Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 91

Ẹnam Lazarus Eset

Ẹnam Lazarus Eset

JOHN 11:38-54

  • ẸNAM LAZARUS ESET

  • MBON SANHEDRIN ẸDỤK ODU NDIWOT JESUS

Martha ye Mary ẹdi ẹdisobo ye Jesus ke mbọhọ Bethany, ndien mmọ ẹsan̄a ntre ẹka udi emi ẹkebụkde Lazarus. Udi emi edi abaitiat, ẹnyụn̄ ẹda itiat ẹkwi ke inua udi oro. Jesus ọdọhọ ete: “Ẹkpat itiat ẹsio.” Sia Martha mîdiọn̄ọke se Jesus oyomde ndinam enye ọdọhọ ete: “Ọbọn̄, anaedi enye etebe ke emi, koro usen inan̄ edi emi.” Jesus obụp enye ete: “Nte n̄kọdọhọke fi nte edieke enịmde ke akpanikọ oyokụt ubọn̄ Abasi?”—John 11:39, 40.

Ẹkpat itiat ẹsio. Ndien Jesus emenede enyịn ke enyọn̄ ọbọn̄ akam ete: “Ete, mmọkọm fi koro afo okopde akam mi. Ke akpanikọ, mmọfiọk nte ke afo emesikop uyo mi kpukpru ini; edi ntịn̄ ntem ke ntak otuowo emi ẹdade ẹkpere mi, man mmọ ẹkpenịm ke akpanikọ ẹte afo okosio mi ọdọn̄.” Jesus ndida ke iso mme owo mbọn̄ akam anam mmọ ẹkụt ke odudu Abasi ke enye edida inam se enye oyomde ndinam. Ekem enye ofiori ke ọkpọsọn̄ uyo ete: “Lazarus, wọrọ di!” Lazarus ọwọrọ edi ye ọfọn̄ emi ẹkedade ẹbọp enye ukot ye ubọk, ọfọn̄ onyụn̄ ọbọbọ enye ke iso. Jesus ọdọhọ mmọ ete: “Ẹtat enye ẹnyụn̄ ẹyak enye ọnyọn̄.”—John 11:41-44.

Ediwak mme Jew emi ẹkedide ndidọn̄ Mary ye Martha esịt ẹkụt utịben̄kpọ emi ẹnyụn̄ ẹbuọt idem ye Jesus. Edi mbon eken ẹdaha ẹbịne mme Pharisee ẹketịn̄ se Jesus anamde. Mme Pharisee ye mbọn̄ oku emi ẹdide mbon akwa esopikpe mme Jew emi ẹkotde Sanhedrin ẹkot mbono. Caiaphas emi edide akwa oku esịne ke otu emi. Ndusụk mmọ ẹseme ẹte: “Nnyịn inanam didie, koro owo emi amanam ediwak idiọn̄ọ? Edieke nnyịn isanade enye iyak, kpukpru mmọ ẹyebuọt idem ye enye, ndien mbon Rome ẹyedi ẹdibọ nnyịn itie nnyịn ye idụt nnyịn.” (John 11:47, 48) Kpa ye oro ẹkopde ediwak owo ẹtịn̄de ke imokụt nte Jesus anamde “ediwak idiọn̄ọ,” mmọ inemke esịt iban̄a se Abasi adade Jesus anam. Se ibehede mmọ ikan edi ikpọ itie ye odudu.

Jesus ndinam Lazarus eset ke n̄kpa enen̄ede abiak mme Sadducee emi mînịmke ediset ke n̄kpa ke akpanikọ. Caiaphas emi edide Sadducee osioro uyo ndien etịn̄ ikọ ete: “Mbufo ifiọkke n̄kpọ ndomokiet, mbufo inyụn̄ ikereke ite ke edi ke ufọn mbufo owo kiet ndikpa ke ibuot mme owo akan ofụri idụt nditak.”—John 11:49, 50; Utom 5:17; 23:8.

Caiaphas ‘itịn̄ke ikọ emi ke ifiọk idemesie,’ Abasi anam enye etịn̄. N̄kọ enye edi akwa oku. Ikọ esie ọwọrọ ke akpana ẹwot Jesus mîdịghe ntre mme owo idikponoke mme adaiso ido ukpono mme Jew aba, idinyụn̄ ikopke uyo mmọ. Ikọ Caiaphas edi prọfesi n̄ko, sia enye owụt ke Jesus idikpaha inọ mme Jew kpọt, ke enye edikpa man afak kpukpru “nditọ Abasi emi ẹsuanade.”—John 11:51, 52.

Se Caiaphas etịn̄de anam ofụri Sanhedrin ẹdụk odu ndiwot Jesus. Ndi Nicodemus emi edide owo Sanhedrin, emi onyụn̄ amade Jesus, ọmọn̄ eketịn̄ se mmọ ẹduakde emi ọnọ Jesus? M̀mê enye etịn̄ m̀mê itịn̄ke, Jesus mbon ọsọsọp ọkpọn̄ Jerusalem man owo idiwot enye mbemiso ini emi Abasi ekenịmde.

Kpep N̄kpọ En̄wen

Owo Ama Akpa, Esie Ikụreke!

Ntak emi Jesus ọkọdọhọde ke mme akpan̄kpa ẹdede? Bible ọdọhọ ke ẹma ẹnam mme owo ẹset. Nso ke emi owụt?