Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 98

Mme Apostle Ẹfiak Ẹyom Uwọrọiso

Mme Apostle Ẹfiak Ẹyom Uwọrọiso

MATTHEW 20:17-28 MARK 10:32-45 LUKE 18:31-34

  • JESUS AFIAK ETỊN̄ KE ẸMỌN̄ ẸWOT IMỌ

  • ỌNỌ MME APOSTLE ITEM ABAN̄A UWỌRỌISO

Jesus ye mme mbet esie ẹkpere utịt isan̄ emi mmọ ẹkesan̄ade ke usụk usụk ke Perea, ndibe n̄ka Jerusalem. Mmọ ẹbe Akpa Jordan ke ebiet emi ekperede Jericho. Mbon en̄wen ẹsan̄a ye mmọ man ẹkedụk Passover eke isua 33 eyo Christ.

Jesus oyom ndisọsọp n̄kesịm Jerusalem ke ntak Passover ntre enye ebe aka ke iso, mbet ke ẹtiene enye ke edem. Edi ndịk anam mme mbet Jesus. Ke ini Jesus okoyomde ndito Perea n̄ka Judea ke ini n̄kpa Lazarus, Thomas ama ọdọhọ mme mbet eken ete: “Ẹyak nnyịn n̄ko ika, man nnyịn ikakpa ye enye.” (John 11:16, 47-53) An̄wan̄a ndien se inamde idem enyek mme mbet, sia mmọ ẹdiọn̄ọ ke mfịna ke ana ebet mmimọ ke Jerusalem.

Jesus emen mme apostle esie ọwọn̄ọde ada onyụn̄ etịn̄ ikọ ye mmọ man etịm mmọ idem eben̄e se iditịbede ke Jerusalem. Enye ọdọhọ mmọ ete: “Nnyịn imọn̄ idọk ika Jerusalem, ndien ẹyeyak Eyen owo ẹnọ mbọn̄ oku ye mme scribe, ndien mmọ ẹyebiom enye ikpe n̄kpa, ẹnyụn̄ ẹyak enye ẹnọ mbon idụt ndisak enye nsahi nnyụn̄ mmia enye nnyụn̄ n̄kọn̄ enye ke eto, ndien enye eyeset ke ọyọhọ usen ita.”—Matthew 20:18, 19.

Ọyọhọ ikata edi emi Jesus ọdọhọde mme mbet ke imọ iyakpa inyụn̄ iset. (Matthew 16:21; 17:22, 23) Edi isan̄ enye emi enye etịn̄ ke ẹdikọn̄ imọ ke eto. Mmọ ẹkop se enye etịn̄de, edi ikọ esie in̄wan̄ake mmọ. Etie nte mmọ ẹyom ẹfiak ẹwụk obio ubọn̄ Israel mi ke isọn̄ man ẹkpono mmimọ ẹnyụn̄ ẹnọ mmimọ ubọn̄ ye Christ mi ke isọn̄.

Mma kiet emi ekerede Salome etiene asan̄a ye mmọ. Enye edi eka James ye John. Jesus ama ọnọ mme apostle iba emi enyịn̄ emi ọwọrọde “Nditọ Obuma” ke ntak emi mmọ ẹsiyatde esịt ntịme ntịme. (Mark 3:17; Luke 9:54) Ebịghi apostle iba emi ẹketọn̄ọ ndiyom ikpọ itie ke Obio Ubọn̄ Christ ndien eka mmọ ọdiọn̄ọ se nditọ esie ẹyomde. Enye aka ke idemesie nditịn̄ n̄kpọ emi nnọ Jesus. Enye okonụhọ ke iso Jesus onyụn̄ ọdọhọ enye anam n̄kpọ ọnọ imọ. Jesus obụp enye ete: “Nso ke afo oyom?” Enye ọbọrọ ete: “Nọ uyo man nditọiren mi iba emi ẹkpetie, kiet ke ubọk nnasia fo, kiet ke ufien, ke obio ubọn̄ fo.”—Matthew 20:20, 21.

James ye John ẹdọn̄ eka mmọ ekeben̄e Jesus n̄kpọ emi. Jesus ọdọhọ mmọ ete: “Mbufo ifiọkke se mbufo ẹben̄ede. Nte mbufo ẹmekeme ndin̄wọn̄ cup emi ami nyomde ndin̄wọn̄?” Mmọ ẹdọhọ enye ẹte: “Nnyịn imekeme.” Cup emi Jesus etịn̄de aban̄a edi esuene emi enye edibọde ye ndọk emi enye edidiade. (Matthew 20:22) Edi osụk etie nte se Jesus etịn̄de aban̄a cup inen̄ekede in̄wan̄a mmọ.

Kpa ye oro Jesus ọdọhọ mmọ ete: “Ke akpanikọ, Mbufo ẹyen̄wọn̄ cup mi, edi editie ke nnasia mi ye ke ufien mi inyeneke mi ndinọ, edi enyene mbon emi Ete mi eketịmde oro ọnọ.”—Matthew 20:23.

Ke ini mme apostle duop eken ẹkopde se James ye John ẹben̄ede, esịt ayat mmọ etieti. Okûdi James ye John ẹma ẹtetịn̄ ke mmimọ ikpon ikan ke ini mme apostle ẹkenenide n̄kpọ emi? (Luke 9:46-48) M̀mê ama edi ntre m̀mê idịghe, se mmọ ẹben̄ede Jesus owụt ke mbet 12 emi isụk inamke item emi Jesus ọkọnọde mmọ ẹte ẹda idem ke n̄kpri n̄kan. Mmọ ke ẹsụk ẹyoyom uwọrọiso.

Jesus ebiere ndinam n̄kpọ mban̄a eneni emi ye utọk emi enye adade edi. Enye okot mbet 12 emi obon onyụn̄ ọnọ mmọ item ete: “Mbufo ẹmefiọk ẹte ke mbon emi ẹbatde nte mme andikara mme idụt ẹkara mmọ ke ọkpọsọn̄ ubọk, ikpọ owo mmọ ẹnyụn̄ ẹnyene odudu ke idem mmọ. Inyeneke ndidi ntem ke otu mbufo; edi owo ekededi eke oyomde ndidi akwa owo ke otu mbufo edidi asan̄autom mbufo, owo ekededi eke onyụn̄ oyomde ndidi akpa ke otu mbufo edidi ofụn kpukpru mbufo.”—Mark 10:42-44.

Jesus ọdọhọ mmọ ẹkpebe uwụtn̄kpọ imọ. Enye ọdọhọ ete: “Eyen owo [ikedịghe] man ẹnam n̄kpọ ẹnọ enye, edi man enye anam n̄kpọ ọnọ owo onyụn̄ ọnọ ukpọn̄ esie nte ufak ke ibuot ediwak owo.” (Matthew 20:28) Jesus anam n̄kpọ ọnọ mme owo ke isua ita idahaemi, enye ọmọn̄ anam se ikande oro ke ndikpa nnọ kpukpru owo! Ana mme mbet esie ẹkpebe enye. Ana mmọ ẹma ndinam n̄kpọ nnọ mbon en̄wen utu ke ndiyom mbon en̄wen ẹnam n̄kpọ ẹnọ mmọ, ẹnyụn̄ ẹda idem ke n̄kpri n̄kan utu ke ndiyom uwọrọiso.