Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Emekeme Ndinam Ubon Fo Ẹkop Inemesịt

 IKPEHE 6

Nte Nsekeyen Esikpụhọrede N̄kpọ ke Ufọk

Nte Nsekeyen Esikpụhọrede N̄kpọ ke Ufọk

“Nditọ ẹdi udeme . . . Jehovah.”Psalm 127:3

Mme ọdọ ndọ ẹsinen̄ede ẹkop inemesịt ke ini eyen amanade, edi ndikama nsekeyen idịghe ifia ubọk kiet. Sia edide akpa edi emi mbufo ndinyene eyen, anaedi mbufo ikọdiọn̄ọke ke nsekeyen ekeme ndinen̄ede ndia owo ini. Editaba idap nse eyen enyịn ye mme mfịna en̄wen emi nsekeyen ẹsikamade ẹkeme ndinam mbufo inen̄ekede ikpere kiet eken aba. Ntre, ana afo ye n̄wan fo ẹnam ukpụhọde man ẹkeme ndise mban̄a nsekeyen mbufo edi ifreke kiet eken enyịn. Didie ke item Bible ekeme ndin̄wam mbufo ke obufa uwem emi?

 1 FIỌK NTE NSEKEYEN ANAMDE UWEM MBUFO OKPỤHỌDE

BIBLE ỌDỌHỌ ETE: “Ima enyenyene anyanime onyụn̄ ọfọn ido.” Ima “iyomke ufọn idemesie, isọpke iyatesịt.” (1 Corinth 13:4, 5) Obufa ekaeyen esisịn ofụri ekikere esie ke idem nsekeyen esie. Nte esitiede edi oro, idịghe enye ama anam. Edi ebe fo ekeme nditọn̄ọ ndikere ke afo usehe aba uban̄a imọ. Ntre, kûfre ete ke oyom ese aban̄a enye n̄ko. Edieke enyenede ime onyụn̄ ọfọnde ido, emekeme ndin̄wam enye okụt ke amama enye, onyụn̄ anam enye etiene ese nsekeyen mbufo enyịn.

“Mbufo mme ebe, ẹka iso ẹdụn̄ ye mmọ ke ifiọk.” (1 Peter 3:7) Fiọk ete ke n̄wan fo edinen̄ede isịn idem ise iban̄a nsekeyen mbufo. Enye enyene obufa utom, ndien emi ekeme ndinam idem emem enye mîdịghe anam esịt etịmede enye. Ndusụk ini, enye ekeme ndiyat esịt ye afo, edi domo ndisụhọde esịt, koro “owo eke mîsọpke iyatesịt ọfọn akan ọkpọsọn̄ owo.” (Mme N̄ke 16:32) Nam n̄kpọ nte ọdiọn̄ọ-idem owo nyụn̄ n̄wam enye.—Mme N̄ke 14:29.

SE AKPANAMDE:

  • Ete: N̄wam n̄wan fo ese nsekeyen enyịn, idem ke okoneyo. Kûbiat ini ukaha ke mme n̄kpọ en̄wen man enyene ini odu ye n̄wan ye nsekeyen mbufo

  • Eka: Ke ini ebe fo oyomde ndin̄wam fi nse eyen enyịn, yak enye an̄wam. Edieke enye mînen̄ekede ifiọk se akpanamde, kûsua unọ enye, wụt enye se akpanamde

 2 ẸNEN̄EDE ẸKPERE KIET EKEN

BIBLE ỌDỌHỌ ETE: “Mmọ ẹyekabade ẹdi obụk kiet.” (Genesis 2:24) Kpa ye emi mbufo ẹnyenede obufa owo ke ubon mbufo, ti ete ke afo ye n̄wan fo ẹsụk ẹdi “obụk kiet.” Ntre ẹnam se ẹkekeme man ẹnen̄ede ẹkpere kiet eken.

Iban, ẹnen̄ede ẹkọm ebe mbufo ke ini mmọ ẹn̄wamde mbufo. Ekọm ekeme ndinam n̄kpọ ọfọn. (Mme N̄ke 12:18) Mme ebe, ẹdọhọ iban mbufo ke ẹmenen̄ede ẹma mmọ ẹnyụn̄ ẹkpono mmọ. Ẹtoro mmọ ke nte mmọ ẹkamade ufọk.—Mme N̄ke 31:10, 28.

“Yak owo kiet kiet okûyom ufọn idemesie, edi oyom ufọn owo en̄wen.” (1 Corinth 10:24) Ana ebe ye n̄wan ẹsinam se inemde kiet eken esịt. Ẹda ini ẹtie nte ebe ye n̄wan ẹneme nneme, ẹtoro kiet eken, ẹnyụn̄ ẹkpan̄ utọn̄ ẹnọ kiet eken. Ke n̄kpọ aban̄ade unam ima, ifọnke ebe m̀mê n̄wan ekere aban̄a idemesie kpọt. Bible ọdọhọ ete: “Ẹkûsịn ndinọ kiet eken n̄kpọ emi, ibọhọke oto ke unyịme edem mbiba.” (1 Corinth 7:3-5) Ke ntem, ẹtie ọtọkiet ẹneme n̄kpọ emi ke ofụri esịt. Ime ye mbufiọk ayanam mbufo ẹtetịm ẹkpere kiet eken.

SE AKPANAMDE:

  • Kûfre ndisio ini nnịm man mbufo mbiba kpọt ẹtie ẹneme nneme

  • Kot n̄wan m̀mê ebe fo ke fon mîdịghe nam n̄kpri n̄kpọ nọ enye man enye okụt ke amama imọ

 3 NTE EKPEKPEPDE NSEKEYEN MBUFO N̄KPỌ

BIBLE ỌDỌHỌ ETE: “Toto ke nsek afo ama ọfiọk ndisana uwetn̄kpọ, emi ẹkemede ndinam fi enyene ọniọn̄ emi adade esịm edinyan̄a.” (2 Timothy 3:15) Babak kere se edikpepde nsekeyen mbufo. Enye ekeme ndikpep n̄kpọ idem mbemiso amanade. Ke ini enye osụk esịnede ke idịbi, enye ekeme ndifiọk uyo fo onyụn̄ ọwọn̄ọde idem ke ini esịt enen̄erede adat fi m̀mê ke ini esịt ayatde fi. Kot n̄wed nọ enye ke ini enye osụk edide nsek nsek. Okposụkedi emi se afo okotde mîdin̄wan̄ake enye, emi ekeme ndinam enye enen̄ede ama ndikot n̄wed enye ama okpon.

Kûkere ke nsekeyen mbufo ekpri akaha ndikop n̄kpọ mban̄a Abasi. Bọn̄ akam yak enye okop. (Deuteronomy 11:19) Idem ke ini mbufo ẹbrede mbre, tịn̄ mme n̄kpọ emi Abasi anamde nọ enye. (Psalm 78:3, 4) Nte eyen fo okponde, enye oyokụt nte afo amade Jehovah, onyụn̄ ekpep nditiene mma enye n̄ko.

SE AKPANAMDE:

  • Bọn̄ akam ben̄e Abasi ifiọk man ada ekpep nsekeyen mbufo n̄kpọ

  • Kot n̄wed nọ enye ndien ndien man enye ọtọn̄ọ ke nsek ekpep n̄kpọ

Kpep N̄kpọ En̄wen

Nte Ẹkpekpepde Nditọ Ido ke Ererimbot Uma-Idem Emi

Se n̄kpọ ita emi emi akpanamde man nditọ fo ẹnyene ido.

Se Inamde Owo Edi Eti Ete

Se item Bible ition emi ẹkemede ndinam fi edi eti ete.