Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

“Ẹnịm Idem Mbufo Ke Ima Abasi”

 SE ẸWETDE ẸDIAN

Nte Akpasan̄ade Etre Edifiọn̄ọ Ndido Idan̄ N̄kop Uyụhọ

Nte Akpasan̄ade Etre Edifiọn̄ọ Ndido Idan̄ N̄kop Uyụhọ

Abasi asasua utọ edinam emi. Owo emi esifiọn̄ọde ndido idan̄ okop uyụhọ esikere aban̄a idemesie kpọt, emi esinyụn̄ asabade ekikere esie. Esitie enye nte akpadan̄ ye kpukpru owo emi enye okụtde, enye esinyụn̄ ese mbon en̄wen nte mbon oro enye ekemede ndida nyụhọ udọn̄ idemesie. Utu ke enye ndida idan̄ nte n̄kpọ oro owụtde ima ke ufọt owo iba, enye esida idan̄ nte n̄kpọ oro enye anamde man okop uyụhọ onyụn̄ anam ọkpọsọn̄ udọn̄ idan̄ esie osụhọde ubọk. Edi udọn̄ idan̄ oro isisụhọkede ubọk ibịghi. Utu ke ndinam owo ekeme ndiwot mme ndido idemesie man etre “use, mbubiam ido, ọkpọsọn̄ udọn̄ idan̄,” edifiọn̄ọ ndido idan̄ n̄kop uyụhọ esikam ededemede ndiọi udọn̄ emi.—Colossae 3:5.

Apostle Paul ọkọdọhọ ete: “Ndima, ẹyak nnyịn iyet kpukpru se isabarede obụkidem ye spirit ifep ke idem nnyịn, inam edisana idaha nnyịn ọfọn ama ke edibak Abasi.” (2 Corinth 7:1) Edieke esisọn̄de fi ndinam emi, kûkere ke okwo okụre. Jehovah eben̄e idem “ndifen nnọ” fi nnyụn̄ n̄n̄wam fi. (Psalm 86:5; Luke 11:9-13) Esịt ndibiom fi nte osụk esịnde ifịk odomo nditre  idiọk edinam emi—kpa ye emi esiduede afiak anam ndusụk ini—owụt ke emenen̄ede oyom ndinam se ifọnde. Ti ke ‘Abasi okpon akan esịt nnyịn onyụn̄ ọfiọk kpukpru n̄kpọ.’ (1 John 3:20) Abasi isehe ndudue nnyịn; enye enen̄ede ọfiọk kpukpru n̄kpọ aban̄a nnyịn. Emi esinam enye atua nnyịn mbọm onyụn̄ okop n̄kpeubọk ofụri esịt nnyịn. Mmọdo, kûkpa mba ndisụhọde idem mbọn̄ akam nnọ enye ke ofụri esịt, ukem nte eyen esikade ebịne ete esie ke ini enyenede mfịna. Jehovah ayanam fi enyene eti ubieresịt. (Psalm 51:1-12, 17; Isaiah 1:18) Edi oyom anam se esibọn̄de akam aban̄a. Ke uwụtn̄kpọ, n̄wana nte ekekeme nditre ndikot n̄wed idan̄ m̀mê ndise ndise idan̄, nyụn̄ tre idiọk nsan̄a. *

Edieke mûkemeke nditre edifiọn̄ọ ndido idan̄ n̄kop uyụhọ, mbọk neme emi ye ete m̀mê eka fo edieke enye edide Christian, mîdịghe neme ye eyenete emi ọkọride esịm ọyọhọ idaha, emi afo amade. *Mme N̄ke 1:8, 9; 1 Thessalonica 5:14; Titus 2:3-5.

^ ikp. 2 Man ẹkpeme nte ẹsisede kọmputa, ediwak ubon ẹsinịm enye ke ebiet emi ediwak owo ẹdikụtde se owo anamde. Adianade do, ndusụk ubon ẹsidep n̄kpọ emi esinamde ndiọi ndise ẹkûwọrọ ẹdi ẹsịn ke kọmputa mmọ. Edi fiọk ete ke idụhe se ekpedepde esịn ke kọmputa emi ekemede nditre ndiọi ndise ofụri ofụri.

^ ikp. 1 Man ọfiọk se akpanamde man etre edifiọn̄ọ ndido idan̄ n̄kop uyụhọ, se ibuotikọ emi “Young People Ask . . . How Can I Conquer This Habit?” ke Awake! eke November 2006, ye n̄wed Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn, Eboho 1, page 205-211.