Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 85

Ẹnem Esịt Ẹban̄a Anamidiọk Emi Akabarede Esịt

Ẹnem Esịt Ẹban̄a Anamidiọk Emi Akabarede Esịt

LUKE 15:1-10

  • UWỤTN̄KPỌ EMI ABAN̄ADE ERỌN̄ YE OKỤK EMI OKOSOPDE

  • MME ANGEL KE HEAVEN ẸKOP IDATESỊT

Nte Jesus osụk ọkwọrọde ikọ enye ọsọn̄ọ etịn̄ ediwak ini nte ọfọnde ndisụhọde idem. (Luke 14:8-11) Enen̄ede ọdọn̄ enye ndikụt mbon emi ẹyomde ndisụhọde idem nnam n̄kpọ Abasi. Edi ndusụk mmọ ke ẹsụk ẹnanam ikpọ idiọkn̄kpọ tutu esịm emi.

Mme Pharisee ye mme scribe ẹkụt ke mbon oro mmimọ mîdaha ke n̄kpọ ndomokiet mi ẹma ndisan̄a n̄kpere Jesus ẹnyụn̄ ẹma ukwọrọikọ esie. Mmọ ẹdọhọ ẹte: “Owo emi adadara mme anamidiọk onyụn̄ adia n̄kpọ ye mmọ.” (Luke 15:2) Mme Pharisee ye mme scribe ẹda idem ke n̄kpọ ẹnyụn̄ ẹda mme usụhọde owo nte mbat emi odude mmọ ke idak ikpat. Enyịn̄ emi mmọ ẹsikotde mme utọ owo oro owụt nte mmọ ẹsede mmọ ke ndek, oro edi, ‛am ha·’aʹrets, kpa ikọ Hebrew emi ọwọrọde “mbio obio [isọn̄].”

Jesus inamke n̄kpọ ntre, enye okpokpono kpukpru owo, ọfọn ido ye mmọ onyụn̄ atua mmọ mbọm. Ediwak mbon emi owo mîdaha ke n̄kpọ, esịnede mbon emi mme owo ẹdiọn̄ọde ke ẹsinam idiọkn̄kpọ ke ubọk ke ubọk ẹma ndikpan̄ utọn̄ n̄kop se Jesus ekpepde. Edi Jesus ekere didie, onyụn̄ anam n̄kpọ didie aban̄a se mme owo ẹtịn̄de ẹban̄a enye ndin̄wam utọ mbon emi?

Uwụtn̄kpọ kiet emi enye ọnọde, emi onyụn̄ ebietde enye emi enye ọkọnọde ke Capernaum, owụt se enye ekerede. (Matthew 18:12-14) Jesus anam etie nte ke mme Pharisee ẹdi ndinen owo, ke n̄kpọ inyụn̄ ikemeke ndinam mmọ sia mmọ ẹdude ke otuerọn̄ Abasi. Edi etie nte mme usụhọde owo eken ẹma ẹyo ẹkpọn̄ otuerọn̄, ndien ana ẹkeyoyom mmọ. Jesus ọdọhọ ete:

“Anie ke otu mbufo emi enyenede erọn̄ ikie, ndien kiet ke otu mmọ osop, mîdikpọn̄ke anan̄ ye efịtenan̄ ke wilderness ika ikoyom kiet emi osopde tutu okụt enye? Ndien ama okụt enye, emen odori ke afara esie onyụn̄ adara. Ndien ke ini esịmde ufọk, enye okot mme ufan esie ye mbọhọidụn̄ esie ẹdi, ọdọhọ mmọ ete, ‘Ẹtiene mi ẹdara koro mmokụt erọn̄ mi emi okosopde.’”—Luke 15:4-6.

Didie ke Jesus anam ikọ esie an̄wan̄a? Enye ọdọhọ mmọ ete: “Ndọhọ mbufo nte, ntem ke idatesịt edidu ke heaven aban̄a anamidiọk kiet emi akabarede esịt akan ndinen owo anan̄ ye efịtenan̄ emi mînyeneke se ẹkabarede esịt ẹban̄a.”—Luke 15:7.

Anaedi akpa mme Pharisee idem nte Jesus etịn̄de ikọ aban̄a edikabade esịt. Mme Pharisee ẹda idem ke edinen inyụn̄ ikereke ke oyom mmimọ ikabade esịt. Isua ifan̄ ke edem, ke ini ndusụk mmọ ẹkesuade ẹnọ Jesus nte enye adiade udia ye mme ọbọ a-tax ye mme anamidiọk, Jesus ọkọdọhọ mmọ ete: “N̄kedịghe ndikot ndinen owo, edi n̄kedi ndikot mme anamidiọk.” (Mark 2:15-17) Sia mme Pharisee emi ẹdade idem ke edinen ẹkerede ke mmimọ inamke idiọkn̄kpọ emi oyomde mmimọ ikabade esịt, idatesịt idụhe ke heaven. Edi ke ini mme anamidiọk ẹkabarede esịt, idatesịt esidu ke heaven.

Jesus ada se isitịbede ke ufọk ọnọ uwụtn̄kpọ en̄wen ndisụk n̄wụt ke idatesịt esikpon ke heaven ke ini anamidiọk akabarede esịt. Enye ọdọhọ ete: “Ewe n̄wan eke enyenede okụk drachma duop, ndien okụk drachma kiet ọbọhọ enye osop, mîdidomoke utuenikan̄ ikpọri ufọk inyụn̄ itịm iyom tutu okụt enye? Ndien ama okụt, enye okot iban emi ẹdide mme ufan ye mbọhọidụn̄ esie obon ọtọkiet onyụn̄ ọdọhọ ete, ‘Ẹtiene mi ẹdara koro mmokụt okụk drachma emi ọkọbọhọde mi osop.’”—Luke 15:8, 9.

Se Jesus etịn̄de aban̄a uwụtn̄kpọ enye emi etie ukem ukem nte se enye eketịn̄de aban̄a uwụtn̄kpọ erọn̄ emi okosopde. Enye ọdọhọ ete: “Ntem, ndọhọ mbufo nte, idatesịt odu ke otu mme angel Abasi aban̄a anamidiọk kiet emi akabarede esịt.”—Luke 15:10.

Ọwọrọ esịt esinem mme angel Abasi etieti ke ini anamidiọk akabarede esịt. Ọfọn itịm ikere se mme angel ẹsinamde emi sia anamidiọk emi akabarede esịt onyụn̄ odụkde Obio Ubọn̄ heaven oyokpon itie akan mme angel. (1 Corinth 6:2, 3) Edi mme angel iyatke esịt inyụn̄ ifịbeke anamidiọk emi. Nnyịn ndien ikpanam n̄kpọ didie ke ini anamidiọk akabarede esịt afiak ọtọn̄ọ ndinam n̄kpọ Abasi?

Kpep N̄kpọ En̄wen

Ndi Abasi Ekeme Ndifen Mme Idiọkn̄kpọ Nnyịn?

Ndi Abasi esifen ikpọ idiọkn̄kpọ? Nso ke ikpanam man Abasi efen ọnọ nnyịn?

Nso idi Obio Ubọn̄ Abasi?

Ke ini Jesus okodude ke isọn̄, enye ama owụt se Obio Ubọn̄ Abasi edinamde.