Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Emekeme Ndinam Ubon Fo Ẹkop Inemesịt

 IKPEHE 2

Ẹkûkpọn̄ Kiet Eken

Ẹkûkpọn̄ Kiet Eken

“Se Abasi ama akadian yak baba owo kiet okûdian̄ade.” —Mark 10:9

Jehovah iyomke nnyịn ikpọn̄ owo emi idọde ibịne owo en̄wen. (Mme N̄ke 5:15) Utọ n̄kpọ emi esibabiat ndọ sia isiyakke ebe ye n̄wan ẹnịm kiet eken ke akpanikọ. Edieke ebe ye n̄wan mînịmke kiet eken ke akpanikọ, ima isidụhe ke utọ ndọ oro.

Ediwak mbon emi ẹma ẹkedọ ndọ ẹsikpọn̄ kiet eken ẹbịne owo en̄wen. Enyene n̄kpọ iba emi akpanamde mbak utọ n̄kpọ emi idiwọrọ fi.

 1 DA NDỌ MBUFO NTE ATA AKPAN N̄KPỌ

BIBLE ỌDỌHỌ ETE: “[Ẹdụn̄ọde] ẹfiọk se idide akpan n̄kpọ ikan.” (Philippi 1:10) Ndọ mbufo edi kiet ke otu n̄kpọ oro edide akpan n̄kpọ akan. Oyom ada enye nte ebeiso n̄kpọ.

Jehovah oyom mbufo ẹnen̄ede ẹma kiet eken ẹsinyụn̄ ẹtie ntre ‘ẹdia uwem.’ (Ecclesiastes 9:9) Enye iyomke mbufo ẹfre kiet eken enyịn, edi oyom ebe esinam esịt enem n̄wan esie kpukpru ini, n̄wan onyụn̄ anam kpa ntre. (1 Corinth 10:24) Nam n̄wan m̀mê ebe fo ọfiọk ke emenen̄ede ama imọ.

SE AKPANAMDE:

  • Mbọk ẹsitie kiet ẹneme nneme ẹnyụn̄ ẹnen̄ede ẹkpan̄ utọn̄ ẹnọ kiet eken

  • Se ededi oro anamde, ti ke ẹdi owo iba

 2 KPEME ESỊT FO

BIBLE ỌDỌHỌ ETE: “Owo ekededi eke owụkde enyịn ese n̄wan tutu udọn̄ idan̄ edemede enye, enye esesịn efịbe ye enye ama ke esịt esie.” (Matthew 5:28) Edieke ebe esitiede ekere nte ikpodude ye n̄wan en̄wen, ọwọrọ esịt esie ọkpọn̄ n̄wan esie. Ntre n̄ko ke edi ye n̄wan.

Jehovah ọdọhọ ‘ekpeme esịt fo.’ (Mme N̄ke 4:23; Jeremiah 17:9) Ana ekpeme enyịn fo man ekeme ndikpeme esịt fo. (Matthew 5:29, 30) Kpebe Job emi okodiomide ediomi ye enyịn esie ete ke imọ idisehe eyenan̄wan ke enyịn use. (Job 31:1) Ntre, biere ke udusehe ndise idan̄ tutu amama. Nyụn̄ biere ke tutu amama udûnamke n̄kpọ ye owo en̄wen nte anam ye n̄wan m̀mê ebe fo.

SE AKPANAMDE:

  • Yak kpukpru owo ẹfiọk ke emenen̄ede ama onyụn̄ ekpere n̄wan m̀mê ebe fo

  • Edieke n̄wan m̀mê ebe fo mîmaha nte ekperede owo en̄wen, kop se enye etịn̄de nyụn̄ sọsọp tre ufan oro

Kpep N̄kpọ En̄wen

ENYỌN̄-UKPEME

Nte Okpokponode Ebe m̀mê N̄wan Fo

Didie ke ebe m̀mê n̄wan ekeme ndineme nneme ukpono ukpono ye kiet eken?

ẸDEMEDE!

Ẹnam Se Ẹken̄wọn̄ọde ke Usen Ndọ

Ndi un̄wọn̄ọ emi akanamde ke usen ndọ fo etie fi nte n̄kpọkọbi m̀mê etie nte ukwak ubom?