Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 84

Ndi Emem Utom Ndidi Mbet Jesus?

Ndi Emem Utom Ndidi Mbet Jesus?

LUKE 14:25-35

  • SE IDITAKDE OWO EMI EDIDE MBET

Jesus ekpep mme owo ediwak nti n̄kpọ ke ini enye osụk adiade udia ke ufọk etubom mme Pharisee. Enye afiak ọtọn̄ọ isan̄ ndika Jerusalem, ndien akwa otuowo ẹsan̄a ye enye. Ntak emi mmọ ẹsan̄ade ye enye? Ndi enen̄ede ọdọn̄ mmọ ndidi mbet esie, kpa ye oro emi edikpade mmọ n̄kpọ?

Nte mmọ ẹsụk ẹsan̄ade ke usụn̄, Jesus etịn̄ ikọ emi ekemede ndikpa ndusụk owo idem: “Edieke owo ekededi etienede mi ndien mîsuaha ete esie ye eka esie ye n̄wan esie ye nditọ esie ye nditọeka esie iren ye nditọeka esie iban, ih, mînyụn̄ isuaha ukpọn̄ esiemmọ, enye ikemeke ndidi mbet mi.” (Luke 14:26) Edi nso ke ikọ esie emi ọwọrọ?

Jesus idọhọke mbet esie ẹkûma iman mmọ. Utu ke oro, ikọ esie ọwọrọ ke inaha mmọ ẹma iman mmọ ẹkan nte ẹmade imọ. Inaha mmọ ẹtie nte ete oro mîkakaha akpan ikot emi ẹkekotde enye sia enye osụk ọdọde n̄wan ndondo emi. (Luke 14:20) Bible ọdọhọ ke Jacob ama ‘asua’ Leah edi ama Rachel. Emi ọwọrọ ke enye ikamaha Leah nte akamade Rachel.—Genesis 29:31.

Ti n̄ko ke Jesus ọdọhọ ke ana owo oro oyomde ndidi mbet asua “ukpọn̄ esiemmọ,” oro edi, uwem esie. Emi ọwọrọ ke ata mbet Jesus enyene ndima Jesus n̄kan nte enye amade uwem esie, ana enye eben̄e idem ndikpa edieke n̄kpọ n̄kpa ọwọrọde. Nte an̄wan̄ade, imemke utom ndidi mbet Christ. Owo ikpadaha enye didie didie.

Ẹkeme ndikọbọ owo emi edide mbet Jesus mîdịghe n̄kpọ ọsọn̄ ye enye koro Jesus ọdọhọ ete: “Owo ekededi eke mîbiomke eto ndutụhọ esie itiene mi ikemeke ndidi mbet mi.” (Luke 14:27) Ana owo emi edide ata mbet Jesus enyịme ndibọ esuene nte Jesus ọkọbọde. Jesus ama akam ọdọhọ ke mme asua imọ ẹdiwot imọ.

Ntem ana akwa otuowo emi ẹsan̄ade ye Jesus ẹka Jerusalem ẹtịm ẹkere se owo ndidi mbet Christ ọwọrọde. Jesus ọnọ uwụtn̄kpọ kiet ndiwụt ke emi edi akpan n̄kpọ. Enye ọdọhọ ete: “Ke uwụtn̄kpọ, anie ke otu mbufo emi oyomde ndibọp tọwa mîdibemke iso isụhọde itie ibat se iditakde, man okụt m̀mê enye enyene okụk emi ekemde ndida mbọp mma? Mîdịghe ntre, enye eyesịn itiat idakisọn̄ edi ikemeke ndibọp mma.” (Luke 14:28, 29) Ntem mbemiso mbon emi ẹsan̄ade ye Jesus ẹka Jerusalem mi ẹkabarede ẹdi mbet esie, ana mmọ ẹbiere ndinam se ededi emi anade mbet anam. Jesus ọnọ uwụtn̄kpọ en̄wen ndiwụt ntak anade mmọ ẹnam ntre:

“Ewe edidem, emi akade ekọn̄ ye edidem en̄wen, mîdibemke iso isụhọde itie ikere m̀mê enye eyekeme ndida mbonekọn̄ tọsịn duop n̄n̄wana ye enye emi asan̄ade ye mbonekọn̄ tọsịn edịp edi ndin̄wana ye enye? Ke akpanikọ, edieke enye mîdikemeke ndinam ntre, ke adan̄aemi enye eken osụk odude kan̄a anyan usụn̄ enye ọdọn̄ otu isụn̄utom ete ẹkekpe emem.” Jesus afiak etịn̄ ikọ ndisọn̄ọ se enye ama eketetịn̄ ete: “Ntem, ke akpanikọ, owo mbufo ekededi eke mîsanake kpukpru se enye enyenede iyak ikemeke ndidi mbet mi.”—Luke 14:31-33.

Ikọ Jesus emi ibeheke mbon emi ẹsan̄ade ye enye ẹka Jerusalem kpọt. Ana kpukpru owo emi ẹdiọn̄ọde Christ ẹben̄e idem ndinam se Jesus etịn̄de emi. Ọwọrọ ke ana mmọ ẹben̄e idem ndiyak kpukpru se mmọ ẹnyenede atak, idem kpa ye uwem mmọ, edieke mmọ ẹyomde ndidi mbet esie. Ana owo etịm ekere n̄kpọ emi onyụn̄ esịn ke akam.

Jesus afiak etịn̄ n̄kpọ emi enye ama eketetịn̄ ke ukwọrọikọ esie oro ke Obot, ke ini enye ọkọdọhọde ke mbet imọ ẹdi “inụn̄ isọn̄.” (Matthew 5:13) Etie nte ikọ esie ọwọrọ ke kpasụk nte inụn̄ ekemede ndinam n̄kpọ okûbiara, ke se mme mbet ẹdikpepde mme owo ayanam mme owo ẹdu eti uwem, idinyụn̄ iyakke mmọ ẹkpọn̄ Abasi. Idahaemi sia enye edikụrede utom esie ke isọn̄ ke mîbịghike, enye ọdọhọ ete: “Ke akpanikọ, inụn̄ ọfọn. Edi edieke inụn̄ adabade, ẹdida nso ẹnam enye enem?” (Luke 14:34) Mbon emi ẹkpan̄de utọn̄ ẹnọ enye ẹdiọn̄ọ ke ndusụk inụn̄ emi odude ini oro inen̄ekede ifọn, sia akabuahade ye ntan ye mme n̄kpọ eken.

Se Jesus etịn̄de edi ke inaha mbon emi ẹma ẹkedi mbet esie ke anyan ini ẹyak idem emem mmọ. Edieke mmọ ẹyakde idem emem mmọ, mmọ idinyeneke ufọn; mmọ ẹditie nte inụn̄ oro adabade. Ini oro ndien, mbon ererimbot ẹyesak mmọ. Se ikam idiọkde ikan edi ke Abasi ididaha mmọ nte n̄kpọ ndomokiet, ke mmọ ẹyekam ẹnam ẹsuene enyịn̄ Abasi. Jesus ọsọn̄ọ etịn̄ se ẹkpenamde man emi iditịbe. Enye ọdọhọ ete: “Yak owo eke enyenede utọn̄ ndikop okop.”—Luke 14:35.

Kpep N̄kpọ En̄wen

Akpasan̄a Didie Ọfiọk Ido Ukpono Akpanikọ?

Ndi ido ukpono akpanikọ kiet kpọt odu? N̄kpọ ition emi ẹdade ẹdiọn̄ọ ido ukpono akpanikọ.