Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 92

Owo Akpamfia Kiet Owụt Esịtekọm

Owo Akpamfia Kiet Owụt Esịtekọm

LUKE 17:11-19

  • JESUS ỌKỌK MBON AKPAMFIA DUOP

Sia Jesus adahade man mbon Sanhedrin idinam ẹwot enye, enye asan̄a aka Ephraim, emi odude ke enyọn̄-enyọn̄ n̄kan̄ edem usiahautịn Jerusalem. Enye odu do ye mme mbet esie man mme asua idinam enye n̄kpọ. (John 11:54) Edi ini Passover isua 33 ọmọn̄ ekekem, ndien Jesus afiak ọtọn̄ọ isan̄. Enye asan̄a ebe Samaria okodụk Galilee; ndien akpatre ini emi enye edide Galilee edi emi mbemiso ẹwot enye.

Ke ini Jesus osụk ọtọn̄ọde-tọn̄ọ isan̄ emi oto ke obio esịm obio, enye osobo irenowo duop emi ẹdọn̄ọde akpamfia. Ndusụk ini, udọn̄ọ emi ekeme ndita owo ndido idem n̄kpok nsịtnsịt, utọ nte nnuenubọk, nnuenukot, m̀mê utọn̄. (Numbers 12:10-12) Ibet Abasi ọkọdọhọ mme akpamfia ẹsidụn̄ nsannsan ẹsinyụn̄ ẹfiori ẹte “Edidehe, edidehe!”—Leviticus 13:45, 46.

Ntem, mbon akpamfia duop emi isan̄ake ikpere Jesus. Edi mmọ ẹda nsannsan ẹmenede uyo mmọ ẹfiori ẹte: “Jesus, Andikpep, tua nnyịn mbọm!” Ke ini Jesus okụtde mmọ, enye ọdọhọ mmọ ete: “Ẹka ẹkewụt mme oku idem mbufo.” (Luke 17:13, 14) Jesus ndidọhọ mmọ ẹkewụt mme oku idem owụt ke enye okpono Ibet Abasi emi ọkọnọde mme oku odudu nditịn̄ ke mbon akpamfia oro ẹkọkde mmọ udọn̄ọ mmọ ẹsana. Ntem, mmọ ẹkeme ndifiak ndidụn̄ ye mbon emi n̄kpọ mînamke.—Leviticus 13:9-17.

Mbon akpamfia duop emi ẹdiọn̄ọ ke Jesus enyene odudu ndinam idem ọsọn̄ mmimọ. Ntem mmọ ẹdaha ẹka ndiwụt oku idem mbemiso ẹnamde mmọ ẹsana. Nte mmọ ẹsụk ẹsan̄ade ke usụn̄ ẹka, ẹnam mmọ ẹsana nte mbuọtidem mmọ okonyụn̄ edide. Mmọ ẹtọn̄ọ ndikop ke idem mmọ nnyụn̄ n̄kụt ke ẹkọk akpamfia mmimọ!

Mbon akpamfia usụkkiet eken ẹka se mmọ ẹkesụk ẹkade. Edi owo kiet ke otu mmọ afiak. Owo Samaria emi afiak edi ediyom Jesus. Ntak-a? Ete emi edi ndinen̄ede n̄kọm Jesus ke se itịbede emi. Akani owo akpamfia emi ọdiọn̄ọ ke Abasi anam Jesus ọkọk imọ udọn̄ọ emi, emi anam enye “edi edinọ Abasi ubọn̄ ke ọkpọsọn̄ uyo.” (Luke 17:15) Ke ini enye okụtde Jesus, enye ọduọ ke isọn̄ ọkọm enye.

Jesus obụp mbon emi ẹdude do ye enye ete: “Nte idịghe owo duop ke ẹkenam ẹsana? Enye, ndien, owo usụkkiet eken? Nte owo baba kiet idụhe eke afiakde edi edinọ Abasi ubọn̄ ke mîbọhọke owo idụt efen emi?” Ekem enye ọdọhọ owo Samaria oro ete: “Daha nyọn̄ okwo; mbuọtidem fo anam idem ọsọn̄ fi.”—Luke 17:17-19.

Jesus ndinam mbon akpamfia mboduop emi ẹsana owụt ke Jehovah Abasi odu ye enye. Ikụreke ke enye ndinam kiet ke otu mmọ asana, edi ete oro ekeme ndinyene nsinsi uwem. Abasi idaha Jesus inam mme utọ utịben̄kpọ emi ke eyo nnyịn. Edi edieke ibuọtde idem ye Jesus, imekeme ndinyene nsinsi uwem. Ndi imesikọm Jehovah ke se enye anamde emi ọnọ nnyịn, kpa nte owo Samaria oro akanamde?