Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 90

“Ediset ye Uwem”

“Ediset ye Uwem”

JOHN 11:17-37

  • JESUS EDISỊM KE LAZARUS AMA AKAKPA

  • “EDISET YE UWEM”

Jesus oto Perea edi, enye ekpere Bethany, emi ẹsan̄ade ke itiat iba ẹto do ẹsịm Jerusalem. Mary ye Martha, nditọeka Lazarus ke ẹtua eyeneka mmọ emi akpade ndondo emi. Ediwak owo ẹdi ndidọn̄ mmọ esịt.

Owo edidọhọ Martha ke Jesus ọmọn̄ ededi edisịm, ndien Martha efehe ọwọrọ ebịne Jesus. Enye ọdọhọ Jesus ete: “Ọbọn̄, edieke afo okpokodude mi eyeneka mi ikpakakpaha.” Etie nte se enye ye eyeneka esie ẹkekerede ke usen inan̄ emi ẹkebede edi emi. Edi se enye etịn̄de emi iwọrọke ke enye inyeneke idotenyịn. Enye ọdọhọ Jesus ete: “Mmọfiọk nte ke adan̄a ediwak n̄kpọ eke afo eben̄ede Abasi, Abasi ọyọnọ fi.” (John 11:21, 22) Enye ọdiọn̄ọ ke Jesus ekeme ndisụk n̄n̄wam eyeneka imọ.

Jesus ọbọrọ enye ete: “Eyeneka fo eyeset.” Martha ekere ke enye etịn̄ aban̄a ini emi Jesus edinamde mme owo ẹset mi ke isọn̄, emi Abraham ye mbon eken ẹditienede ẹset. Ndien enye etịn̄ ikọ ndiwụt ke imenịm emi ke akpanikọ: “Mmọfiọk nte enye eyeset ke ini ediset ke n̄kpa ke akpatre usen.”—John 11:23, 24.

Edi, ndi Jesus ekeme ndinam n̄kpọ mban̄a se itịbede emi? Enye eti Martha ke Abasi ọnọ imọ odudu ndikan n̄kpa, onyụn̄ ọdọhọ Martha ete: “Owo eke ọbuọtde idem ye ami, idem ọkpọkọm enye akpakpa, oyodu uwem; ndien kpukpru owo eke ẹdude uwem ẹnyụn̄ ẹbuọtde idem ye ami idikpaha tutu amama.”—John 11:25, 26.

Ikọ Jesus iwọrọke ite ke mme mbet imọ emi ẹdude uwem idahaoro idikpaha tutu amama. Enye ke idem esie ekenyene ndikpa, enye ama onyụn̄ etịn̄ emi ọnọ mme apostle esie. (Matthew 16:21; 17:22, 23) Ikọ Jesus ọwọrọ ke owo ama ọbuọt idem ye imọ, ke enye ekeme ndinyene uwem nsinsi. Ẹdinanam ediwak owo ẹset man ẹdinyene uwem nsinsi. Edi ndusụk mme anam-akpanikọ emi ẹdidude uwem ke utịt editịm n̄kpọ emi idikpaha tutu amama. Edide owo odụk Obio Ubọn̄ Abasi ye uwem m̀mê eseset odụk, kpukpru mbon emi ẹbuọtde idem ye enye ẹdiọn̄ọ ke iyenyene uwem nsinsi.

Edi, ndi Jesus emi osụk ọdọhọde ke imọ idi “ediset ye uwem,” ekeme ndin̄wam Lazarus emi ama akakpa usen inan̄ ke edem? Jesus obụp Martha ete: “Nte afo emenịm emi ke akpanikọ?” Enye ọbọrọ ete: “Ih, Ọbọn̄; mmenịm nte afo edi Christ Eyen Abasi, Enye emi edide ke ererimbot.” Martha enyene mbuọtidem ke Jesus ekeme ndinam n̄kpọ usen oro. Ntem enye efehe aka ufọk ọkọdọhọ eyeneka esie ke ndịbe ete: “Andikpep mmọmi, ndien enye ke okot fi.” (John 11:25-28) Ke Mary okopde emi, enye adaha ọwọrọ, ndien mbon eken ẹdaha ẹtiene enye sia mmọ ẹkerede ke udi Lazarus ke enye aka oro.

Utu ke ndika udi, Mary aka ebịne Jesus, akatua ọduọ enye ke ukot, onyụn̄ afiak etịn̄ se Martha eketịn̄de ete: “Ọbọn̄, edieke afo okpokodude mi, eyeneka mi ikpakakpaha.” Ke Jesus okụtde Mary ye otuowo eken nte ẹtuan̄ade, enye omụm mmụm, esịt etịmede enye, enye onyụn̄ atua. N̄kpọ emi otụk mbon emi ẹdade ẹkụt tutu. Edi ndusụk mmọ ẹbụp ẹte: ‘Edieke Jesus ekekemede nditat enyịn owo emi akamanade nnan, ndi enye ikpekekemeke ndinam owo emi okûkpa?’—John 11:32, 37.