “okposụkedi [enye] anamde ukwan̄ido,” enye “[ada] ata ọniọn̄ anam n̄kpọ.” Jesus adian do ete: “Nditọ editịm n̄kpọ emi [ẹnyene] ata ọniọn̄ ke edinam mmọ ye mbon emana mmọ ẹkan nditọ un̄wana.”—Luke 16:8.

Jesus itoroke-toro se akama-ukpọhọde emi akanamde, enye inyụn̄ idọhọke owo anam n̄kari ye mbon oro enye adade anam mbubehe. Nso ndien ke ikọ esie ọwọrọ? Enye ọdọhọ mme mbet esie ete: “Ẹda inyene ukwan̄ido ẹkọ mme ufan ẹnịm ẹnọ idem mbufo, man, ke ini emi mîdụhe aba, mmọ ẹkpeda mbufo ẹdụk ke nsinsi ebietidụn̄.” (Luke 16:9) Ana ikpep ndibem iso nda n̄kụt n̄kpọ nnyụn̄ nda ọniọn̄ mben̄e idem nnọ se iditịbede ke ini iso. Ana ikọt Abasi emi ẹdide “nditọ un̄wana” ẹdiọn̄ọ nte mmọ ẹdade inyene mmọ ẹnam n̄kpọ man an̄wam mmọ ẹdụk Obio Ubọn̄ Abasi.

Jehovah Abasi ye Eyen esie ikpọn̄ ẹkeme ndida owo ndụk Obio Ubọn̄ Abasi ke heaven m̀mê Paradise isọn̄. Ọfọn ida se inyenede isịn idem inam n̄kpọ Abasi man idi ufan Jehovah ye Jesus. Edieke inamde ntre, iyenyene nsinsi uwem ke ini emi gold, silver, m̀mê se ededi emi mme owo ẹnyenede mîdinyeneke ufọn, mîdinyụn̄ ikemeke ndinyan̄a mme andinyene mmọ.

Jesus ọdọhọ n̄ko ke mbon emi ẹkemede ndise mban̄a se mmọ ẹnyenede, emi ẹnyụn̄ ẹdiọn̄ọde se ẹkpedade inyene mmọ ẹnam ẹyekeme ndise mban̄a mme n̄kpọ eken emi ẹdide akpan n̄kpọ ẹkan oro. Enye ọdọhọ ete: “Ke ntre, edieke mbufo mînamke akpanikọ ke inyene ukwan̄ido, anie ediyak ata inyene [utom Abasi] esịn mbufo ke ubọk?”—Luke 16:11.

Jesus anam mbet esie ẹdiọn̄ọ ke ekese n̄kpọ ayatak mmọ mbemiso ẹyakde mmọ ‘ẹdụk nsinsi ebietidụn̄.’ Owo ikemeke ndidi ata asan̄autom Abasi onyụn̄ odụk ufụn ọnọ inyene emi mîdikemeke ndinyan̄a enye. Ke akpatre, Jesus ọdọhọ mmọ ete: “Baba eyenufọk kiet ikemeke ndidi ofụn nnọ eteufọk iba; koro, enye ayasua kiet onyụn̄ ama eken, mîdịghe enye ayadiana ye kiet onyụn̄ esịn enye eken ke ndek. Mbufo ikemeke ndidi ifịn nnọ Abasi ye Inyene.”—Luke 16:9, 13.