Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 99

Jesus Anam Nnan Iba Ẹkụt Usụn̄ Onyụn̄ An̄wam Zacchaeus

Jesus Anam Nnan Iba Ẹkụt Usụn̄ Onyụn̄ An̄wam Zacchaeus

MATTHEW 20:29-34 MARK 10:46-52 LUKE 18:35–19:10

  • JESUS ANAM MME NNAN ẸKỤT USỤN̄ KE JERICHO

  • ZACCHAEUS ỌBỌ A-TAX AKABADE ESỊT

Jesus ye mbon oro ẹsan̄ade ye enye ẹdisịm Jericho; ẹsida usen kiet ẹto do ẹsan̄a ẹsịm Jerusalem. Ke nditịm ntịn̄, Jericho ekedi iba, akani ye obufa. Akani Jericho okoyom usụn̄ ke n̄kpọ nte itiat kiet ọkpọn̄ Jericho emi ẹkesiakde obufa ke ini mbon Rome ẹkekarade. Nte Jesus ye mbon emi ẹsan̄ade ye enye ẹbede Jericho kiet ẹyom ndidụk en̄wen, nnan iba emi ẹsiben̄ede eben̄e ẹkop mme owo ẹsịnde editịm. Owo mmọ kiet ekere Bartimaeus.

Ke ini Bartimaeus ye eben̄e eben̄e enye eken ẹkopde ke Jesus asan̄a ebe, mmọ ẹtọn̄ọ ndifiori ẹte: “Ọbọn̄, tua nnyịn mbọm, Eyen David!” (Matthew 20:30) Ndusụk owo emi ẹketienede Jesus ẹdọhọ mmọ ẹdop uyo, edi mmọ mbiba ẹtetịm ẹsio n̄kpo. Ke ini Jesus okopde uyo mmọ, enye atuak ada. Enye ọdọhọ mbon oro ẹsan̄ade ye enye ete ẹkot owo emi osiode n̄kpo ẹdi. Mmọ ẹka ẹbịne mme eben̄e eben̄e oro ẹkedọhọ owo mmọ kiet ẹte: “Sọn̄ idem daha ke enyọn̄, enye ke okot fi.” (Mark 10:49) Esịt enem ete emi, enye otop ewụra esie ọduọk, obụmede adaha etiene Jesus.

Jesus obụp mmọ ete: “Ẹyom nnam nso nnọ mbufo?” Mmọ mbiba ẹbọrọ enye ẹte: “Ọbọn̄, tat nnyịn enyịn.” (Matthew 20:32, 33) Mbọm mmọ anam Jesus, ndien enye otụk mmọ enyịn, onyụn̄ ọdọhọ kiet ke otu mmọ ete: “Ka, mbuọtidem fo anam idem ọsọn̄ fi.” (Mark 10:52) Mme eben̄e eben̄e iba emi ẹkụt usụn̄, ẹnyụn̄ ẹtọn̄ọ nditoro Abasi. Se mme owo ẹkụtde emi anam mmọ n̄ko ẹtiene ẹtoro Abasi. Mbon oro ẹkedide nnan do ẹtọn̄ọ nditiene Jesus.

Otuowo emi ẹsan̄ade ye Jesus ẹbe ke Jericho ẹwak etieti. Kpukpru owo ẹyom ndikụt owo emi anamde mme nnan oro ẹkụt usụn̄. Mmọ ẹyọhọ enye idem ke iso ye ke edem, ke nnasia ye ke ufien; ndien emi iyakke ndusụk owo ẹkam ẹkokụt enye. Zacchaeus n̄ko ikemeke ndikụt Jesus. Enye edi etubom mme ọbọ a-tax ke Jericho ye mme obio oro ẹkperede Jericho. Sia enye mîniọn̄ke, enye ikemeke ndikụt se ikade iso. Ntem enye efehe aka iso ọkọdọk enyọn̄ eto fig kiet emi odude ke usụn̄ oro Jesus oyomde ndisan̄a mbe. Zacchaeus odoro ke enyọn̄ eto oro okụt kpukpru se ikade iso. Ke ini Jesus asan̄ade edisịm itie oro onyụn̄ okụt Zacchaeus ke enyọn̄ eto oro, enye ọdọhọ enye ete: “Zacchaeus, wara sụhọde di, koro nnyene ndidan̄ ke ufọk fo mfịn.” (Luke 19:5) Zacchaeus osụhọde edi onyụn̄ ọsọsọp ekesịm ufọk man ekeben̄e idem ọnọ akpan esenowo esie.

Ke ini mme owo ẹkụtde se ikade iso, mmọ ẹtọn̄ọ ndikụni. Mmọ ẹkere ke ifọnke Jesus ndika ufọk owo emi mmọ ẹdade nte anamidiọk. Zacchaeus ama esidia mme owo ke ini ọbọde mmọ okụk tax, ndien emi ke enye akada oforo.

Jesus ndisụk ndodụk ufọk Zacchaeus, mme owo ẹtọn̄ọ ndikụni: “Enye aka ndidan̄ ke ufọk owo emi edide anamidiọk.” Edi Jesus okụt ke Zacchaeus ekeme ndikabade esịt. Se inyụn̄ itịbede edi emi. Zacchaeus adaha ada ọdọhọ Jesus ete: ‘Sese! Ọbọn̄, nyọnọ mme ubuene ubak inyene mi, ndien se ededi emi n̄kodoride owo ikọ mbọ ke n̄kanubọk, nyosio usiene utịm ikanan̄.’—Luke 19:7, 8.

Emi ekedi ata eti usụn̄ Zacchaeus ndiwụt ke imenen̄ede ikabade esịt. Enye ekeme ndida se enye esiwetde enịm mbat okụk ifan̄ emi enye ọbọde nsio nsio nditọ Jew, enye onyụn̄ ọn̄wọn̄ọ ndisio usiene utịm ikanan̄. Enye akam anam ebe se ẹdọhọde ẹnam ke Ibet Abasi. (Exodus 22:1; Leviticus 6:2-5) Zacchaeus ọn̄wọn̄ọ n̄ko ndiyak ubak inyene esie nnọ mme ubuene.

Se Zacchaeus etịn̄de emi ndiwụt nte ikabarede esịt iketre enem Jesus tutu Jesus ọdọhọ ete: “Edinyan̄a ama odụk ufọk emi mfịn emi, koro enye n̄ko edide eyen Abraham. Koro Eyen owo ekedi ndiyom nnyụn̄ nnyan̄a se ikosopde.”—Luke 19:9, 10.

Ndondo emi ke Jesus ada uwụtn̄kpọ emi enye ọkọnọde aban̄a eyen oro ọkọkpọn̄de ufọk etịn̄ nte n̄kpọ etiede ye mbon emi ‘ẹsopde.’ (Luke 15:11-24) Idahaemi enye ada ata owo emi etiede nte ama osop, edi emi ẹfiakde ẹkụt, owụt se enye esikpepde. Mme adaiso ido ukpono mme Jew ye mbon oro ẹtienede mmọ ẹkeme ndikụni nnyụn̄ nsụk Jesus uyo ke ndidian idem ye owo nte Zacchaeus. Edi Jesus aka iso ndiyom nnyụn̄ nnam nditọ Abraham emi ẹkesopde mi ẹfiak ẹkpere Abasi.